1 ደረይ ዳርያ ኤፍሬማ ቢታን፥ ራማ ካታማን ደእያ፥ ኤፍሬማ ኮቸነ ዙፋ ኮቸ ግድዳ፥ ህልቃና ጌተትያ እስ አደይ ደኤስ። እ ይሮሃማ ናአ፤ ይሮሃም ኤልሁ ናአ፤ ኤልሁ ቶሁ ናአ፤ ቶሁይ ዙፋ ናኣ። 2 ህልቃናስ ናምኡ ማቸት ደኦሶና፤ እስነ ሱንꬃይ ሃኖ፤ ሀንኮር ሱንꬃይ ፕናኖ። ፕናንስ ናይት ደኦሶና፥ ሽን ሃናስ ናእ ባዋ።

3 ህልቃን ላይꬃን ላይꬃን ኡባፈ ዎልቃማ ጎዳ ጎይናናዉነ እያዉ ያርሻናዉ ሴሎ ቤስ። ኤል ናይት ናምአይ፥ አፍናንነ ፍንሃስ ጎዳ ካህነ ግድድ ሴሎን ሀጋዞሶና። 4 ህልቃን ያርሾ ያርሽያ ዎደ ኡባን አሹዋፐ እስ እስ ኩሸ ባ ማቸ ፕናንስ፥ ባ አደ ናይታስነ ማጫ ናይታስ ሁጰን ሁጰን እሜስ። 5 ጎዳይ ሃኖ የሎ ድግኮካ፥ ህልቃን እዮ ዶስያ ግሾ፥ እዉ ናምኡ ኩሸ እሜስ። 6 ጎዳይ ሃኖ የሎ ድግዳ ግሾ፥ እ ዳዉꬅያ እዮ ቶቻዳ ይሎያዉሱ። 7 ሄስ ላይꬃን ላይꬃን ኡባ ዎደ ሀንያባ። ሃና ጎዳ ኬꬅ ብዳ ዎደ ኡባን እ ዳዉꬅያ እያ ዬካና ጋካናዉነ ካꬅ እፃና ጋካናዉ ይሎያዉሱ። 8 እ አዝናይ ህልቃን፥ “ሃነ፥ ነ አይስ ዬካይ? አይስ ካꬅ ሚኪ? ነ ዎዛናይ አይስ አዛኒ? ታኒ ነዉ ታሙ ናይታፐ አꬍክናዬ?” ያጌስ።

9 እስ ጋላስ ኤንቲ ሴሎን ምዳፐነ ኡይዳፐ ጉየ፥ ሃና ደንዳ ኤቃሱ። ካህነይ ኤል ጎዳ ኬꬃ ፐንግያ ማታን ባ ኡትያ በሳን ኡትስ። 10 ሃና ዳሮ አዛንዳ ግሾ ጫመታዳ ዬካሸ ጎዳ ዎሳሱ። 11 እያ ሀይሳዳ ያጋዳ ቃንገታሱ፤ “ኡባፈ ዎልቃማ ጎዳዉ፥ ታና ነ አይልዉ በአ። ታ መቱዋ በአዳ፥ ታና ሀሳያ፤ ታና ነ አይልዉ ዶጎፓ። ኔኒ ታዉ ነ አይሌስ አደ ናአ እምኮ፥ እያ ደኦ ላይꬃ ኡባን ታኒ እያ ነዉ እማና፤ እያ ሁጰይ ፖሎ ሜደተና” ያጋሱ።

12 ሃና ጎዳ ዎሳ አዱስዳ ዎደ ኤል እ ዶና በኤስ። 13 ሃና ባ ዎዛናን ፆሳ ዎስያ ዎደ እ መተርሻይ ቃፄስ፥ ሽን እ ቃላይ ስኤተና፤ ሄሳ ግሾ፥ ኤል እዮ ማꬆትዳዳ ቆፕስ። 14 እ፥ “ኔኒ አዉደ ጋካናዉ ማꬆታይ? ዎይነ ኡሻ ኔፐ ድጋ” ያግስ።

