1 ጋላዳን ተስባፐ ይዳ ናበይ፥ ኤልያስ ካዋ አካባ ሀይሳዳ ያግስ፤ “ታኒ እያዉ ኦꬅያ ጎዳይ፥ እስራኤለ ፆሳይ ኤሮ! ካልድ ያና ላይꬃታን፥ ታኒ ኦዶና ደእሽን፥ ሳአን እር ቡከና ዎይኮ ፃሳተና” ያግስ።

2 ሄሳፈ ጉየ፥ ጎዳ ቃላይ ኤልያሳኮ ይድ ሀይሳዳ ያግስ፤ 3 “ሀይሳፈ ደንዳዳ ዶሎሀ ባጋ ባ፤ ያን ዮርዳኖሰ ሻፋፐ ዶሎሀ ባጋራ ደእያ ኮራታ ዛንጋራን ቆሰታ። 4 ኔኒ ሄ ሻፋፐ ሃ ኡያና፤ ቁሮት ነና ሄ በሳን ካꬅ ሙዛናዳ ታ ኤንታ ኪታስ” ያግስ። 5 ኤልያስ ጎዳይ ግዳይሳዳ ኦꬅስ፤ ዮርዳኖሰ ሻፋፐ ዶሎሀ ባጋራ ደእያ ኮራታ ዛንጋራ ብድ ያን ኡትስ። 6 ዎንታነ ኦማርስ ቁሮት ኡይꬅነ አሾ ኤልያሳስ ኤሆሶና፤ እ ሻፋፐ ሃ ኡይስ። 7 ቢታን እር ቡኮና ግሾ፥ ጉꬃ ዎደፐ ጉየ ሻፋይ መልስ።

8 ሄሳፈ ጉየ፥ ጎዳ ቃላይ ኤልያሳኮ ሀይሳዳ ያግስ፤ 9 “ሀ በሳፈ ደንዳዳ፥ ስዶና ማታን ደእያ ሳራፕታ ባዳ ያን ደኣሻ። ሄኮ፥ እስ አምእያ ካꬅ ነና ሙዛና መላ ታኒ ኪታስ” ያግስ።

10 ኤልያስ ደንድድ ሳራፕታ ብድ ካታማ ፐንግያ ጋክያ ዎደ፥ ሄኮ፥ እስ አምእያ ምꬅ ምፃዉሱ። ኤልያስ ማጫስዉ ፄግድ፥ “ሀያና፥ ታዉ ሃ ኡያናዉ ቡለራ ኤካዳ ያ” ያግስ። 11 ማጫስያ ሃ ኤሀናዉ ብሽን እ ፄግድ፥ “ሀያና ጉꬃ ባሶ ኡይꬅካ ኤካዳ ያ” ያግስ።

12 ማጫስያ ዛራዳ፥ “ጎዳይ፥ ነ ደኦ ፆሳይ ኤሮ! ታዉ ኡይꬅ ባዋ። ታዉ ኦቶን እስ ኩጫ ꬊለይነ ጉꬃ ዛይተ ፃላል ፃሮን ደኤስ። ታኒ ሀይሳ ይዳይ ጉꬃ ምꬅ ምፃዳ፥ ሶ ስማዳ፥ ህኖ ታዉነ ታ ናኣስ እስ ቶሆ ኡክድ ምድ ሀይቃና” ያጋሱ።

13 ኤልያስ ዛሪድ፥ “አይኮይ ባዋ፥ ያዮፋ፤ ባዳ ነ ካꬃ ካꬃ። ሽን ኮይሮ ነ ꬊልያፈ ጉꬃ ኡይꬅ ላቃዳ ታዉ ኤካዳ ያ፤ ሄሳፈ ጉየ፥ ነዉነ ነ ናኣስ ኡካ። 14 ጎዳይ፥ እስራኤለ ፆሳይ፥ ‘ሳኣ ቦላ እር ቡካና ጋካናዉ ꬊለይ ኦቱዋፐ ዛይተይ ፃሩዋፐ ዉረና’ ያጌስ” ያግስ።

15 ሄሳ ግሾ፥ ማጫስያ ባዳ፥ ኤልያስ ግዳይሳዳ ኦꬃሱ፤ ሄሳዳ ሀንን፥ ኤልያስ፥ ማጫስያነ እ ሶ አሳይ ዳሮ ዎደስ ግድያ ካꬅ ደምዶሶና። 16 ጎዳይ ኤልያሳ ባጋራ ኦድዳ ቃላ ናግድ፥ ኦቱዋፐ ꬊለይ ፃሩዋፐ ዛይተይ ዉርቤና።

17 ጉꬃ ዎደፐ ጉየ ሄ ማጫሰ ናአይ ሀርግስ፤ ሀርገይ ጎብሸ ብን፥ ዉርሰꬃን ናአይ ሀይቅስ። 18 ማጫስያ ኤልያሳኮ፥ “ፆሳ አድያዉ፥ ነ ታ ቦላ ሀይሳዳ አይስ ኦꬃዲ? ነ ታ ናጋራ ሀሳይሳዳ ታ ናኣ ዎꬋናዉ ያዲ?” ያጋሱ።

19 ኤልያስ፥ “ነ ናኣ ሃ ኤካዳ ያ” ያግስ። ናኣ እ ክኡዋፐ ኤክድ፥ ፑደ ባ ደእያ ፖቅያ ኤፍድ ባ አርሳን ዝንእስስ። 20 ያትድ ጎዳኮ ሀይሳዳ ያግድ ዋስስ፤ “አቤት ጎዳዉ፥ ታ ፆሳዉ፥ ሀ ታኒ ደእያ አምኤ ናኣ ዎꬋዳ፥ ሀይሳ መላ መቶ እ ቦላ አይስ ኤሀይ?” ያግስ። 21 ሄሳፈ ጉየ ናኣ ቦላ ሄꬑ ቶሆ ዛቁልድ፥ “አቤት ጎዳው፥ ታ ፆሳዉ፥ ሀ ናኣ ፓꬃ” ያግድ ዎስስ።

22 ጎዳይ ኤልያሳ ዎሳ ስእስ። ናኣ ሸምፖይ ስምን፥ ናአይ ፓፅስ። 23 ኤልያስ ናኣ ኤክድ ፖቅያፐ ዱገ ዎꬍስ፤ ናኣ አየስ እምድ፥ “ሄኮ ነ ናአይ ፓፅስ” ያግስ።

24 ማጫስያ፥ “ኔኒ ፆሳ አስ ግደይሳነ ነ ዶናፐ ከይያ ጎዳ ቃላይ ቱማ ግደይሳ ታኒ ሀእ ኤራስ” ያጋሱ።