1 እስ ጋላስ ኑሃማ ባ ናአ ማችዉ፥ “ታ ናተ፥ ኔኒ ጊግን ዳና መላ ታኒ ነዉ ዉላ ኮያኮ ዋናኔ? 2 ኔኒ ኤንታራ ጋምእዳ ማጫ አይለታ ጎዳይ፥ ቦኤዝ፥ ኑስ ማታ ዳቦ ግደነዬ? እ ሀች ቃማ ዉዱማን ባንጋ ፑናና። 3 ኔኒ ሜጨታዳ ሽቶ ትየታ፤ ነ ሎኦ ማኡዋ ማአዳ፥ ዱገ ዉዱማን ባ፤ ባዳ ቦኤዝ ምድ ኡይድ ስማና ጋካናዉ እያ አይፈን ከዮፓ። 4 እ ሂፃ አꬍያ ዎደ እ አዉን ꬍስክያኮ በአዳ፥ እያ አፍላ ቃራዳ እያ ቶሆሶን ዝንአ አጋ። ኔኒ ሀናናባ እ ነዉ ኦዳና” ያጋሱ።

5 ኡሩታ፥ “ኔኒ ግዳባ ኡባ ታ ኦꬃና” ያጋሱ። 6 ሄሳ ግሾ፥ ኡሩታ ደንዳዳ ዱገ ሞꬅ ባዳ፥ እ አዝና አይያ እዉ ኦድዳባ ኡባ ኦꬃሱ።

7 ቦኤዝ ምድ ኡይድ ባ ቦላ ፓሽክስዳፐ ጉየ፥ ካꬃ ጫቻ ማታን አꬍድ ዝንእስ። ኡሩታ ለፓራ ሺቃዳ፥ እያ ቶሁዋ ቃራዳ ዝንአሱ። 8 ግድ ብላሄ ግድያደ እ ዳጋም ደንድድ ሽረትያ ዎደ፥ እስ ማጫስ እያ ቶሆሶን ዝንእዳሮ ደምስ።

9 እካ፥ “ኔኒ ኦኔ?” ያግድ ኦይችስ።

እያ፥ “ታኒ ነ አይልዉ ኡሩቶ፤ ኔኒ ታ አዝናስ ማታ ዳቦነ ታና ዎዛናዉ ዳንዳኤይ ነና ግድያ ግሾ ታ ቦላ ነ አፍላ የጋ” ያጋሱ።

10 ቦኤዝ ዛሪድ፥ “ታ ናተ፥ ጎዳይ ነና አንጆ! ሀ ኬሀተꬃይ ካሰ ነ ኦꬅዳይሳፈ አꬌስ። ኔኒ ማንቆ ዎይኮ ዱረ ግድዳ ናአተꬃ አደ ኮያባካ። 11 ሀእ ታ ናተ ባቦፋ። ኔኒ ኦይችዳባ ኡባ ነዉ ታኒ ኦꬃና። ታ ካታማን ደእያ አሳ ኡባይ ኔኒ ሎኦ ማጫስ ግደይሳ ኤሬስ። 12 ታኒ ማታ ዳቦ ግደይስ ቱማ፤ ሽን ታፐ ዳሮ ማተይ ደኤስ። 13 ሀች ቃማ ሀይሳን አቃ። ዎንቶ እ ነና ዎዛናዉ ኮይኮ ሎኦ፥ ዎዞ። ሽን እ ዎዛናዉ ኮዮና እፅኮ፥ ደኦ ጎዳይ ኤርያ መላ፥ ታኒ ነና ዎዛና። ሳእ ዎንታና ጋካናዉ ሀይሳን ዝንአ” ያግስ።

14 ሄሳ ግሾ፥ እያ ቦኤዛ ቶሆሶን ሳእ ዎንታና ጋካናዉ ዝንአዳ አቃሱ። ቦኤዝ፥ “ማጫስ ካꬃ ሞꬅ ይዳይሳ ኦንካ ኤሮፖ” ግዳ ግሾ ኡሩታ አስ አሰ ሻክድ ኤሮና ዎደ ዎንታ፥ ዳሮ ጉራ ደንዳሱ።

15 ቦኤዝ እዮ፥ “ነ ማእዳ ይዳ ላፃና ሀ በሳ” ያግስ። እያ በስን ላታሙ ክሎ ግራመ ባንጋ ማክ ቆልድ እዮ ባእስስ። እካ ባአዳ ጉየ ካታማ ባሱ።

16 ኡሩታ ባ አዝና አየኮ ስማዳ ይን፥ ኑሃማ፥ “ታ ናተ፥ ነ ብዳ አላለይ ዋንዴ?” ያጋዳ ኦይቻሱ።

ኡሩታካ ቦኤዝ ኦꬅዳባ ኡባ ኦዳሱ፤ 17 ጉጃዳካ፥ “ ‘ነ አዝና አየኮ መላ ኩሸ ቦፓ’ ግድ ሀይሳ ላታሙ ክሎ ግራመ ባንጋ እሚስ” ያጋሱ።

18 ያግን ኑሃማ፥ “ታ ናተ፥ አይብ ሀናኔኮ ኤረታና ጋካናዉ ናጋ። አደይ ሀች ሀ አላለይ ኦገ ኦይኮና ሸምፐና” ያጋሱ።