22
አካባነ ዎርዳንቾ ናበታ
(2 ታር 18:2-27)
1 ሶረይነ እስራኤለይ ኦለቶና ሄꬑ ላይꬅ ሳሮ ደእዶሶና። 2 ሄꬓንꬆ ላይꬃን፥ ይሁዳ ካዎይ እዮሳፈፅ እስራኤለ ካዋ በአናዉ ብስ። 3 እስራኤለ ካዎይ ባ ሞርናታኮ፥ “ጋላዳን ደእያ ራሞታ ካታማይ ኑባ ግደይሳነ ኑኒ ሀኖ ጋካናዉ ሄ ካታማ ሶረ ካዉዋፐ ኤካናዉ አይኮካ ኦꬆናይሳ ኤረከቲ?” ያግስ። 4 እ፥ እዮሳፈፃ፥ “ጋላዳን ደእያ ራሞታ ካታማ ኦላናዉ ታራ ባኔ?” ያግድ ኦይችስ።
እዮሳፈፅ ዛሪድ፥ “ኤ፥ ኔኒ ኦላ ባናዉ ጊግያ ዎደ ታ ኔራ ባና። ታ ኦላንቾት ነ ኦላንቾታ፤ ታ ፓራት ነ ፓራታ” ያግስ። 5 ቃስ፥ እዮሳፈፅ እስራኤለ ካዋ፥ “ግዶሽን፥ ስንꬃታዳ ጎዳ ኦይቻ” ያግስ።
6 እስራኤለ ካዎይ ኦይዱ ፄቱ ናበታ እስፈ ሺሽድ፥ “ጋላዳን ደእያ ራሞታ ካታማ ኦላናዉ ቦየ ቦፖ” ያግድ ኦይችስ።
ኤንቲ፥ “ባ፤ ጎዳይ ሄ ካታማ ካዋ ኩሸን አꬅድ እማና” ያግዶሶና።
7 ሽን እዮሳፈፅ፥ “ኑኒ ጎዳ ኦይቻናዉ ዳንዳእያ ሀራ ናበይ ሀይሳን ባዌ?” ያግስ።
8 እስራኤለ ካዎይ ዛሪድ፥ “ኑኒ እያ ባጋራ ጎዳ ኦይቻናዉ ዳንዳእያ እስ አደይ ደኤስ። እ፥ ይምላ ናኣ ምክያሳ። ሽን እ ኡባ ዎደ ታባ ኢታባፐ አትሽን፥ ሎኦባ ኦዶና ግሾ ታ እያ እፃይስ።”
እዮሳፈፅ፥ “ካዎይ ሄሳ ጎፖ!” ያግስ።
9 ሄሳ ግሾ፥ እስራኤለ ካዎይ ባ ሞርናታፐ እሱዋ ፄግድ፥ “ይምላ ናኣ ምክያሳ ኤለ ኤካዳ ያ” ያግስ።
10 እስራኤለ ካዎይነ ይሁዳ ካዎይ እዮሳፈፅ ባንታ ካዎተꬃ ማኡዋ ማእድ፥ ሳማረ ካታማ ገልያ ፐንግያ ማታን ደእያ ዉዱማን ባንታ ካዎተꬃ አራታን ኡትዶሶና፤ ናበት ኡባይ ኤንታ ስንꬃን ትንብተ ኦዶሶና። 11 ኤንታፈ እሶይ፥ ካናነ ናአይ ሰደቅያስ ብራታ ካጨታ ጊግስድ፥ “ጎዳይ ሀይሳዳ ያጌስ፤ ‘ሶረት ꬋያና ጋካናዉ ነ ኤንታ ሀ ካጨታን ቃይጫና’ ” ያግስ። 12 ሀራ ናበት ኡባይ፥ “ጋላዳን ደእያ ራሞታ ካታማ ባዳ ኦላ፤ ፆና። ጎዳይ ሄ ካታማ፥ ካዋ ኩሸን አꬅድ እማና” ያግድ ኦድዶሶና።
