1 እር ቡኮና አግን ሄꬓንꬆ ላይꬃን፥ ጎዳይ ኤልያሳኮ፥ “ባዳ ካዋ አካባስ ቆንጫ። ታ ቢታን እራ ቡክሳና” ያግስ። 2 ኤልያስ አካባስ ቆንጫናዉ ደንድድ ብስ።

ሄ ዎደ ሳማረን ዎልቃማ ኮሽ ከይስ። 3 አካብ ባ ካዎ ጋꬉዋ አዋተꬃን አይስያ አብድዩ ፄግስ። አብድዩይ ጎዳ ምንꬅድ አማንያ አስ። 4 ኤልዛቤላ ጎዳ ሱንꬃን ናበታ ዎꬍዳ ዎደ አብድዩይ ኤንታፈ ፄታታ ኤክድ፥ እሻታማን እሻታማን ሻክድ፥ ጎንጎሎ ግዶን ቆስድ፥ ካꬅነ ሃ እምሸ ጋምእስ።

5 አካብ አብድዩ ፄግድ፥ “ማታ ደምድ ፓራታነ ባቁሎታ ሀይቆፐ አሻናዉ ቢታን ፑልቶይ ደእያ በስነ ሻፋ ጋፃን ኡባ ባ” ያግስ። 6 ኤንቲ ቢታን አዉ ባጋ ባነኮ ሻከትድ ኤክን፥ አካብ እስ ኦግያ ኦይክድ ባርካ ብስ፤ አብድዩይ ሀራ ኦገ ኦይክድ ባርካ ብስ።

7 አብድዩይ ባ ኦግያ ኦይክድ ብሽን፥ ሄኮ፥ ኤልያስ እያራ ጋሄትስ። አብድዩይ ኤልያሳ ኤርድ ባ ሶምኡዋን ጉፋንድ፥ “ታ ጎዳዉ ኤልያሳ፥ ሀይስ ነኔ?” ያግስ።

8 ኤልያስ፥ “ኤ ታና፤ ኔኒ ባዳ፥ ሄኮ፥ ኤልያስ ሀይሳን ደኤስ ያጋዳ ነ ጎዳስ ኦዳ” ያግስ።

9 አብድዩይ ዛሪድ፥ “ታ ነና አይ ቆህን ነ ታና ነ አይልያ ሀይቆ ጋዳ አካባ ኩሸን አꬃዳ እማይ? 10 ጎዳይ፥ ነ ደኦ ፆሳይ ኤሮ! ታ ጎዳይ ነና ኮያና መላ ኪትቦና ቢት ዎይኮ ካዎተꬅ ባዋ። ኤንቲ፥ ‘ኤልያስ ሀይሳን ባዋ’ ግያ ዎደ ነ ያን ባይናይስ ቱማ ግደይሳ ኤራናዉ አካብ ደርያ አይሰይሳታ ጫቅሴስ። 11 ሀእ ኔኒ፥ ‘ባዳ፥ ኤልያስ ሀይሳን ደኤስ’ ያጋዳ ኦዳ” ያጋሳ።

12 “ታ ነና አጋዳ ብያ ዎደ ጎዳ አያናይ ነና ደንꬅድ፥ ታ ኤሮና በሲ ኤፋና። ታ አካባስ ኦድን፥ እ ነና ደሞና እፅኮ፥ ታና ዎꬋና። ታኒ ነ አይለይ ናአተꬃፈ ዶማዳ ጎዳ ያይያ አስ። 13 ኤልዛቤላ ጎዳ ናበታ ዎꬍዳ ዎደ፥ ታኒ ኤንታፈ ፄታ ኤካዳ፥ እሻታማን እሻታማን ሻካዳ እስ ጎንጎሎን ቆሳዳ፥ ካꬅነ ሃ እማስ። ያትን፥ ታኒ ኦꬅዳባይ ነዉ ታ ጎዳስ ኦደትቤኔ? 14 ሀእ ኔኒ፥ ‘ባዳ፥ ሄኮ፥ ኤልያስ ሀይሳን ደኤስ’ ያጋዳ ኦዳ ያጋሳ። ታ ኦድኮ እ ታና ዎꬋና” ያግስ።

15 ኤልያስ፥ “ታኒ እያዉ ኪተትያ፥ ኡባፈ ዎልቃማ ጎዳይ ኤሮ! ቱማ ታኒ ሀች አካባስ ቆንጫና” ያግስ።

16 አብድዩይ አካባኮ ብድ አካባስ ኦድን፥ አካብ ኤልያሳራ ጋሄታናዉ ብስ። 17 አካብ ኤልያሳ በእዳ ዎደ፥ “እስራኤለ ቢታ ቡቀይ ነኔ?” ያግስ።

