1 ሄ ዎደ እዮርባማ ናአይ አብይ ሀርገትስ። 2 እዮርባም ባ ማችዉ፥ “ደንዳ፤ ኔኒ እዮርባማ ማቾ ግደይሳ ኦንካ ኤሮና መላ ነ ማኡዋ ላማዳ ሴሎ ባ። ሄኮ፥ ታኒ ሀ አሳ ቦላ ካዎታናይሳ ታዉ ኦድዳ ናበይ አክይ ያን ደኤስ። 3 ታሙ ኡይꬁ፥ ጉꬃ ዳቦነ እስ ኦቶ ኤስ እያዉ ኤካዳ ባ። ሀ ሀርግዳ ናአባ እ ነዉ ኦዳና” ያግስ።

4 እዮርባማ ማችያ እ ግዳይሳዳ ኦꬃዳ አክያ ሶ ሴሎ ባሱ። አክይ ጭምዳ ግሾ እያ አይፈይ ፄላናዉ ዳንዳኤና። 5 ሽን ጎዳይ አክያኮ፥ “ሄኮ፥ እዮርባማ ማችያ ሀርገትዳ ባ ናአባ ኦይቻናዉ ኔኮ ያዉሱ። ኔኒ እዉ ሀይሳ ሀይሳ ያጋዳ ኦዳ። እያ ኔኮ ጋክያ ዎደ ሀራ ማጫስ ዳናና” ያግስ።

6 አክይ ፐንገን ቶሆ ግርስ ስእድ ሀይሳዳ ያግስ፤ “እዮርባማ ማቸ፥ አነ ሃ ገላ። ኔኒ አይስ ሀይሳ መላ ሀራ አስ ዳናዲ? ታኒ ኢታ ኪታ ነዉ ኦዳና። 7 ኔኒ እዮርባማኮ ባዳ፥ ጎዳይ እስራኤለ ፆሳይ ሀይሳዳ ያጌስ ያጋ፤ ‘ታኒ ነና አሳ ግዶፈ ꬎቁ ኦꬃስ፤ ታ አሳ እስራኤለ ቦላ ነና ካዎꬃስ። 8 ዳዊታ ኮቻፈ ካዎተꬃ ኤካዳ ነዉ እማስ፤ ሽን ኔኒ ታ አይልያ ዳዊታ መላ ግዳካ። እ ታ ኪታ ናግስ፤ ታ ስንꬃን ሱረባ ፃላላ ኦꬅሸ ባ ኩመꬃ ዎዛናን ታና ካልስ። 9 ኔፐ ካሰ ደእያ ኡባይ ኦꬅዳይሳፈ አꬍያ ኢታባ ኔኒ ኦꬃዳሳ። ኔኒ ነዉ ሀራ ፆሳታነ ብራፐ መꬍዳ ኤቃታ መꬋዳሳ። ያታዳ ታና ሀንቀꬃዳሳ፤ ታዉ ዞኮ ዛራዳሳ። 10 ሄሳ ግሾ፥ ታኒ እዮርባማ ኬꬃ አሳ ቦላ ኢታባ ኤሀና። እስራኤለ ቢታን እዮርባማ ኬꬃ አሳፐ አይለ ግድን ዎማኖ እስ አደካ አሾና ꬋይሳና። ከምኤለይ ታማን ፁገትድ ዉረይሳዳ ታኒ እዮርባማ ኬꬃ ፁጋዳ ዉርሳና። 11 እዮርባማ ኮቸ ግድድ ካታማን ሀይቅያ ኦናካ ካናት ማና፤ ጋፃረን ሀይቀይሳታ ሳሎ ካፎት ማና። ታኒ ጎዳይ ሀይሳ ኦዳስ!’ ” ያግስ።

12 እዮርባማ ማቸኮ፥ “ኔኒ ደንዳዳ ነ ሶ ባ። ነ ቶሆይ ካታማ ገልያ ዎደ ናአይ ሀይቃና። 13 እስራኤለ ኡባይ ናኣስ ዬክድ ሞጋና። እዮርባማ ኬꬃን ጎዳ እስራኤለ ፆሳ ስንꬃን እያን ሎኦባይ በንትዳ ግሾ፥ እዮርባማ ኬꬃፈ እያ ፃላል ሞገታና። 14 ቃስ እዮርባማ ኬꬃ ꬋይስያ ካዎ ጎዳይ ባዉ እስራኤለ ቦላ ደንꬃና። 15 ጎዳይ እስራኤለ ሾጫና፤ ሃꬃ ግዶን ማይረይ ቃፀይሳዳ ጎዳይ ሄ ዎደ እስራኤለ ቃꬃና። አሼራ ጌተትያ ፆሰ ምስለ ኤስድ፥ ጎዳ ሀንቀꬅዳ ግሾ፥ ኤንታ አዋታስ እ እምዳ ሎኦ ቢታፈ ኤንታ ሾዳና፤ ኤንታ ኤፍራፂሳ ሻፋፐ ሄፍንꬃን ላላና። 16 እዮርባም ኦꬅዳ ናጋራ ግሾነ እስራኤለ አሳ ናጋራ ኦስስዳ ግሾ ጎዳይ እስራኤለ አጋና” ያግስ።

