1 ሶረ ካዎይ በን-ሀዳድ ባ ኦላንቾታ ኡባ ሺሽስ። ሀስታማነ ናምኡ ካዎታን፥ ኤንታ ፓራታንነ ፓራ ጋረታን ማደትድ፥ ሳማረ ካታማ ተቅድ፤ እያ ኦልስ። 2 እስራኤለ ካዋ አካባኮ አሰ ኪትድ ሀይሳዳ ያግስ፤ 3 “ነ ብራይነ ነ ዎርቃይ ታባ፤ ነ ማቸትነ ነ ናይታፐ ሎኦት ታባ” ያግስ።

4 እስራኤለ ካዎይ ዛሪድ፥ “ኤ፥ ታ ጎዳዉ ካዋዉ፥ ነ ግዳይሳ መላ፤ ታካ ታዉ ደእያባ ኡባይ ነባ” ያግስ።

5 ቃስካ፥ ኪተትዳ አሳት ናምአንꬆ ብድ፥ “በን-ሀዳድ ሀይሳዳ ያጌስ፤ ‘ነ ብራነ ነ ዎርቃ፥ ነ ማቸታነ ነ ናይታ ታዉ ሼꬋ’ ጋዳ ኪታስ። 6 ሽን ዎንቶ ሀኖደ ነ ካዎ ጋꬉዋነ ነ ሞርናታ ኬꬃ ፕልጋና መላ ታ ኦሳንቾታ የዳና። ኤንቲ ነ ሎኦባ ጋዳ ዎꬅዳባ ኡባ ኤፋና” ያግዶሶና።

7 እስራኤለ ካዎይ ቢታ ጭማታ ኡባ ሺሽድ፥ “ሀ አደይ ኑና ꬋይሳናዉ ኮየይሳ በእተ። እ ታ ማቸታነ ታ ናይታ፥ ታ ብራነ ታ ዎርቃ ኤካናዉ ኪትን፥ ታ እፃብከ” ያግስ።

8 ጭማትነ አሳ ኡባይ፥ “እ ኦድያባ ስኦፓ! ዎይኮ እያዉ ኤሮ ጎፓ” ያግዶሶና።

9 ሄሳ ግሾ፥ አካብ በን-ሀዳድ ኪትዳ አሳታኮ፥ “ህንተ ታ ጎዳ ካዋ፥ ‘ኔኒ ኮይሮ ኪትዳ ኪታ ታ ፖላና፤ ሽን ሀ ናምአንꬆ ኪታ ፖላናዉ ዳንዳእከ’ ያጌስ ግድ ኦድተ” ያግስ።

ኪተትዳ አሳት ብድ ሄሳ በን-ሀዳዳስ ኦድዶሶና። 10 በን-ሀዳድ፥ “ታና ካልያ አሳስ ሳማረ ካታማን እስ ኩጫ ቢት ጋክኮ ፆሳት ታና ፕርዶ” ያግስ።

11 እስራኤለ ካዎይ ኪተትድ ይዳይሳታኮ፥ “ ‘ቱማ ኦላንቾይ ኦላፐ ስምሸ ጋይረስፐ አትሽን፥ ቡሮ ብሸ ጋይረና’ ያግድ ኦድተ” ያግስ።

12 በን-ሀዳድነ ካዎት፥ ባንታ ዱንካንያ ግዶን ኡሹ ኡይሸ ሄሳ ስእዳ ዎደ ካዎይ ባ ኦላንቾታኮ፥ “ኦላናዉ ሳልፕተ” ያግድ ኪትን፥ ኤንቲ ካታማ ኦላናዉ ሳልፕዶሶና።

13 ሄኮ፥ እስ ናበይ እስራኤለ ካዋ አካባኮ፥ “ጎዳይ ‘ሀ ዳሮ ኦላንቾታ ኡባ በአ? ታኒ ሀች ኤንታ ነ ኩሸን አꬃዳ እማና፤ ታ ጎዳ ግደይሳ ኔኒ ሄ ዎደ ኤራና’ ያጌስ” ያግስ።

14 አካብ፥ “ኦላ ዶማናይ ኦኔ?” ያግስ።

ናበይ፥ “አዉራጃ ሃረይሳት ኪትያ ናአተꬃ ኦላንቾት ዶሞ” ያግስ።

ካዎይ፥ “አትያ ኦላንቾታ ኦን ኪታኔ?” ያግስ።

ናበይ፥ “ኔኒ ኪታ” ያግስ።

15 ሄሳ ግሾ፥ አካብ አዉራጃ ሃረይሳት ኪትያ ናአተꬃ ኦላንቾታ፥ 232 ሺሽስ። ቃስ 7,000 አትዳ እስራኤለ አሳ ሺሽስ።

16 በን-ሀዳድ ባና ማድዳ ሀስታማነ ናምኡ ካዎታራ እስፈ ዱንካንያን ኡትድ ኡሻን ማꬆትዳሽን፥ ሴታ ጋላስ እስራኤለ ኦላንቾት ኦላስ ከይዶሶና። 17 አዉራጃ ሃረይሳት ኪትያ ናአተꬃ ኦላንቾት ኮይሮ ከይድ ብዶሶና።