18 ኤልያስ ዛሪድ፥ “እስራኤለ ቢታ ቡቀይ ታና ግዶናሽን፥ ጎዳ ኪታ አግድ፥ ባኣለ ኤቃታ ጎይንድ፥ ቢታ ቡቀይ ነናነ ነ አዋ ሶ አሳ። 19 ሀእ፥ እስራኤለ አሳ ኡባ ቃርመሎሳ ዙማ ቦላ ታኮ ሺሻ። ኤልዛቤል ግብራ ምያ ኦይዱ ፄታነ እሻታሙ ባኣለ ናበታነ ኦይዱ ፄቱ አሼራ ናበታ እስፈ ሀ በሳ ሺሻ” ያግስ።

20 ሄሳ ግሾ፥ አካብ ኪትድ፥ እስራኤለ አሳ ኡባነ ናበታ ቃርመሎሳ ዙማ ቦላ ሺሽስ። 21 ኤልያስ ሺቅዳ አሳኮ ብድ፥ “አዉደ ጋካናዉ ናምኡ ዎዛናን ዳኔ? ጎዳይ ፆሰ ግድኮ እያ ጎይንተ፤ ባኣለይ ፆሰ ግድኮ እያ ጎይንተ” ያግስ። ግዶሽን፥ አሳይ እያዉ እስ ቃላካ ዛርቤና።

22 ሄሳፈ ጉየ፥ ኤልያስ፥ “ጎዳ ናበታፐ ታ ፃላል አታስ፤ ሽን ባኣለ ናበት ኦይዱ ፄታነ እሻታማ። 23 አነ ኑስ ናምኡ ኮርማታ እመቶ። ሄ ኮርማታፐ እሱዋ ኤንቲ ዶሮ፤ ኮርማ ሹክድ ቃንፀረꬆ፤ አሹዋ ምꬃ ቦላ ዎꬆ፤ ሽን ታማ ኤꬆፎ። ታኒ ናምአንꬆ ኮርማ ጊግሳዳ፥ ምꬃ ቦላ ዎꬃና፤ ታካ ታማ ኤꬅከ። 24 ህንተ፥ ህንተ ፆሳ ሱንꬃ ፄግተ፤ ታካ ጎዳ ሱንꬃ ፄጋና። ስእድ ያርሹዋ ምያ ታማ ኪትያ ፆሳይ፥ እ፥ ፆሰ ግዶ” ያግስ።

አሳይ፥ “ነ ግያ ቆፋይ ሎኦ” ያግዶሶና።

25 ሄሳ ግሾ፥ ኤልያስ ባኣለ ናበታኮ፥ “ህንተ ዳሮ ግድያ ግሾ፥ እስ ኮርማ ዶርድ ኮይሮትድ ጊግስተ። ህንተ ፆሳ ሱንꬃ ፄግተ፤ ሽን እያን ታማ ኤꬆፍተ” ያግስ።

26 ኤንቲ ባንታዉ እመትዳ ኮርማ ኤክድ ጊግስዶሶና።

ዎንታፈ ሴታ ጋላስ ጋካናዉ ባኣለ ሱንꬃ ፄግድ፥ “ባኣለ፥ ኑና ስአ” ያግድ ዎስዶሶና። ሽን ስኤትያ ግርስ ባዋ፤ ዛርያ አስ በንትቤና። ባንታ ጊግስዳ ያርሾ በሳ ዩሹዋን ዱርዶሶና።

27 ሳእ ሴታ ጋላሳ ግድን፥ ኤልያስ፥ “ህንተ ቃላ ꬎቁ ኦꬅድ ዎስተ! እ ፆሰ ግደነ! ኦን ኤር፥ እ ቆፋን ገልዳኮ ዎይኮ እያዉ ኦሶይ ዳርዳኮ ዎይኮ ማንዳርዳኮ ዎይኮ ꬍስክዳባ ግድኮ ደንꬃናዉ ኮሼስ” ያግድ ቀልቅስስ።

28 ኤንቲ ባንታ ቃላ ꬎቁ ኦꬅድ ዎስዶሶና። ካሰ ባንታ ጎይንያ ዎጋዳ ባንታ አሳተꬃራ ሱꬅ ጎጋና ጋካናዉ ቶራንነ ማሻን ባንታና ጫድዶሶና። 29 ኦማርስ ያርሾ ሺሽያ ዎደይ ጋካናዉ ኤንቲ ትንብተ ኦድዶሶና፤ ሽን ስኤትያ ግርስ ባዋ፤ ኤንታና ሀይዝድ ዛሮ እምያ አስ ꬋይስ።

30 ሄሳፈ ጉየ፥ ኤልያስ፥ “ሃ ታኮ ሺቅተ” ያግስ። አሳይ እያኮ ሺቅን፥ ላለትዳ ጎዳ ያርሾ በሳ ዛሪድ ግምብስ። 31 ጎዳ ቃላይ ያይቆባኮ፥ “ነ ሱንꬃይ እስራኤለ ግዳና” ያግድ ኦድዳ፥ ያይቆባ ናይታ ኮቻታ ታይቡዋን ታማነ ናምኡ ሹቻታ ኤክስ። 32 ጎዳ ሱንꬃን ሄ ሹቻታ ኬልድ፥ ያርሾ በሲ ግምብድ፥ ታማነ ኦይዱ ልትሮ ሃ ኦይክያ ኦላ ያርሾ በሳ ዩሾን ቦክስ።

