1 ናአይ ሳሜል ኤልፐ ጋርሳራ ጎዳስ ኦꬄስ፤ ጎዳ ቃላይ ሄ ዎደ ዳሮ አልኦ፤ ቆንጨꬅካ ባዋ። 2 አይፈይ ዳቡርን ዋየትድ ፄልያ ኤል እስ ቃማ ባ በሳን ዝንእስ። 3 ሄ ዎደ ፆሳ ፆምፐይ ቡሮ ቶእቤና፤ ጎዳ ታቦተይ ደእያ ኬꬃን ሳሜል ꬍስክስ። 4 ጎዳይ ሳሜላ ፄግስ፤ ሳሜል፥ “ዬ” ግድ ኮይስ። 5 እ ኤልኮ ዎፅ ብድ፥ “ኔኒ ፄግን ሄኮ ያስ” ያግስ።

ሽን ኤል፥ “ታ ነና ፄጋብከ፤ ባዳ ዝንአ” ያግን፥ ሳሜል ብድ ዝንእስ።

6 ቃስ ጎዳይ፥ “ሳሜላ” ያግድ ናምአንꬆ ፄግን፥ ሳሜል ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ።

ሽን ኤል፥ “ታ ናአዉ፥ ታ ነና ፄጋብከ፤ ባዳ ዝንአ” ያግስ።

7 ጎዳ ቃላይ ቡሮ እያዉ ቆንጭቦና ግሾ፥ ሳሜል ጎዳ ግደይሳ ኤርቤና። 8 ጎዳይ ሳሜላ ሄꬓንꬆ ፄግን ደንድድ፥ ኤልኮ ብድ፥ “ኔኒ ፄግን ሄኮ ያስ” ያግስ።

ሄሳን ጎዳይ ናኣ ፄግዳይሳ ኤል አኬክድ፥ 9 “ባዳ ዝንአ፤ እ ነና ፄግያባ ግድኮ፥ ‘ጎዳዉ፥ ኦዳ፤ ታ ነ አይለይ ስአይስ’ ያጋ” ግድ፥ ኤል እያዉ ኦድን፥ ሳሜል ባ በሳ ብድ ዝንእስ።

10 ሄሳፈ ጉየ፥ ጎዳይ ይድ እያ ማታን ኤቅድ፥ ካሰይሳዳ፥ “ሳሜላ፥ ሳሜላ” ያግድ ፄግስ።

ሳሜል፥ “ነ አይለይ ስኤስ፥ ኦዳ” ያግስ።

11 ጎዳይ ሳሜላ፥ “ሄኮ፥ ታኒ አሳ ሀይꬃስ ኢትያ እስባ እስራኤለ ቦላ ኦꬃና ሀናይስ። 12 ሄ ጋላስ ታኒ ኤል ሶ አሳ ቦላ ኦꬃና ጋዳ ኦድዳ ኡባ ኮይሮፐ ዉርሰꬅ ጋካናዉ ፖላና። 13 ኤል ኤርድ ሴሮና አግዳ እያ ናይታ ናጋራ ግሾ፥ ታኒ እያ ሶ አሳ ቦላ መርናዉ ፕርዳናይሳ እያዉ ካሰ ኦዳ ዎꬃስ። 14 ሄሳ ግሾ፥ ‘ኤል ሶ አሳ ናጋራይ ያርሾንነ እሞን ፖሎ አቶ ጌተተና’ ያጋዳ ታኒ እያ ሶ አሳስ ካሰ ጫቃስ” ያግስ።

15 ሳሜል ዎንታና ጋካናዉ ꬍስክስ፤ ዎንትን ደንድድ፥ ፆሳ ኬꬃ ፐንግያ ዶይስ። ሳሜል ቆንጭዳባ ኤልስ ኦዳናዉ ያይስ። 16 ኤል፥ “ታ ናአዉ፥ ሳሜላ” ያግድ ፄግስ።

ሳሜል፥ “ዬ” ግድ ኮይስ።

17 ኤል፥ “ጎዳይ ነዉ ኦድዳይ አይቤ? ታፐ አይኮካ ቆሶፓ፤ ኔኒ ፆሳይ ነዉ ኦድዳባፐ እስባካ ታፐ ቆስኮ፥ ፆሲ ነና ፕርዶ” ያግድ ኦይችስ። 18 ሳሜል አይኮካ ቆሶና ኡባ ኤልስ ኦድስ። ኤል፥ “እ ጎዳ፤ ባና ሎእዳባ ኦꬆ” ያግስ።

19 ሳሜል ድጭሸ ብስ፤ ጎዳይ እያራ ደኤስ። ሳሜል ኦድዳባፐ እስ ቃልካ ሳአን ዎና። 20 ዳነፐ በርሳበ ጋካናዉ፥ ሳሜል ቱማ ጎዳ ናበ ግደይሳ እስራኤለ አሳ ኡባይ ኤርስ። 21 ጎዳይ ሴሎን ቆንጬስ፤ ያን ባ ቃላን ባናተꬃ ሳሜላስ ቆንጭሴስ።