1 ቦኤዝ ፑደ ካታማ ፐንግያ ማታን ደእያ ዳባባን ከይድ ኡትስ። እ ያን ኡትዳሽን ካሰ እ ኦድዳ ማታ ዳቦይ ሄ በሳ ይን፥ ቦኤዝ እያኮ፥ “ላ፥ ሀ ሺቃዳ ሀይሳን ኡታ” ያግስ። እካ፥ ሺቅድ ኡትስ።

2 ቦኤዝ ሄ ካታማ ጭማታፐ ታሙ አሳታ ዶርድ፥ “ሀይሳን ኡትተ” ያግስ። ኤንትካ ኡትዶሶና። 3 ቦኤዝ ባ ማታ ዳቡዋኮ “ሞአበ ቢታፈ ስማዳ ይዳ ኑሃማ፥ ኑ እሻ አበመለከ ጋድያ ባይዛና ጋዉሱ። 4 ሄሳ ግሾ፥ ሀይሳን ኡትዳ አሳ ስንꬃንነ ታ ካታማ ጭማታ ስንꬃን፥ ዎዛ ጋዳ ታ ነዉ ኦዳናዉ ቆፓስ። ኔፐ ሀር ማት ባይና ግሾ ኔኒ ዎዛናዉ ኮይኮ ዎዛ፤ እፅኮ፥ ኔፐ ካልያ ማታ ዳቦይ ታና ግድያ ግሾ ታና ኤርሳ” ያግስ።

እ “ታኒ ዎዛና” ያግስ።

5 ቦኤዝ፥ “ኑሃምፐነ ሞአበ ኡሩትፐ ጋድያ ነ ሻምያ ጋላስ አምእዉ ኡሩቶካ ዎዛ፤ ያትኮ ሀይቅዳይሳ ሱንꬃይ እያ ላታ ጋድያን ፄገታና” ያግስ።

6 ሀ ማታ ዳቦይ፥ “ሄሳ ግድኮ፥ ታኒ ዎዛናዉ ዳንዳእከ፤ አይስ ጊኮ፥ ሄስ ታ ቡዞ ላታ ቆሄስ። ሄሳ ግሾ፥ ኔኒ ዎዛ፥ ታኒ ዳንዳእከ” ያግስ።

7 በን ዎደ እስራኤለ ቢታን ዎዙዋነ ላታ ዱꬃናዉ ባይዝያ ዎይኮ ላትስያ ባጋይ ባ ጫማ ቶሁዋፐ ከስድ፥ ሀንኮ ሻምያ ዎይኮ ላትያ ባጋስ እሜስ። እስራኤለ ቢታን ዛልኤስነ ላታስ ማራይ ሀይሳ።

8 ሄሳ ግሾ፥ ሄ ማታ ዳቦይ ቦኤዛኮ፥ “ኔኒ ዎዛ” ግድ፥ ባ ጫማ ቶሁዋፐ ከስድ እሚስ።

9 ያትን፥ ቦኤዝ ጭማታነ አሳ ኡባ፥ “ታኒ አበመለከስ፥ ከልዎናስነ ማህሎናስ ደእያባ ኡባ ኑሃምፐ ሻምዳይሳስ ሀች ህንተ ማርካ። 10 ቃስ ሀይቅዳይሳ ሱንꬃይ ኤንታ ሶ አሳ ሱንꬃ ግዶፈ ዎይኮ ካታማ አሳ ታይቡዋፐ ꬋዮናዳ እያ ሱንꬃ እያ ላታ ጋድያን ፄግሳናዉ ካሰ ማህሎና ማችዉ ኡሩቶካ ታኒ ዎዘይሳስ ሀች ህንተ ኡባይ ማርካ” ያግስ።

11 ካታማ ፐንግያ ዳባባን ደእያ ጭማትነ አሳ ኡባይ፥ “ኤ፥ ሀይሳስ ኑኒ ማርካ! ጎዳይ ሀኖ ነ ኤክያ ማጫስዉ፥ እስራኤለ አሳ ማይዛ አየታ ግድዳ ራሄልዳነ ልያዳ ኦꬆ። ኔንካ ኤፍራታን ዱረ ግዳ፥ ነ ሱንꬃይ ቤተለመን ኤረቶ። 12 ነ ኬꬃይ፥ ጎዳይ፥ ሀ ናአተꬃ ማጫሴፐ ነዉ እምያ ዘረꬃን ትማራ ይሁዳስ የልዳ ፋረሳ ኬꬃዳ ኦꬆ” ያግስ።

13 ሄሳዳካ ኦꬅድ፥ ቦኤዝ ኡሩቶ ኤክስ እያካ እያዉ ማቾ ግዳሱ። ጎዳይ እዮ ቃንꬃታና መላ ኦꬅን አደ ናአ የላሱ። 14 ማጫሳት ኑሃሞ፥ “ሀች ነና ሄማና አስ ꬋይስቦና ጎዳይ ጋላተቶ! እያ ሱንꬃይ እስራኤለን ꬎቁ ጎ! 15 እያን ነዉ ሳኢ ስማና፥ ነ ጭምያ ዎደ እ ነና ሄማና። አይስ ጊኮ፥ ላፑን አደ ናይታፐካ አꬃዳ ነና ሲቅያራነ ነዉ ኬህያራ፥ ነ ናአ ማችያ ነዉ ናአ የላሱ” ያግዶሶና።

16 ኑሃማ ናኣ እድማሱ፤ ሎይꬃ ድቻሱ። 17 እ ሾሮ ማጫሳት፥ “ኑሃምስ አደ ናእ የለትስ” ያግድ እያ ሱንꬃካ ዮበዳ ግዶሶና። ዮበድ ዳዊታ አዋ እሰየ የልዳይሳ።

18 ፋረሳ የለተꬃይ ሀይሳፈ ካልድ ፃፈትዳይሳ፤