1 ኤልያስ ኦꬅዳባ ኡባነ ባኣለ ናበታ ኡባ ማሻን ዎꬍዳይሳ አካብ ኤልዛቤልስ ኦድስ። 2 ኤልዛቤላ፥ “ኔኒ ሄ ናበታ ቦላ ኦꬅዳይሳዳ ዎንቶ ሀኖደ ታኒ ነ ቦላ ኦꬆና እፅኮ፥ ፆሳት ታና ፕርዶ” ያጋዳ ኤልያሳኮ ኪታሱ።

3 ኤልያስ ባ ሸምፑዋስ ያይድ፥ ባ አይልያ ኤክድ፥ ይሁዳ ቢታን ደእያ በርሳበ ብስ። 4 እስ ጋላሳ ኦገ መላ ቢታን ሄመትስ። እ ሄመꬃ አግድ እስ ሳንካራ ኩያ ጋርሳን ኡትድ፥ “አቤት ጎዳዉ፥ ታዉ ግዳና፤ ታኒ ታ ማይዛታፐ አꬍድከ፤ ታ ሸምፑዋ ኤካ” ያግድ ሀይቆ ዎስስ።

5 ሄሳፈ ጉየ፥ ሳንካራ ኩያ ጋርሳን ዛቁልድ ꬍስክስ። እ ꬍስክዳሽን፥ ሄኮ፥ እስ ኪታንቾይ እያ ቦችድ፥ “ደንዳ፤ ማ” ያግስ። 6 እ ደንድድ ፄልያ ዎደ፥ ሄኮ፥ ሹቻ ምሻን ኡከትድ፥ ካፅዳ ኡይꬅነ ኦቶ ሃꬅ እያ ሁጰሶን በእስ። እ ምድ ኡይዳፐ ጉየ ስሚድ ꬍስክስ። 7 ጎዳ ኪታንቾይ ናምአንꬆ ይድ፥ “ኤልያሳ፥ ኔኒ ባና ኦገይ ዳሮ አዱሰ ግድያ ግሾ፥ ደንዳዳ ማ” ያግስ።

8 ኤልያስ ደንድድ ምስ፥ ኡይስ። ሄ እ ምዳ ካꬃ ዎልቃን ፆሳ ዙማ ኮሬባ ጋካናዉ ኦይታሙ ጋላስነ ኦይታሙ ቃማ ሄመትስ። 9 እ ያ ጋክድ፥ ጎንጎሎ ግዶ ገልድ አቅስ።

ጎዳይ፥ “ኤልያሳ፥ ሀይሳን አይ ኦꬃይ?” ግያ ፆሳ ቃላይ እያኮ ይስ።

10 ኤልያስ፥ “ኡባፈ ዎልቃማ ጎዳ ፆሳስ ታኒ ዳሮ ምሸታስ። እስራኤለ አሳይ ኔራ ጫቅዳ ጫቁዋ መንꬅስ፤ ነ ያርሾ በሳ ላልዶሶና፤ ነ ናበታ ማሻን ዎꬍዶሶና። ታኒ ታርካ አታስ፤ ሀእ ኤንቲ ታ ሸምፑዋ ዎꬋናዉ ኮዮሶና” ያግስ።

11 ጎዳይ፥ “ሀይሳፈ ከያዳ ደርያ ሁጰን ታ ስንꬃን ኤቃ” ያግስ። ኤልያስ ኤቅዳሽን፥ ሄኮ፥ ጎዳይ እያ ማታራ አꬍስ። ሄ ዎደ ዎልቃማ ጫርኮይ ዙማ ጳልቀረꬅስ፤ ዛላታ ትንቸረꬅስ፤ ሽን ጎዳይ ሄ ጫርኩዋ ግዶን ባዋ። ጫርኩዋፈ ጉየ ቢት ቃፅስ፤ ሽን ጎዳይ ሄ ቢታ ቃፁዋን ባዋ። 12 ቢታ ቃፁዋፐ ጉየ ታም ከይስ፤ ሽን ጎዳይ ታማ ግዶን ባዋ። ታማፐ ጉየ ካልካሽ ስኤትስ። 13 ኤልያስ ሄ ካልካሻ ስእዳ ዎደ ባ ሶምኡዋ አፍላን ካምድ፥ ካረ ከይድ ጎንጎሉዋ ፐንገን ኤቅስ።

ሄኮ፥ እስ ግርስ ኤልያሳኮ፥ “ኤልያሳ፥ ሀይሳን አይ ኦꬃይ?” ያግስ።

14 ኤልያስ፥ “ኡባፈ ዎልቃማ ጎዳ ፆሳስ ታኒ ምሸታስ። እስራኤለ አሳይ ኔራ ጫቅዳ ጫቁዋ መንꬅዶሶና፤ ነ ያርሾ በሳ ላልዶሶና፤ ነ ናበታ ማሻን ዎꬍዶሶና። ታኒ ታርካ አታስ፤ ኤንቲ ታ ሸምፑዋ ኤካናዉ ኮዮሶና” ያግስ።

15 ጎዳይ እያኮ፥ “ኔኒ ይዳ ኦግያራ ጉየ ስማዳ ዳማስቆ መላ ቢታ ባ። ኔኒ ያ ጋክያ ዎደ አዛሄላ፥ ሶረ ቦላ ካዎ ኦꬃዳ ትያ። 16 ናምሳ ናኣ፥ እዩ እስራኤለ ቦላ ካዎ ኦꬃዳ ትያ። ነ በሳን ናበ ኦꬃዳ አቤል-ማሆላ አድያ ሳፋፃ ናኣ ኤልሳ ትያ። 17 አዛሄላ ማሻፈ ከስ ኤክያ ኡባ እዩይ ዎꬋና፤ እዩ ማሻፈ ከስ ኤክያ ኡባ ኤልስ ዎꬋና። 18 ሽን ባኣለ ኤቃ ጎይኖና ዎይኮ ባንታ ዶናን ባኣለ ኤቃ ዬሮና 7,000 አሳ ታኒ እስራኤለን ታዉ አሻና” ያግስ።

19 ኤልያስ ሄ በሳፈ ደንድድ ብሸ ሳፋፃ ናአይ ኤልስ ታማነ ናምኡ ዋፃ ቦራን ጋደ ጎይሽን ደምስ፤ ኤልስ ታማነ ናምአንꬆ ዋፃን ጎዬስ። ኤልያስ እያ ማታራ አꬍሸ ባ አፍላ እያ ቦላ የግስ። 20 ኤልስ ቦራታ ኤስድ፥ ኤልያሳ ጌዶ ዎፅ ብድ፥ “ታኒ ታ አዋነ ታ አይዉ ዬራ ሳሮꬃዳ ያና፤ ያፐ ስማዳ ነና ካላና” ያግስ።

ኤልያስ፥ “ኤሮ ባ፤ ታ ነና ድግከ” ያግስ።

21 ሄሳ ግሾ፥ ኤልስ ጉየ ስሚድ ዋꬃ ቦራታ ሹክስ፤ ቦራ ሚሽያ ቀርድ አሹዋ ካꬅድ፥ አሳስ አꬅን አሳይ ምዶሶና። ሄሳፈ ጉየ፥ ደንድ ብድ፥ ኤልያሳስ ኪተትስ።