13 ምክያሳ ፄጋናዉ ኪተትድ ብዳ አደይ፥ “ሄኮ፥ ናበት ኡባይ እስ ዶና ግድድ፥ ‘ካዎይ ሀ ኦላ ፆናና’ ያግድ ኦድዶሶና። ሄሳ ግሾ፥ ሀያና ነ ኦዳይካ ኤንታይሳ መላ ግዶ፤ ነ ሎኦባ ኦዳ” ያግስ።
14 ሽን ምክያስ፥ “ጎዳይ ኤርያ መላ፥ ጎዳይ ታዉ ኦድያባ ታ ኦዳና” ያግስ።
15 ምክያስ ካዋኮ ይዳ ዎደ፥ ካዎይ፥ “ምክያሳ፥ ኑ ጋላዳን ደእያ ራሞታ ካታማ ኦላናዉ ቢኖ ቦፖ” ያግድ ኦይችስ።
ምክያስ፥ “ባዳ ኦላ፤ ነ ፆናና። ጎዳይ ሄ ካታማ ካዋ ኩሸን አꬅድ እማና” ያግስ።
16 ካዎይ፥ “ነ ጎዳ ሱንꬃን ታዉ ቱማ ኦዳና መላ ታ ነና አፑን ቶሆ ጫቀꬆ?” ያግስ።
17 ምክያስ፥ “እስራኤለ ኦላንቾት ኡባይ ሄንꬃንቾይ ባይና ዶርሳዳ ደርያ ቦላ ላለትዳይሳ ታ በአስ። ጎዳይ፥ ‘ሀይሳታስ ጎድ ባዋ። ኤንቲ ኡባይ ባንታ ሶ ሶ ሳሮ ቦ’ ” ያግስ።
18 እስራኤለ ካዎይ እዮሳፈፃኮ፥ “እ ታባ ኢታባ ኦዴስፐ አትሽን፥ ሎኦባ ኦድ ኤረና ጋዳ፥ ታ ነዉ ኦዳብክና?” ያግስ።
19 ምክያስ ጉጅድ፥ “ህዛ ጎዳይ ግያባ ስአ! ጎዳይ ባ አራታን ኡትን፥ ሳሎ ኪታንቾት ኡባይ እያ ኡሻቻንነ ሀድርሳን ኤቅዳሽን በአስ። 20 ጎዳይ፥ ‘አካብ ጋላዳን ደእያ ራሞታ ካታማ ብድ፥ ያን ሀይቃና መላ ባለꬃናይ ኦኔ?’ ያግስ። እሶይ ሀይሳዳ ግያ ዎደ ሀንኮይ ቃስ ሄሳዳ ጌስ። 21 ዉርሰꬃን እስ አያን ከይድ ጎዳ ስንꬃን ኤቅድ፥ ‘ታ እያ ባለꬃና’ ” ያግስ።
22 ጎዳይ፥ “ነ ዋታ ባለꬃኔ?” ያግስ።
አያናይ፥ “ታ ባዳ፥ እያ ናበታ ኡባ ዶናን ዎርዶ አያና ግዳና” ያግስ።
ጎዳይ፥ “ነ እያ ባለꬃና፤ ነዉ ሄስ ሀናና። ባዳ ባለꬃ” ያግስ።
23 ምክያስ ጉጅድካ፥ “ሄኮ፥ ጎዳይ ነ ቦላ ꬋዮ ኤሀናዉ ቃችዳ ግሾ ነ ናበታ ኡባ ዶናን ዎርዶ አያና ዎꬅስ” ያግስ።
24 ሄሳፈ ጉየ፥ ከናና ናአይ ሰደቅያስ ሺቅድ፥ ምክያሳ ባቅድ፥ “ጎዳ አያናይ ታና አግድ ዋንድ ነዉ ኦዳናዉ ብዴ?” ያግስ።
25 ምክያስ፥ “ሄኮ፥ ኔኒ ቆሰታናዉ ቆልአ ገልያ ጋላስ ሄሳ ደማና” ያግስ።
