2
ሃን ዎሳ
1 ሃና ሀይሳዳ ያጋዳ ዎሳሱ፤
“ታ ዎዛናይ ጎዳን ኡፋይቴስ፤
ታ ካጨይ *ካጨይ፦ ሀ በሳንነ ሀራ በሳን አጨይ ምኖተꬃ ማላ። ጎዳን ꬎቁ ግስ።
ታ ሞርከታ ቦላ ታኒ ጬቀታይስ፤
ነ አሾይ ታና ኡፋይሴስ።
2 ጎዳ መላ ጌሽ ባዋ፤
ነ መል ኦንካ ባዋ።
ኑ ፆሳፈ አትሽን፥
ሀራ ዛል ባዋ።
3 ኦቶሮ ሃሳያ አግተ፤
ኦቶሮ ቃል ህንተ ዶናፐ ከዮፖ።
ጎዳ ፆሳይ ኡባ ኤሬስ፤
አሳ ኦሶ ይግድ ፄሌስ።
4 ኦላንቾታ ዶንገይ መቅስ፤
ሽን ዳቡራንቾት ዎልቃ ደምዶሶና።
5 ካልዳይሳት ኮሻትድ ኡነትዶሶና፤
ሽን ኮሻትዳይሳት ሀእ ካልዶሶና።
ማይንꬅያ ላፑን ናይታ የላሱ፤
ሽን ዳሮ ናይታ የልዳራ ባርካ አታሱ †ባርካ አታሱ፦ ሀራ ብርሸꬃይ ዳቡራሱ ጉሱ።
6 ጎዳይ ዎꬌስ፥ ፓꬄስ፤
ስኦለን የጌስ፥ ያፐ ከሴስ።
7 ጎዳይ ዱረዬስ፤ ጎዳይ ማንቀꬄስ፤
ካዉሼስ፤ ꬎቁ ኦꬄስ።
8 እ ማንቆታ ባናፐ ደንꬄስ፤
መቶታንቾታ ብዶፐ ደንꬄስ።
ኤንታ ቦንቾ አሳራ ኡትሴስ፤
ቦንቾ አራታ ላትሴስ።
ቢታ ባሶት ጎዳሳ፤
ኤንታ ቦላ አላምያ ኤስስ።
9 “እ ጌሻታ ቶሁዋ ናጌስ፤
ሽን ኢታታ ꬉማን ስእ ኦꬃና፤
አስ ባ ዎልቃን ፆነና፤
10 ጎዳራ ኤቀተይሳት ሊቃና፤
ጎዳይ ሳሎፐ ኤንታ ቦላ ዳዳዳ ደቻና።
ጎዳይ ሳአን ደእያ ኡባ ፕርዳና፤
እ ባ ካዋስ ምኖተꬅ እማና፤
እ ባ ትይዳይሳስ ፆኖ እማና።”
11 ሄሳፈ ጉየ፥ ህልቃን ራማን ደእያ ባ ሶ ብስ፤ ሽን ናአይ ሳሜል ካህንያ ኤልፐ ጋርሳራ ጎዳስ ኦꬄስ።
ኤል ናይታ ኢታተꬅ
12 ኤል አደ ናይት ኢታ፤ ኤንቲ ጎዳ ቦንቾኮና። 13 ሄ ዎደ ካህነት አሳራ ደእያ ጋሄተꬃን ኦꬅያ ዎግ ደኤስ። ሄስካ አሳይ ያርሾ ያርሽያ ዎደ ካህንያ ኦሳንቾይ ሄꬑ አቻራ ደእያ ቃጰ ኤክድ ቡሮ አሾይ ካፅሽን ዬስ። 14 ዶይስያ ኦቱዋን ዎይኮ ድስትያን ዎይኮ ፃሩዋን ባ ቃጵያ የድድ፥ አይ ቆሞ አሾ ግድኮካ ከስ ኤፍድ ካህንያስ እሜስ። ያርሾ ያርሻናዉ ሴሎ ያ እስራኤለ አሳ ኡባ ቦላ ኤንቲ ሀይሳዳ ኦꬆሶና። 15 ቃስ ሞꬉዋ ያርሾ በሳን ፁጋናፐ ስን ካህንያ ኦሳንቾይ ያርሾ ያርሽያ አድያኮ ብድ፥ “ካህነይ ቃየ አሾፐ አትሽን፥ ካፅዳ አሾ ኔፐ ኤኮና ግሾ፥ እያዉ ጫጫናዉ አሾ ሀማ” ያጌስ።
16 አደይ ዛሪድ፥ “ኮይሮትድ ሞꬎይ ፁገቶ፤ ሄሳፈ ጉየ፥ ነ ኮየይሳ ኤካ” ያጌስ፤ ሽን ካህንያ አይለይ፥ “አካይ፥ ታዉ ሀእ እማ፥ ነ ድግኮ፥ ታኒ ዎልቃን ኤካና” ያጌስ።
17 ጎዳስ እምያ ያርሹዋ ኤል ናይት ካꬍዳ ግሾ፥ ኤንታ ናጋራይ ጎዳ ስንꬃን አꬍድ ዳርስ።
