1 ጎዳይ ኤልያሳ ጎተን ሳሎ ኤፋናዉ ሀንያ ዎደ፥ ኤልያስነ ኤልስ ጋልጋላፐ ደንድድ ብዶሶና። 2 ኤልያስ ኤልሳኮ፥ “ጎዳይ ታና ቤተለ ኪትዳ ግሾ፥ ሀያና ኔኒ ሀይሳን ጋምኣሻ” ያግስ።

ሽን ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግስ። ኤንቲ ዱገ ቤተለ ዎꬍዶሶና።

3 ቤተለን ደእያ ናበታ ጩጋይ ኤልሳኮ ከይድ፥ “ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?” ያግድ ኦይችዶሶና።

ኤልስ፥ “ኤ ኤራይስ፤ ሽን ህንተ ስእ ጊተ” ያግድ ዛርስ።

4 ኤልያስ ኤልሳኮ፥ “ጎዳይ ታና እያርኮ ኪትዳ ግሾ፥ ሀያና ኔኒ ሀይሳን ጋምኣሻ” ያግስ።

ሽን ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግድ ዛርስ። ሄሳ ግሾ፥ ኤንቲ እያርኮ ብዶሶና።

5 እያርኮን ደእያ ናበታ ጩጋይ ኤልሳኮ ከይድ፥ “ጎዳይ ሀች ነ ጎዳ ኔፐ ሻክድ ኤፋና ሀነይሳ ኤራይ?” ያግድ ኦይችዶሶና።

እ፥ “ኤ ኤራይስ፤ ሽን ህንተ ስእ ጊተ” ያግድ ዛርስ።

6 ኤልያስ ኤልሳኮ፥ “ጎዳይ ታና ዮርዳኖሰ ሻፋ ኪትዳ ግሾ፥ ሀያና ኔኒ ሀይሳን ጋምኣሻ” ያግስ።

ኤልስ፥ “ጎዳይ ኤርያ መላ፥ ነ ሸምፖይ ኤሮ! ታኒ ኔፐ ሻከትከ” ያግስ። ኤንቲ ናምአይ እስፈ ብዶሶና።

7 ናበታፐ እሻታሙ አሳት ኤንታ ካልድ፥ ዮርዳኖሰ ሻፋ ጋካናዉ ብዶሶና። ኤልያስነ ኤልስ ሻፋ ዶናን ኤቅዳሽን፥ ናበት ኤንታፈ ጉꬁ ሃክድ ኤቅዶሶና። 8 ሄ ዎደ ኤልያስ ባ አፍላ ኤክድ ፃፅድ፥ እያራ ሃꬃ ሾጭን፥ ሃꬃይ ያነ ሃነ ሻከትን መላ ቢታራ ፕንዶሶና። 9 ኤልያስ ኤልሳኮ፥ “ታኒ ኔፐ ኤከታናፐ ስን፥ ነዉ አይ ኦꬃና መላ ኮያይ?” ያግስ።

ኤልስ፥ “ነ አያናይ ታ ቦላ ናምኡ ኩሸ ግዳና መላ፥ ታኒ ነና ዎሳይስ” ያግድ ዛርስ።

10 ኤልያስ፥ “ኔኒ ዋይስያ ኦይሾ ኦይቻዳሳ። ሽን ታኒ ኔፐ ኤከትያ ዎደ ኔኒ ታና ፄልያባ ግድኮ፥ ሄስ ነዉ ሀናና። ነ በኦና እፅኮ ሀነና” ያግስ።

11 ኤንቲ እስፈ ኦደትሸ ሄመትሽን፥ ታማ ፓራትነ ታማ ጋረት ኤንታ ናምኣፈ ግዶን ገልድ፥ ሻክስ። ኤልያስ ጎተን ሳሎ ከይስ። 12 ኤልስ ሄሳ በእድ፥ “ታ አዋዉ፥ ታ አዋዉ! እስራኤለ ፓራቶነ ፓራ ጋረቶ!” ያግድ ዋስስ። ሄሳፈ ስምን፥ እ ኤልያሳ ዛሪድ በእቤና።