26 እስራኤለ ካዎይ ባ ኦላንቾታፐ እሱዋ፥ “ምክያሳ ኦይካዳ ካታማ ሃርያ አሞነስነ ታ ናኣ እዮኣሳስ ኤፋዳ እማ። 27 ካዎይ ስማና ጋካናዉ ሀ አድያ ቃሾ ኬꬃን ዎꬅተ። ታኒ ሳሮ ስማና ጋካናዉ፥ ጉꬃ ኡይꬃፈነ ሃꬃፈ ሀራባ አይኮካ እያዉ እሞፕተ” ያግስ።
28 ምክያስ፥ “ቱማ ነ ሳሮ ስምያባ ግድኮ፥ ጎዳይ ታዉ ኦድቤና” ያግስ። ቃስካ፥ ምክያስ፥ “አሳ ኡባይ ታ ኦድዳይሳ አኬክተ” ያግስ።
አካባ ሀይቁዋ
(2 ታር 18:28-34)
29 ሄሳፈ ጉየ፥ እስራኤለ ካዎይነ ይሁዳ ካዎይ እዮሳፈፅ ጋላዳን ደእያ ራሞታ ካታማ ብዶሶና። 30 እስራኤለ ካዎይ እዮሳፈፅ፥ “ታ ማኡዋ ላማዳ፥ ሀራ አስ ዳናዳ ኦላ ገላና፤ ሽን ኔኒ ነ ካዎ ማኡዋ ማአ” ያግስ። እስራኤለ ካዎይ ማኡዋ ላምድ፥ ሀራ አስ ዳንድ ኦላ ገልስ።
31 ሶረ ካዎይ ባ ፓራ ጋረታ ኪትያ ሀስታማነ ናምኡ አሳታኮ፥ “ካዋ ፃላል አትሽን፥ ሀራ ኦደራካ ኦለቶፍተ” ያግድ ኪትስ።
32 ፓራ ጋርያ ኪተይሳት እዮሳፈፃ በእዳ ዎደ፥ “ቱማ ሀይስ እስራኤለ ካዋ” ያግዶሶና። እያራ ኦለታናዉ ስምን እዮሳፈፅ ዋስስ። 33 ፓራ ጋረታ ኪተይሳት፥ እ እስራኤለ ካዋ ግዶናይሳ በእድ፥ እያ የደይሳ አጋግዶሶና።
34 ግዶሽን፥ እስ አደይ ጮ ባ ዶንግያ ዱክድ፥ እስራኤለ ካዋ ኦላ ማኦይ ጋሄትያ በሳራ ጫድን፥ እስራኤለ ካዎይ ባ ጋርያ ላግያ አድያኮ፥ “ጋርያ ጉየ ዛራዳ፥ ታና ኦላ ግዶፈ ከሳ፤ ታኒ ኢታ ጫቸ ጫደታስ” ያግስ። 35 ሄ ጋላስ ኦላይ ጎብያ ዎደ፥ እስራኤለ ካዎይ አካብ ባ ፓራ ጋርያ ግዶን ዘምፕድ፥ ሶረታ ስንꬃን ታክስ። እያ ሱꬃይ ፓራ ጋርያ ግዶ ጉክን፥ እ ኦማርስ ሀይቅስ።
36 አዋይ ዉላናዉ ማትሽን፥ “አሳ ኡባይ ባ ካታማ ካታማ ቦ! አሳ ኡባይ ባ ቢታ ቢታ ቦ!” ግያ ኪት ስኤትስ።
37 ኤንቲ ካዋ ሳማረ ካታማ ኤፍድ ያን ሞግዶሶና። 38 ላይማ ማጫሳት ሜጨትያ፥ ተቀትድ ኡትዳ ሳማረ ሃꬃን ጋርያ ሜጭዶሶና። ጎዳይ ካሰ ኦድዳ ቃላዳ እያ ሱꬃ ካናት ላጭዶሶና።