በን-ሀዳድ ፆሞሳና መላ ኪትዳ አሳት፥ “ሳማረፐ አሳይ ከይድ ዩሳ ቦላ ደኤስ” ያግድ ኦድስ።

18 በን-ሀዳድ፥ “ኤንቲ ስገታናዉ ይን፥ ዎይኮ ኦለታናዉ ይን፥ ኤንታ ፓፃ ኦይክተ” ያግስ።

19 አዉራጃ ሃረይሳት ኪትያ ናአተꬃ ኦላንቾት ሳልፕድ፥ ካታማፐ ጋፃ ከይዶሶና፤ እስራኤለ ኦላንቾት ኤንታ ካልድ ከይዶሶና። 20 እሶይ እሶይ ባራ ኦላ ጋሄትዳ ሞርክያ ዎꬍዶሶና። ሶረ አሳይ ባቃትን፥ እስራኤለ አሳት ካልድ የደꬅዶሶና። ቃስ ሶረ ካዎይ በን-ሀዳድ ባ ፓራ አሳታራ ባ ፓራን ከስ ኤክድ ብስ። 21 እስራኤለ ካዎይ ኦላስ ከይድ፥ ፓራታነ ፓራ ጋረታ ድእስ፤ ሶረ አሳካ ዎꬎ ቡꬅስ።

22 ሄሳፈ ጉየ፥ ናበይ እስራኤለ ካዋኮ ብድ፥ “ባዳ ነና ምንꬃ። ኦꬃናዉ በሲያባ አኬካዳ ኦꬃ። ዎንቶ ላይꬅ ቦነ ሶረ ካዎይ ነና ናምአንꬆ ኦላናዉ ያና” ያግስ።

23 ሶረ ካዋ ሞርናት እያ ሀይሳዳ ያግድ ዞርዶሶና፤ “ኤንታ ፆሳት ደረ ፆሳታ፤ ኤንቲ ኑና ፆንዳይ ሄሳ ግሾሳ። ሽን ኑ ኤንታራ ደንባን ኦለትያኮ ቱማ ኑ ኤንታ ፆናና። 24 ኔኒ እስባ ኦꬃ፤ ሀስታማነ ናምኡ ካዎታ ኪትያ ሀላቃተꬃፈ ደንꬃዳ ኤንታ በሳን ሀራ ሀላቃታ ሹማ። 25 ኑኒ እስራኤለታራ ደንባን ኦለትድ ፆናናዉ ዳንዳአና መላ ነዉ ካሰ ዉርዳ ኦላንቾታ በሳን ኦላንቾታ፥ ፓራታ በሳን ፓራታ፥ ፓራ ጋረታ በሳን ፓራ ጋረታ ዎꬃዳ ጊግሳ” ያግዶሶና። ካዎይ በን-ሀዳድ ኤንታ ዞርያ ኤክድ ሄሳዳ ኦꬅስ።

26 ካልያ ላይꬅ ቦነ በን-ሀዳድ ሶረ ኦላንቾታ ሺሽድ፥ እስራኤለታራ ኦለታናዉ አፌቃ ብስ። 27 እስራኤለ ኦላንቾት ሺቅድ፥ ሽንቀነ ኦላ ሚሸ ኤክድ፥ ኤንታራ ኦለታናዉ ናምኡ ጩጋ ግድድ ከይዶሶና። እስራኤለት ናምኡ ጉꬃ ዴሻ ዉደ ዳንድ፥ ኤንታኮ ስሚድ ኡትዶሶና፤ ሽን ሶረት ጋፃርያ ኡባ ማእዶሶና።

28 እስ ፆሳ ናበይ እስራኤለ ካዋኮ ብድ፥ “ጎዳይ ሀይሳዳ ያጌስ፤ ‘ሶረ አሳይ፥ ፆሳይ ደረ ፆሰፈ አትሽን፥ ደምባ ፆሲ ግደና ያግዳ ግሾ፥ ሀ ዳሮ ኦላንቾታ ታኒ ነ ኩሸን አꬃዳ እማና። ሄ ዎደ ታኒ ጎዳ ግደይሳ ኔንነ ነ አሳይ ኤራና’ ” ያግስ።

29 ሶረትነ እስራኤለት ዎልኮ ስም ሳልፕድ፥ ላፑን ጋላስ ታክዶሶና። ላፑንꬃ ጋላሳን ኦላ ጋሄትዶሶና። እስራኤለት እስ ጋላሳን ሶረ አሳፐ 100,000 ቶሆ አሳ ዎꬍዶሶና። 30 ኤንታፈ አትዳይሳት ከስ ኤክድ፥ አፌቃ ካታማ ገልዶሶና። ገልዳይሳታፐ 27,000 አሳ ቦላ ካታማ ድርሳ ግምበይ ኩንድድ ዎꬍስ።