ኤልስ አዛንድ፥ ባ ማኡዋ ናምአ ከስድ፥ ዳክስ። 13 ኤልያሳፐ ዎꬍዳ ማኡዋ ደንꬅድ፥ ጉየ ስሚድ፥ ዮርዳኖሰ ሻፋ ዶናን ኤቅስ። 14 ኤልያሳፐ ዎꬍዳ ማኡዋ ኤክድ፥ እያራ ሃꬃ ሾጭድ፥ “ጎዳይ ኤልያሳ ፆሳይ አዉን ደኢ?” ያግስ። ኤልስ ሃꬃ ሾጭዳ ዎደ፥ ሃꬃይ ያነ ሃነ ሻከትን፥ ሻፋ ፕንስ።

15 እያርኮ ይዳ ናበታ ጩጋይ ኤልሳ በእዳ ዎደ፥ “ኤልያሳ አያናይ ኤልሳ ቦላ ሸምፕስ” ያግዶሶና። ኤንቲ እያራ ጋሄታናዉ ይድ፥ እያ ስንꬃን ጉፋንዶሶና። 16 ኤንቲ፥ “ኑኒ ነ አይለት እሻታሙ ምኖ አሳት ሀይሳን ደኦስ። ሀያና ኑኒ ነ ጎዳ ኮያናዉ ባና። ኦን ኤር፥ ጎዳ አያናይ እያ ኤክድ፥ እስ ዙማ ሁጰን ዎይኮ ዛንጋራ ግዶን የጎና አገና” ያግዶሶና።

ኤልስ፥ “አካይ፥ ቦፕተ” ያግስ። 17 ሽን አካይ ጉሳይ እያ ዬላያና ጋካናዉ፥ ኤንቲ እያ ዎስድ አጎና እፅን፥ “ቢተ” ያግስ። ኤንቲ እሻታማይ ብድ ሄꬑ ጋላስ ኩመꬅ ኮይድ፥ እያ ደምቦኮና። 18 ኤልስ እያርኮን ደእሽን፥ ኤንቲ እያኮ ስሚድ ይዶሶና። እ፥ “ታኒ ህንተና ‘ቦፕተ’ ያጋብክና?” ያግስ።

19 ሄሳፈ ጉየ፥ እያርኮን ደእያ አሳት ኤልሳ፥ “ኔኒ ኑ ጎዳይ በኤይሳዳ ሀ ካታማይ ዱሳስ ሎኦ። ሽን ሃꬃይ ኢታ፤ ቃስ ቢታይካ አይፈና” ያግዶሶና።

20 እ፥ “አነ ኦራꬃ ከረን ማፅነ የግድ፥ ኤክ ዪተ” ያግድ ኪትን፥ እያዉ ኤህዶሶና። 21 ኤልስ ፑልቱዋኮ ብድ፥ ማፅንያ እያን የግድ፥ “ጎዳይ፥ ‘ታኒ ሀ ሃꬃ ፓꬃስ፤ ህዛፐ ሀ ሃꬃይ ሀይቆስ ጋሶ ግደና፤ ቢታይካ አይፋና’ ያጌስ” ያግስ። 22 ኤልስ ኦድዳይሳዳ ሀች ጋካናዉ፥ ሄ ሃꬃይ ፅሎ ግድስ።

23 ኤልስ ያፐ ደንድድ፥ ፑደ ቤተለ ከይስ። እ ኦገ ቦላ ደእሽን፥ ያላጋ አደ ናይት ካታማፐ ከይድ፥ “ላ ሀ ቦአዉ፥ ከያ! ላ ሀ ቦአዉ፥ ከያ” ያግድ እያ ቀልቅስዶሶና።

24 ኤልስ ጉየ ስም ፄልድ፥ ኤንታ ጎዳ ሱንꬃን ባድስ። ያትን፥ ናምኡ ማጫ ባባንꬃት ከይድ፥ ናይታፐ ኦይታማነ ናምኡ ያላጋታ ፑዘረꬅድ ዎꬍዶሶና። 25 ኤልስ ያፐ ደንድድ፥ ቃርመሎሳ ዙማ ቦላ ከይስ፤ ያፐ ቃስ ሳማረ ስምስ።