1 አካብ ሀይቅዳፐ ጉየ፥ ሞአበ አሳይ እስራኤለ ቦላ ደንድዶሶና።

2 ሄ ዎደ ካዎይ አካዝያስ ሳማረ ካታማ ቦላ ደእያ ፖቅያ ባራንዳፈ ኩንድድ ደሸትስ። ሄሳ ግሾ አሳታኮ፥ “ብድ፥ ታኒ ሀ ሀርግያፈ ፓፃነኮ ፓፆናኮ ኤቅሮና ፆሳ ብኤል-ዘቡላ አነ ኦይችተ” ያግድ ኪትስ።

3 ሽን ጎዳ ኪታንቾይ ተስባ አድያ ኤልያሳ ሀይሳዳ ያግስ፤ “ፑደ ባዳ፥ ሳማረ ካዎይ ኪትዳ አሳታራ ጋሄታዳ፥ ‘ህንተ ኤቅሮና ፆሳ ብኤል-ዘቡላ ኦይቻናዉ ብዳይ፥ እስራኤለን ፆሲ ꬋይነዬ?’ 4 ጎዳይ ሀይሳዳ ያጌስ፤ ‘ካዋዉ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ” ያጋ። ሄሳ ግሾ፥ ኤልያስ ብድ ኤንታዉ ኦድስ።

5 ኪተትዳ አሳት ካዋኮ ጉየ ስምን፥ “አይስ ስምደቲ?” ያግድ ኤንታ ኦይችስ።

6 ኤንቲ፥ “እስ አደይ ኑራ ጋሄታናዉ ይድ፥ ህንተና ኪትዳ ካዋኮ ስሚድ፥ ሀይሳዳ ያግድ ኦድተ። ጎዳይ ኔኮ፥ ‘ኤቅሮና ፆሳ ብኤል-ዘቡላ ኦይቻናዉ ኔኒ አሰ ኪተይ፥ እስራኤለን ፆሲ ꬋይነዬ? ሄሳ ግሾ፥ ኔኒ ሀይቃናፐ አትሽን፥ ሀ ዝንእዳ ሂፃፐ ደንዳካ’ ያጌስ” ያግዶሶና።

7 ካዎይ፥ “ህንተራ ጋሄታናዉ ይድ፥ ሀይሳ ህንተዉ ኦድዳ አደይ አይ መላ አሴ?” ያግድ ኦይችስ።

8 ኤንቲ፥ “እክሰፐ ኦሰትዳ ማኦ ማእድ፥ ባ ፄሳን ዳፎ ዳንጬስ” ያግድ ዛርዶሶና።

ካዎይ፥ “ሄስ ተስባ አድያ ኤልያሳ” ያግስ።

9 ሄሳፈ ጉየ፥ ካዎይ እስ ቶራ ሞጮና እሻታሙ ዎታዳረታራ ኪትስ። ቶራ ሞጭናይ ደረ ሁጰን ኡትዳ ኤልያሳኮ ከይድ፥ “ፆሳ አሶ፥ ካዎይ ነና፥ ዱገ ዎꬋዳ ሃያ” ያጌስ።

10 ሽን ኤልያስ ቶራ ሞጮናኮ፥ “ታኒ ፆሳ አስ ግድኮ፥ ታም ሳሎፐ ዎꬍድ፥ ነናነ ነ ዎታዳረታ ሞ” ያግድ ዛርስ። ታም ሳሎፐ ዎꬍድ፥ እያነ እያ ዎታዳረታ ምስ።

11 ካዎይ ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ፥ “ፆሳ አሶ፥ ካዎይ ነና ዱገ ዎꬋዳ ሃያ” ያጌስ።

12 ኤልያስ፥ “ታኒ ፆሳ አስ ግድኮ፥ ታም ሳሎፐ ዎꬍድ፥ ነናነ ነ ዎታዳረታ ሞ” ያግስ። ፆሳ ታም ሳሎፐ ዎꬍድ፥ እያነ እያ ዎታዳረታ ምስ።

13 ካዎይ ሄꬓንꬆ ሀራ ቶራ ሞጮና እሻታሙ ዎታዳረታራ ኤልያሳኮ ኪትስ። ቶራ ሞጮናይ ኤልያሳኮ ብድ፥ እያ ስንꬃን ጉልባትድ፥ “ፆሳ አሶ፥ ሀያና ታውነ ታራ ደእያ አሳስ ቃታ፤ ኑ ሸምፑዋ ሀይቆፐ አሻ። 14 ሄኮ፥ ታም ሳሎፐ ዎꬍድ፥ ካሰ ናምኡ ቶራ ሞጮናታነ ኤንታ ዎታዳረታ ምስ። ሽን ሀእ ታዉ ቃታ!” ያግድ ዎስስ።

15 ጎዳ ኪታንቾይ ኤልያሳኮ፥ “ያዮፋ! እያራ ዱገ ዎꬋ” ያግስ።

ኤልያስ ደንድድ፥ እያራ ካዋኮ ዱገ ብስ። 16 “ጎዳይ ሀይሳዳ ያጌስ፤ ‘እስራኤለን ፆሲ ꬋይነ፥ ኔኒ ኤቅሮና ፆሳ ብኤል-ዘቡላ ኦይቻናዉ አሰ ኪትዳይ? ኔኒ ሀይሳ ኦꬅዳ ግሾ፥ ሀይቃና! ነ ዝንእዳ ሂፃፐ ደንዳካ’ ” ያጌስ።

17 ኤልያስ ኦድዳ ፆሳ ቃላዳ አካዝያስ ሀይቅስ፤ አካዝያሳስ አደ ናእ ባይና ግሾ፥ እያ እሻይ እዮራም እያ በሳን ካዎትስ። ሄስ ሀንዳይ እዮሳፈፃ ናአይ እዮራም ይሁዳን ካዎትዳ ናምአንꬆ ላይꬃና። 18 አካዝያስ ኦꬅዳ ሀራባ ኡባይ እስራኤለ ካዎታ ታርከ ማፃፋን ፃፈትድ ደኤስ።