17 እዮርባማ ማችያ ባዳ ትርሳ ጋካዳ፥ ፐንገ የꬍያ ዎደ ናአይ ሀይቅስ። 18 ባ አይልያ ናብያ አክያ ባጋራ ጎዳይ ኦድዳይሳዳ እያ ሞግዶሶና፤ እስራኤለ አሳ ኡባይ እያዉ ዬክዶሶና።

19 እዮርባም ኦꬅዳ ሀራባይ፥ እ ኦለትዳ ኦላይነ እያ አይሶ ማራይ፥ ሄኮ፥ እስራኤለ ካዎታ ታርከ ማፃፋን ፃፈትድ ደኤስ። 20 እዮርባም ላታማነ ናምኡ ላይꬅ ካዎትድ ሀይቅስ። እያ በሳን እያ ናአይ ናዳብ ካዎትስ።

21 ሶሎሞነ ናአይ ሮብኣም ይሁዳን ካዎትስ፤ ሮብኣም ካዎትያ ዎደ እያዉ ላይꬅ ኦይታማነ እስኖ። ጎዳይ ባ ሱንꬃይ ፄገታና መላ እስራኤለ ኮቻታ ቢታ ኡባ ግዶፈ ዶርዳ የሩሳላመ ካታማን፥ ሮብኣም ታማነ ላፑን ላይꬅ ካዎትስ። እያ አየ ሱንꬃይ ናእሞ፤ እያ አሞነ ቢታ አስ። 22 ይሁዳ አሳይ ጎዳ ስንꬃን ኢታባ ኦꬅዶሶና። ባንታ ኦꬅዳ ናጋራን ባንታ አዋታፐ አꬍድ ጎዳ ሀንቀꬅዶሶና። 23 ቃስ ኤንቲ ꬎቃ ጎይኖ በሳታ፥ ኤቃ ሹቻታነ አሼሮ ጌተትያ ፆሰ ምስለታ ደረ ቦላነ እርፃ ምꬃታ ጋርሳን ኤስዶሶና። 24 ሀር አቶሽን፥ ኤንታ ꬎቃ ጎይኖ በሳን፥ ጎይኖ ዎጋ ኦꬅድ አደይ አደራ ጋሄቴስ። ጎዳይ እስራኤለ ስንꬃፈ ከስዳ ካዎተꬃት ኦꬅያ እፀትዳ ኦሶታ ኡባ እስራኤለ አሳይ ኦꬅዶሶና።

25 ሮብኣም ካዎትዳ እቻሻንꬆ ላይꬃን ግብፀ ካዎይ ሽሻቅ የሩሳላመ ካታማ ቦላ ኦላ ደንꬅስ። 26 ፆሳ ኬꬃነ ካዎ ጋꬎን ደእያ ሻሉዋ፥ ሶሎሞነይ ቆፅስዳ ዎርቃ ጎንዳለታ ኡባ ቦንቅድ ኤክስ። 27 ያትን፥ ካዎይ ሮብኣም ሄ ጎንዳለታ ግሾ ናሰ ብራታፐ ሀራ ጎንዳለታ ኦስስስ። ኤንቲ ናገታና መላ ካዎ ጋꬎ ፐንግያ ናገይሳታ ሀላቃታስ እሚስ። 28 ካዎይ ፆሳ ኬꬅ ብያ ዎደ ናገይሳት ጎንዳለታ ኦይኮሶና፤ እ ስሚድ ብያ ዎደ ኤንቲ ዛሪድ ናገይሳታ ኬꬃን ዎꬆሶና።

29 ሮብኣም ሀንዳ ሀራባይነ እ ኦꬅዳ ኡባይ ይሁዳ ካዎታ ታርከ ማፃፋን ፃፈትስ። 30 ሮብኣምነ እዮርባም ኡባ ዎደ ኦላን ደእዶሶና። 31 ሮብኣም ሀይቅድ ባ ማይዛታን ጋሄትስ፤ ዳዊታ ካታማን ደእያ ባ አዋታ ዱፎን ሞገትስ። እያ አየ ሱንꬃይ ናእሞ፤ እያ አሞነ ቢታ አስ፤ ሮብኣማ በሳን እያ ናአይ አብይ ካዎትስ።