39 አካብ ሀንዳ ሀራባይ፥ እ ኦꬅዳባ ኡባይ፥ ዳንጋርሳ ዛለን ካዎ ጋꬎ ኬፅዳባነ ግምብዳ ካታማታባይ ኡባይ እስራኤለ ካዎታ ታርከ ማፃፋን ፃፈትስ። 40 አካብ ሀይቅድ ባ ማይዛታን ጋሄትስ፤ እያ በሳን እያ ናአይ አካዝያስ ካዎትስ።
ይሁዳ ካዋ እዮሳፈፃ
(2 ታር 20:31—21:1)
41 እስራኤለ ካዎይ አካብ ካዎትዳ ኦይዳንꬆ ላይꬃን አሳ ናአይ እዮሳፈፅ ይሁዳን ካዎትስ። 42 እ ካዎትያ ዎደ ላይꬅ እያዉ ሀስታማነ እቻሻ፤ እ የሩሳላመን ላታማነ እቻሹ ላይꬅ ካዎትስ። እያ አይያ ሽልሀ ናእዉ አዙቦ። 43 እዮሳፈፅ ባ አዋ አሳ ኦግያን ሄመትስ፤ እ ሄ ኦግያፐ ገደ ሃ ግቤና፤ ጎዳ ስንꬃን ሱረባ ኦꬅስ። ግዶሽን፥ ꬎቃ ጎይኖ በሳታ ꬋይስቤና፤ አሳይ ሄ በሳን ያርሾነ እፃነ ጩይሰꬅ አግቤና። 44 እዮሳፈፅ እስራኤለ ካዉዋራ ስገትስ።
45 እዮሳፈፅ ሀንዳ ሀራባይ፥ እያ ምኖተꬃይነ እ ኦለትዳ ኦላይ ይሁዳ ካዎታ ታርከ ማፃፋን ፃፈትስ። 46 እያ አዋይ አስ ካዎትዳ ዎድያፐ ዶምን፥ አትዳ አደራ አደራ ላይማተይሳታ ቢታፈ ድግስ።
47 ሄ ዎደ ኤዶመ ቢታን ካዎይ ባዋ፤ ሄ ቢታን ሹመትዳ ሀላቅ ሃርስ።
48 ኦፍራ ቢታፈ ዎርቃ ኤሀና መላ እዮሳፈፅ ግታ ማርካበታ ኦስስስ፤ ሽን ሄ ማርካበት ኤፅዮን-ጋብራን መቀረትዶሶናፐ አትሽን፥ ኩምꬅ ብቦኮና። 49 ሄ ዎደ አካባ ናአይ አካዝያስ፥ “ታ ኦሳንቾት ነ ኦሳንቾታራ እስፈ ማርካብያን ቦ” ያግስ፤ ሽን እዮሳፈፅ እፅስ።
50 እዮሳፈፅ ሀይቅድ ባ ማይዛታን ጋሄትስ። ባ ማይዛ ዳዊታ ካታማን ሞገትስ። እያ በሳን እያ ናአይ እዮራም ካዎትስ።
እስራኤለ ካዋ አካዝያሳ
51 ይሁዳ ካዎይ እዮሳፈፅ ካዎትዳ ታማነ ላፑንꬆ ላይꬃን፥ አካባ ናአይ አካዝያስ እስራኤለ ቦላ ሳማረን ካዎትስ፤ እስራኤለ ቦላ ናምኡ ላይꬅ ካዎትስ። 52 አካዝያስ ጎዳ ስንꬃን ኢታባ ኦꬅስ፤ ባ አዋነ ባ አየ ኦግያንነ እስራኤለ አሳ ናጋራ ኦስስዳ፥ ናባፃ ናኣ እዮርባማ ኦግያን ሄመትስ። 53 አካዝያስ ባኣለ ኤቃስ ኦꬅስ፤ እያ ጎይንስ። እያ አዋይ ካሰ ኦꬅዳይሳዳ፥ ጎዳ እስራኤለ ፆሳ ሀንቀꬅስ።