33 ሄሳፈ ጉየ፥ ያርሾ በሳን ምꬅ ዎꬅድ፥ ኮርማ አሹዋ እያ ቆሙዋን ቆሙዋን ቃንፀረꬅድ፥ ምꬃ ቦላ ዎꬅስ። አሳኮ፥ “ኦይዱ ባ ሃ ኩንꬅድ፥ ያርሹዋ ቦላነ ምꬃ ቦላ ጉስተ” ያግስ፤ ኤንቲ ጉስዶሶና። 34 ቃስካ፥ ኤልያስ፥ “ናምአንꬆ ጉጅተ” ያግስ፤ ኤንቲ ናምአንꬆ ጉጅዶሶና።

ቃስካ፥ ኤልያስ፥ “ሄꬓንꬆ ጉጅተ” ያግስ፤ ሄꬓንꬆ ጉጅዶሶና። 35 ሃꬃይ ያርሾ በሳ ዩሹዋን ጎግድ፥ ኦላን ኩምስ።

36 ኦማርሳ ያርሾ ሺሽያ ዎደ ናበይ ኤልያስ ያርሾ በሳኮ ሺቅድ ሀይሳዳ ያግድ ዎስስ፤ “አቤት ጎዳዉ፥ አብራሃመ ፆሳዉ፥ ይሳቃ ፆሳዉ፥ እስራኤለ ፆሳዉ፥ ኔኒ እስራኤለ ቢታን ፆሰ ግደይሳ፥ ታኒ ነ አይለ ግደይሳነ ታኒ ሀይሳ ኡባ ነ ቃላን ኦꬅዳይስ ሀች ኤረቶ። 37 አቤት ጎዳዉ፥ ታዉ ኮያ። ኔኒ፥ ጎዳይ ፆሰ ግደይሳነ ኤንታ ዎዛና ኔኮ ዛረይ ነና ግደይሳ ሀ አሳይ ኤራና መላ ታዉ ኮያ!” ያግስ።

38 ጎዳ ታማይ ሳሎፐ ዎꬍድ፥ ፁሳ ያርሹዋ፥ ምꬃ፥ ሹቻነ ቢታ ምስ፤ ኦላን ደእያ ሃꬃ ላጭስ። 39 አሳ ኡባይ ሄሳ በእዳ ዎደ፥ ባንታ ሶምኦራ ሳአን ጉፋንድ፥ “ጎዳይ ፆሰ! ጎዳ ፃላል ፆሰ!” ያግዶሶና።

40 ኤልያስ፥ “ባኣለ ናበታ ኦይክተ፤ ኤንታፈ እስ አስካ ከስ ኤኮፎ” ያግስ። አሳይ ኤንታ ኦይክዶሶና፤ ኤልያስ ኤንታ ቅሶና ሻፋ ኤፍድ ዎꬍስ።

41 ኤልያስ አካባኮ፥ “ከያዳ ባ፤ ማ፤ ኡያ፤ ታኒ፥ ዎልቃማ እራ ጉንꬅ ስአይስ” ያግስ። 42 ሄሳ ግሾ፥ አካብ ማናዉነ ኡያናዉ ብስ። ሽን ኤልያስ ቃርመሎሳ ዙማ ቦላ ከይድ፥ ባ ሶምኡዋ ባ ጉልባታ ግዶ ገልስድ ሆክስ።

43 ኤልያስ ባ አይልያኮ፥ “አነ ባዳ፥ አባኮ ስማዳ ፄላ” ያግስ።

እያ አይለይ ብድ ፄልድ፥ “አይብካ በንተና” ያግስ።

ኤልያስ ባ አይልያ ላፑን ቶሆ፥ “ቃስካ ባዳ ፄላ” ያግስ።

እያ አይለይ ላፑን ቶሆ ፄልስ። 44 ላፑንꬆን፥ “ኩሸ ቃቃፐ ዳሮና ጉꬃ ሻር አባፈ ከይሽን በአስ” ያግስ።

ኤልያስ፥ “ባዳ፥ ‘እር ነና ቡሱ ድጎና መላ ነ ፓራ ጋርያን ኡታዳ ነ ሶ ባ’ ያጋዳ አካባስ ኦዳ” ያግስ።

45 ጉꬃ ዎደፐ ጉየ ሳሎይ ካሬꬃ ሻራን ዱልክስ፤ ጫርኮይ ጫርክስ፤ ዎልቃማ እር ቡክስ። አካብ ፓራ ጋርያን ኡትድ እዝራኤላ ካታማ ብስ። 46 ጎዳ ዎልቃይ ኤልያሳ ቦላ ዎꬍስ። ኤልያስ ባ ማኡዋ ፄሳን ፑደ ስቅድ፥ እዝራኤላ ካታማ ጋካናዉ አካባ ስንꬃን ዎፅስ።