18 ሽን ሳሜል ናአ ደእሸ ሊኖፐ ኦሰትዳ ኤፉደ ‡ኤፉደ፦ እብራወꬆ ዶናን ካህነይ ማእያ ማኦ ቃንꬃ ጉሱ። ማኦ ማእድ ጎዳ ስንꬃን ኦꬄስ። 19 ሳሜላ አይያ ላይꬃን ላይꬃን ጉꬃ ቆለ ጊግሳዳ፥ ላይꬃ ያርሾ ያርሻናዉ ባ አዝናራ ባሸ እያዉ ኤካዳ ባዉሱ። 20 ኤል ህልቃናነ እያ ማችዉ፥ “ህንተ ጎዳስ ዱማይድ እምዳ ሀ ናኣ በሳን ጎዳይ ነዉ ሀ ማቸፈ ሀራ ናይታ እሞ” ያግድ አንጄስ፤ ያትን፥ ኤንቲ ባንታ ሶ ስሞሶና። 21 ጎዳይ ሃና አንጅን፥ ቃንꬃታዳ ሄꬑ አደ ናይታነ ናምኡ ማጫ ናይታ የላሱ። ናአይ ሳሜል ጎዳ ስንꬃን ድጭስ።
22 ኤል ዳሮ ጭምስ። እያ ናይት እስራኤለ አሳ ኡባ ቦላ ኦꬅዳ ኢታባነ ጌሻ ዱንካንያ ፐንገን ጎዳስ ኦꬅያ ማጫሳታራ ቱንዳይሳ ስእስ። 23 ሄሳ ግሾ ኤንታኮ፥ “ህንተ ሀይሳ መላባ አይስ ኦቲ? ህንተ ኢታ ኦሱዋ ታኒ አሳ ኡባፈ ስአስ። 24 ታ ናይቶ፥ ሄሳ አግተ፤ ጎዳ አሳይ ህንተና ግያባይ ሎኦ ግደና። 25 እስ አስ አሰ ናቅኮ፥ ፆሳይ እያዉ ጋናታና፤ ሽን አስ ጎዳ ናቅኮ፥ እያዉ ጋናታናይ ኦኔ?” ያግስ።
ጎዳይ ኤንታና ዎꬋናዉ ኮይዳ ግሾ ኤንቲ ባንታ አዋ ዞርያ ስኦና እፅዶሶና።
26 ናአይ ሳሜል ጎዳ ስንꬃንነ አሳ ስንꬃን ድጭስነ ሳበትስ።
ኤል ኬꬃ ቦላ ኦደትዳ ትንብተ
27 እስ ጋላስ ናበይ ኤልኮ ይድ፥ “ጎዳይ ሀይሳዳ ያጌስ። ‘ነ አዋ ሶ አሳይ ግብፀ ቢታን ፓሮና ኩሸን ደእያ ዎደ ታ ኤንታዉ ቆንጫብክና? 28 ነ አዋይ ካህነ ግድድ ታ ያርሾ በሳ ከያና መላ፥ እፃነ ጩይሳና መላነ ታ ስንꬃን ኤፉደ ማእድ ኦꬃና መላ እስራኤለ ዛረ ኡባፈ እያ ዶራስ። እስራኤለ አሳይ ታማን ያርሽያ ያርሾ ኡባ ታኒ ነ አዋ ኮቻስ እማስ። 29 ታኒ ታ ደእያ በሳን ሺቃና መላ ኪትዳ ታ ያርሹዋነ እሙዋ ህንተ አይስ ካꬍደቲ? ታ አሳ እስራኤለ፥ ታዉ ሺሽዳ ያርሾ ኡባፈ ዶረትዳይሳ ምድ ሞꬋና መላ ኦꬃዳ ነ ናይታ ታፐ አꬃዳ አይስ ቦንቻዲ?’
30 “ሄሳ ግሾ፥ ጎዳይ፥ እስራኤለ ፆሳይ ሀይሳዳ ያጌስ። ነ ኮቻይነ ነ አዋ ኮቻይ መርናዉ ታዉ ኦꬃና። ሽን ሀእ ሄስ ታፐ ሃኮ፤ ታና ቦንቸይሳታ ቦንቻና፤ ታና ካይሳት ካታና። 31 ነ ኮቻን አስ ጬጎና መላ ታኒ ነ ዎልቃነ ነ አዋ ሶ አሳ ዎልቃ ꬋይስያ ዎደይ ያና። 32 ኔኒ ታ ኬꬃን መቶ በአና፤ ታኒ እስራኤለ አሳስ እምያ አንጁዋ ኔኒ በአዳ ቃናታና፤ ሽን ነ ሶ አሳን ጬጋና አስ ኦንካ ባዋ። 33 ታኒ ታ ያርሾ በሳፈ ꬋይሶና አስ ደእኮ፥ እያ ጋሶን ነ አይፈይ አፉፅሸ ቆቃና፤ ነ ዎዛናይ አዛኖን ፁገታና፤ ነ ኮቻ ኡባይ ናአተꬃን ሀይቃና። 34 ነ ናይት ናምአይ፥ አፍናንነ ፍንሃስ እስ ጋላስ ሀይቃና፤ ሄሳ ነዉ ማላ ግዳና። 35 ታ ዎዛናዳነ ታ ቆፋዳ ኦꬅያ ታዉ አማነትያ ካህነ ደንꬃና። ታኒ እያዉ አማነትዳ ሶ አስ እማና፤ ታኒ ትይዳ ካዋ ስንꬃን ኤንቲ ኡባ ዎደ ኦꬃና። 36 ነ ኮቻ ግዶፈ አትዳ ኡባይ ጉꬃ ሚሸ ዎይኮ ባሶ ኡይꬅ ዎሳናዉ ይድ፥ እያ ስንꬃን ጉፋንድ፥ ‘ታኒ ምያባ ደማና መላ ካህነ ኦꬃዳ ታና ሹማርክ’ ያጋና” ያግስ።