1 ናባፃ ናአይ እዮርባም ካዎትዳ ታማነ ሆስፑንꬆ ላይꬃን አብይ ይሁዳን ካዎትስ። 2 አብይ የሩሳላመን ሄꬑ ላይꬅ ካዎትስ። እያ አይያ አበሰሎመ ናአ፤ እ ሱንꬃይ ማእኮ። 3 እያፐ ካሰ፥ እያ አዋይ ኦꬅዳ ናጋራ ኡባ ኦꬅስ። እያ ዎዛናይ እያ አዋ አዋይ ዳዊታ ዎዛናይ ፖሎ ግድዳይሳዳ ጎዳ፥ ባ ፆሳ ስንꬃን ፖሎ ግደና። 4 ግዶሽን፥ እያፐ ጉየ የሩሳላመን ካዎታና መላነ የሩሳላመ ሳሮተꬃ ናጋና መላ ጎዳይ እያ ፆሳይ፥ ዳዊታ ግሾ አብያስ እስ አደ ናኣ እሚስ። 5 ጎዳይ ሄሳ ኦꬅዳይ፥ ዳዊቲ ህተ አድያ ኦርዮና ቦላ ናጋራ ኦꬅዳይሳፈ አትሽን፥ ባ ደኦ ላይꬃ ኡባን ጎዳ ኪታፐ እስባካ ባልቤና። 6 አብይ ደእዳ ላይꬃ ኡባን ሮብኣምነ እዮርባም ኦለትሸ ደእዶሶና።

7 አብይ ሀንዳ ሀራባይነ እ ኦꬅዳባ ኡባይ ይሁዳ ካዎታ ታርከ ማፃፋን ፃፈትስ። አብይነ እዮርባም ኦለትሸ ደእዶሶና። 8 አብይ ሀይቅድ ባ ማይዛታን ጋሄትስ፤ እ ዳዊታ ካታማን ሞገትስ፤ እያ በሳን እያ ናአይ አስ ካዎትስ።

9 እስራኤለ ካዎይ እዮርባም ካዎትዳ ላታማንꬆ ላይꬃን አስ ይሁዳን ካዎትስ። 10 አስ የሩሳላመን ኦይታማነ እስ ላይꬅ ካዎትስ። እያ ዎጋ አየ ሱንꬃይ ማእኮ፤ እያ አበሰሎመ ናአ። 11 አስ ባ ማይዛይ ዳዊቲ ኦꬅዳይሳዳ፥ ጎዳ ስንꬃን ሱረባ ኦꬅስ። 12 ጎይኖ ዎጋ ኦꬅድ አደይ አደራ ላይማተሳታ አስ ቢታፈ ꬋይስስ። እያፐ ካሰ ደእያ ካዎት መꬍዳ ኤቃ ምስለታ ኡባ መንረꬅስ። 13 እያ ዎጋ አይያ ማእካ አሼራ ጌተትያ ፆሴስ ቱና ኤቃ ምስለ መꬍዳ ግሾ፥ ካዎ አዮ ጌተትያ ቦንቾ በሳፈ እዮ ድግስ። አስ ሄ ኤቃ ምስልያ ቃንፀረꬅድ ቀድሮና ዛንጋራን ፁግስ። 14 አስ ꬎቃ ጎይኖ በሳታ ኡባ ꬋይሶና አግኮካ፥ እ ባ ደእዳ ላይꬃ ኡባን ፆሳስ አማነትያ አስ ግድድ ደእስ። 15 እነ እያ አዋይ ፆሳስ ዱማይድ ዎꬅዳ ብራ፥ ዎርቃነ ሀራ ሚሸታ ኤህድ፥ ፆሳ ኬꬃን ዎꬅስ።

16 ይሁዳ ካዎይ አስነ እስራኤለ ካዎይ ባኦስ፥ ባንታ ላይꬃ ኡባን ኦላን ደእዶሶና። 17 እስራኤለ ካዎይ ባኦስ ይሁዳ ቦላ ደንድድ፥ ይሁዳ ካዋ አሳ ቢታፈ ኦንካ ገሎና መላነ ከዮና መላ ተቃናዉ ራማ ዩሹዋ ግምብስ።

18 ሄሳ ጋሶን ካዎይ አስ ፆሳ ኬꬃንነ ካዎ ጋꬎን ደእያ ዎርቃነ ብራ ኡባ ከስድ ባ ሞርናታ ኩሸን ዎꬅስ። ሄዝዮና ናኣ ናኣ፥ ፃብርሞና ናኣስ፥ ዳማስቆን ደእያ አራመ ካዋ በን-ሀዳዳ እሞታ ኦꬅድ የድሸ ሀይሳዳ ያግስ፤ 19 “ካሰ ታ አዋራነ ነ አዋራ ጫቅዳይሳዳ፥ አነ ታራነ ኔራ ጫቆስ። ሄኮ፥ ታኒ ሀ ብራነ ዎርቃ ታኒ ነዉ እሞታ ኦꬃዳ የዳስ። እስራኤለ ካዎይ ባኦስ ባ ኦላንቾታ ታ ቢታፈ ከሳና መላ ኔኒ ካሰ እያራ ጫቅዳ ጫቁዋ መንꬃ” ያግስ።