15 ሃን ዛራዳ፥ “ታ ጎዳዉ፥ ግደና፤ ታኒ ዳሮ አዛንዳ ማጫስ፤ ታኒ ታ ሸምፑዋፈ ጎዳ ዎሳይስፐ አትሽን፥ ዎይነ ዎይኮ ማꬆይያ ኡሹ ኡያብከ። 16 ታኒ መቶይነ አዛኖይ ዳርዳ ግሾ ዎሳይስ። ታና ነ አይልዉ ፓና ማጫስ ኦꬃዳ ቆፖፋ” ያጋሱ።

17 ኤል ዛሪድ፥ “ሳሮ ባ፤ ኔኒ ዎስያባ እስራኤለ ፆሳይ ነዉ እሞ” ያግስ።

18 ሃና፥ “ነ አይልያ ነ ስንꬃን ሳባ ደሞ” ያጋሱ። ሄሳፈ ጉየ፥ እያ ባ ኦግያ ባዳ ካꬅ ማሱ፤ ሄሳፈ ስማዳ እያ አዛናቡኩ።

19 ዎንተꬃ ጋላስ ጉራ ደንድድ፥ ህልቃንነ እያ ሶ አሳይ ጎዳ ጎይንዳፐ ጉየ፥ ራማ ካታማን ደእያ ባንታ ሶ ስምዶሶና። ህልቃን ባ ማቸ ሃንራ አቅስ፤ ጎዳይ እዮ ቆፕስ። 20 እያ ቃንꬃታዳ አደ ናአ የላሱ። ሃና፥ “ታኒ ጎዳ ዎስን እ ታና ስእስ” ጋዳ እያ ሱንꬃ ሳሜላ ሱንꬃሱ።

21 ህልቃን ባ ሶ አሳ ኡባራ ላይꬃ ያርሾ ጎዳስ ያርሻናዉነ ቃንገꬃ ጋꬃናዉ ሴሎ ብስ። 22 ሽን ሃና ባቡኩ። እያ ባ አዝናኮ፥ “ናአይ ꬋንꬅ ዱꬅዳፐ ጉየ፥ እያ ኤፋዳ፥ ጎዳስ እማና፤ እ መርናዉ ያን ዳና” ያጋሱ።

23 ህልቃን፥ “ነና ሎእዳባ ኦꬃ፤ እ ꬋንꬅ ዱꬃና ጋካናዉ ሶን ጋምአናዉ ዳንዳኣሳ፤ ጎዳይ ባ ገልዳ ቃላ ነዉ ፖሎ” ያግስ። ሃና ባ ናኣ ꬋንꬅ ዱꬃና ጋካናዉ ሶን ጋምአሱ።

24 ሃና ናአይ ꬋንꬅ ዱꬅዳፐ ጉየ፥ ናኣነ ሄꬑ ላይꬃ ዎፋኖ *ሜꬑ ላይꬃ ዎፋኖ፦ እብራወꬆ ብርሸꬃይ ሄꬑ ዎፋኖ ጌስ፤ ቃስ ግርከ ብርሸꬃይ ሄꬑ ላይꬃ ዎፋኖ ጌስ። ላታሙ ክሎ ግራመ ꬊለነ ኦጎሮ ኩመꬃ ዎይነ ኡሹ ኤካዳ ሴሎን ደእያ ጎዳ ኬꬅ ባሱ፤ ሄ ዎደ ናአይ ጉꬃ። 25 ኤንቲ ዎፋኑዋ ሹክዳፐ ጉየ ናኣ ኤልኮ ኤፍዶሶና። 26 ሃና፥ “ታ ጎዳዉ፥ ነ ሸምፖይ ኤሮ፤ ነ ስንꬃን ኤቃዳ ጎዳ ዎስዳ ማጫስያ ታና። 27 ሀ ናኣ እማና መላ ዎስን፥ ጎዳይ ታ ዎስዳባ እሚስ። 28 ሄሳ ግሾ፥ ታኒ እያ ጎዳስ እማስ፤ እ ባ ደኦ ላይꬃ ኡባን ጎዳስ እመትስ” ያጋሱ። ኤንቲ ያን ጎዳ ጎይንዶሶና።