በን-ሀዳድ ካታማ ግዶ ባቃትድ፥ እስ ኬꬃ ቆልአን ቆሰትስ። 31 እያ ሞርናት፥ “ሄኮ፥ እስራኤለ ካዎት፥ ማርያ ካዎታ ግደይሳ ኑ ስእዳ። ኑኒ ካዮ ማኦ ማእድ፥ ኑ ፄሳን ዎዶሮ ዳንጭድ፥ እስራኤለ ካዋኮ ቦስ፤ ኦን ኤር፥ እ ነና ፓፃ አሾና አገና” ያግዶሶና። 32 ኤንቲ ካዮ ማኦ ማእድ፥ ዎዶሮ ባንታ ፄሳን ዳንጭድ፥ እስራኤለ ካዋኮ ብዶሶና። እያኮ “ነ አይለይ በንሀዳድ፥ ታና ዎꬎፓ ያግድ ዎሴስ” ያግዶሶና።

ካዎይ፥ “እ ሀኖ ጋካናዉ ፓፃ ደኢ? እ ታ እሻ” ያግስ።

33 አካብ ሎኦ ማላ ሃሳያ ዳንን፥ አሳት እያ ኦዳ ኤለስ ኤክድ፥ “ኤ፥ ነ እሻይ በንሀዳድ ፓፃ ደኤስ” ያግዶሶና።

እ ኤንታኮ፥ “ብድ እያ ሃ ኤክድ ዪተ” ያግስ። በንሀዳድ ይን፥ አካብ እያ ባ ፓራ ጋርያ ቦላ ከስድ ኡትስስ።

34 በንሀዳድ አካባኮ፥ “ታ አዋይ ነ አዋፐ ኤክዳ ካታማታ ታ ነዉ ዛራና። ታ አዋይ ሳማረን ግያ ኤስዳይሳዳ ነካ ዳማስቆን ግያ ኤሳ” ያግስ።

አካብ ዛሪድ፥ “ታኒ ሀ ጫቁዋ ጋሶያዳ ነና የዳና” ያግስ። እያራ ጫቅድ እያ የድስ።

35 ናበታ ጩጋፐ እስ አደይ፥ ጎዳይ ኪትን፥ እስ ባ ላገ ናብያኮ፥ “ታና ሾጫ” ያግስ፤ ሽን ሄ ናበይ ሾጮና እፅስ። 36 ሄ ናበይ እያኮ፥ “ኔኒ ጎዳ ኪታ እፅዳ ግሾ፥ ሄኮ፥ ነ ታፐ ሻከታዳ ብያ ዎደ ነና ጋሞይ ዎꬋና” ያግስ። ናበይ እያፐ ሻከትድ ብያ ዎደ ጋሞይ ከይድ እያ ዎꬍስ።

37 ናበይ ሀራ እስ አደ ደምድ፥ “ታና ሾጫ” ያግስ። አደይ እያ ሾጭን፥ ናበይ ማዱንፅስ።

38 ናበይ እያ ኦናተꬃይ ኤረቶና መላ ጉሉንትድ ካዋ ናግሸ ኦገ ዶናን ኤቅስ። 39 ካዎይ አꬍያ ዎደ፥ ናበይ ካዋ ፄግድ፥ “ታኒ ነ አይለይ ኦላን ደእሽን፥ ሄኮ፥ እስ አደይ ታኮ ይድ፥ ‘ሀ ድኤትዳ አድያ ናጋ። ሀ አደይ ꬋይያባ ግድኮ፥ ነ ሸምፖይ እያ ሸምፑዋራ ጋደ ዎይኮ 3,000 ብራ ሳንትመ ቃንፃሳ’ ያግስ። 40 ታኒ ነ አይለይ ኦሶይ ዳርን፥ ያ ሃ ግሽን፥ አደይ ከስ ኤክድ ꬋይስ” ያግስ።

እስራኤለ ካዎይ፥ “ኔኒ ነ ቦላ ፕርዳዳሳ” ያግስ።

41 ናበይ ባ ጉሉንꬃ ቃር የግያ ዎደ ናበታፐ እሱዋ ግደይሳ ካዎይ ኤርስ። 42 ናበይ ካዋኮ፥ “ጎዳይ፥ ‘ታኒ፥ እ ሀይቃናዉ በሴስ ያግዳ አድያ ነ የድዳ ግሾ፥ ነ ሸምፖይ እያ ሸምፑዋ በሳን፥ ነ አሳይ እያ አሳ በሳን ግዳና’ ” ያግስ። 43 እስራኤለ ካዎይ ይሎትሸነ አዛንሸ ሳማረን ደእያ ባ ጋꬎ ስምስ።