20 በን-ሀዳድ ካዎይ አስ ግዳይሳ ኤክድ፥ ባ ቶራ ሞጮናታ እስራኤለ ካታማታ ኦላናዉ የድስ። ኤንቲ እዮና፥ ዳነነ አቤል-ቤት-ማእካ ካታማታ፥ ጋልላ አባ ማታን ደእያ ቢታነ ንፍታለመ ቢታራ ጋꬅድ ኦይክዶሶና። 21 ካዎይ ባኦስ ሄሳ ስእድ፥ ራማ ግምበይሳ አግድ ትርሳ ብስ።

22 ሄሳፈ ጉየ ካዎይ አስ ይሁዳን ደእያ አሳ ኡባ ኪትን፥ እሶይካ አቶና ደንድድ፥ ባኦስ ያን ጎኤትያ ሹቻነ ምꬃ ራማፐ ጋዝዶሶና። ካዎይ አስ ምፅጳንነ ብንያመን ደእያ ግብአ ግምብስ።

23 አስ ሀንዳ ሀራባይ፥ እያ ምኖተꬃይ ኡባይ፥ እ ኦꬅዳባ ኡባይነ እ ኬፅዳ ካታማት ይሁዳ ካዎታ ታርከ ማፃፋን ፃፈትስ። ሽን እ ጭምዳ ዎደ ባ ቶሁዋ ሳከትስ። 24 አስ ሀይቅድ፥ ባ ማይዛታን ጋሄትድ ባ ማይዛ ዳዊታ ካታማን ሞገትስ። እያ ናአይ እዮሳፈፅ እያ በሳን ካዎትስ።

25 ይሁዳ ካዎይ አስ ካዎትዳ ናምአንꬆ ላይꬃን እዮርባማ ናአይ ናዳብ እስራኤለን ካዎትስ፤ እ እስራኤለ ቢታን ናምኡ ላይꬅ ካዎትስ። 26 ናዳብ ካሰ ባ አዋ ኦግያንነ እስራኤለ አሳ ኦስስዳ እያ ናጋራ ኦግያን ሄመትድ ጎዳ ስንꬃን ኢታባ ኦꬅስ።

27 ይሳኮራ ኮቸ ግድዳ አክያ ናአይ ባኦስ ናዳባ ቦላ ማቀትስ። ሄ ዎደ ናዳበይነ እያ ኦላንቾት ፍልስፄመን ደእያ ግባቶና ካታማ ዩሾን ደኦሶና። 28 ይሁዳ ካዎይ አስ ካዎትዳ ሄꬓንꬆ ላይꬃን ባኦስ ናዳባ ዎꬍድ እያ በሳን እ ባዉ ካዎትስ። 29 ባኦስ ካዎቶ ዶምዳ መላ እዮርባማ ሶ አሳ ኡባ ዎꬍድ ዉርስስ። ጎዳይ ሴሎፐ ይዳ ባ አይልያ፥ ናብያ አክያ ባጋራ ኦድዳይሳዳ እዮርባማ ኬꬃ አሳ ኡባይ ሀይቅ ዉርስ። 30 ሄስ ሀንዳይ፥ እዮርባም ባ ሁጰን ኦꬅዳ ናጋራንነ እስራኤለ አሳ እ ኦስስዳ ናጋራን ጎዳ እስራኤለ ፆሳ ሀንቀꬅዳ ግሾሳ።

31 ናዳብ ሀንዳ ሀራባይነ እ ኦꬅዳባ ኡባይ እስራኤለ ካዎታ ታርከ ማፃፋን ፃፈትስ። 32 ይሁዳ ካዎይ አስነ እስራኤለ ካዎይ ባኦስ ባንታ ካዎተꬃ ላይꬃ ኡባን ኦለትዳ መላ ደእዶሶና።

33 ይሁዳ ካዎይ አስ ካዎትዳ ሄꬓንꬆ ላይꬃን አክያ ናአይ ባኦስ እስራኤለ ቦላ ካዎትስ፤ እ ትርሳ ካታማን ኡትድ ላታማነ ኦይዱ ላይꬅ ካዎትስ። 34 እዮርባም እስራኤለ አሳ ናጋራ ኦስስዳይሳዳ እካ ሄ ኦግያን ሄመትድ ጎዳ ስንꬃን ኢታባ ኦꬅስ።