1 ጎዳ ታቦተይ ፍልስፄመ ቢታን ላፑን አጌና ኡትስ። 2 ሄ ዎደ ፍልስፄመ አሳይ ባንታ ካህነታነ ማሮታ ፄግድ፥ “ጎዳ ታቦትያ ኑኒ ዋትኖ? ኑኒ ጉየ እያ በሳ እያ ዋት የዳኔኮ ኑስ ኦድተ” ያግዶሶና።

3 ኤንቲ ዛሪድ፥ “እስራኤለ ፆሳ ታቦትያ ጉየ የድሸ መላ ኩሸ የዶፍተ። አይ ሀንድካ ናጋራ ያርሾራ የድተ። ሄሳ ኦꬅኮ ህንተ ፓፃና፤ እያ ኩሸይ ህንተ ቦላፈ አይስ ክችቦናኮ ህንተ ኤራና” ያግዶሶና።

4 ፍልስፄመ አሳይ፥ “ኑኒ የዳናዉ በሲያ ናጋራ ያርሾይ አይቤ?” ያግድ ኦይችዶሶና።

ኤንቲ፥ “ህንተናነ ህንተ ሀላቃታ ጋክዳ ጋዶይ እስኖ ግድያ ግሾ፥ ፍልስፄመ ሀላቃታ ታይቦን እቻሹ ዎርቃ ክፃታነ እቻሹ ዎርቃ ኤጨረታ የድተ። 5 ህንተ ሄ ክፃታነ ህንተ ቢታ ꬋይስያ ሄ ኤጨረታ ምስለታ መꬍድ፥ እስራኤለ ፆሳስ ቦንቾ እምተ። ኦን ኤር እ ህንተ ቦላፈ፥ ህንተ ፆሳታ ቦላፈነ ህንተ ቢታ ቦላፈ ባ ኩሽያ ደንꬃና። 6 ግብፀ አሳይነ ኤንታ ካዎይ ዞረ ኤኮና እፅዳይሳዳ ህንተ አይስ ዞረ ኤከከቲ? ጎዳይ ኤንታ ዳሮ ሴርን እስራኤለት ባንታ ኦግያ ባና መላ የድቦኮና? 7 ሀእ እስ ኦራꬃ ጋረ ጊግስተ፤ ቃምባራ ዎꬅቦና ናምኡ ꬋንꬅያ ሚዛታ ሄ ጋርያን ዋፅተ፤ ሽን ማራታ ኤንታፈ ዱꬅድ ሶን አሽተ። 8 ጎዳ ታቦትያ ጋርያ ቦላ ዎꬅተ፤ ናጋራ ያርሾስ ጊግስዳ ዎርቃ ክፃታነ ዎርቃ ኤጨረታ ሳፅነን የግድ ጎዳ ታቦትያ ማታን ዎꬅድ እ ባና መላ የድተ። 9 ሽን እ ብያ በሳ በእተ፤ እ ባ ዛዋ ኦይክድ፥ ቤት-ሳሜሳ ስሚድ ብያባ ግድኮ፥ ሀ ጋዱዋ ኑ ቦላ ኤህዳይ ጎዳ ግደይሳ በሴስ። ሽን እ ሀራ ሶ ቢኮ ሀይስ ኑ ቦላ ጮ ጋክስፐ አትሽን፥ ኑና ደችዳይ ጎዳ ኩሸ ግዶናይሳ ኤራና” ያግድ ዛርዶሶና።

10 ኤንቲ ጌተትዳይሳዳ ኦꬅዶሶና፤ ናምኡ ꬋንꬅያ ሚዛታ ኤክድ፥ ጋረን ዋፅዶሶና፤ ማራታ ሶ ዛሪድ ጎርድዶሶና። 11 ኤንቲ ጎዳ ታቦትያ፥ ዎርቃ ክፃነ ኤጨረ ምስለት ደእያ ሳፅንያ ጋረን ዎꬅዶሶና። 12 ሄሳፈ ጉየ፥ ሚዛት ቤት-ሳሜሳ ኤፍያ ኦግያ ኦይክድ ገደ ሃ ጎና “ህምባ” ግድ ዋስሸ ብዶሶና። ፍልስፄመ ሀላቃት ሚዛታ ጌዶ ካልድ፥ ቤት-ሳሜሳ ዛዋ ጋካናዉ ብዶሶና።

13 ቤት-ሳሜሳ አሳይ ሄ ዎደ ዛንጋራን ግስተ ጫኮሶና፤ ኤንቲ ꬎቁ ግድ ፄልድ፥ ታቦትያ በእድ ኡፋይትዶሶና። 14 ጋረይ ቤት-ሳሜሳን ደእያ እያሱ ጌተትያ ኡራ ጋደ ጋክድ፥ እስ ግታ ሹቻ ማታን ኤቅስ። ኤንቲ ጋርያ ምꬃ ቀርድ፥ ፁሳ ያርሾ ኦꬅድ ሄ ሚዛታ ጎዳስ ያርሽዶሶና። 15 ሌወት ጎዳ ታቦትያነ ዎርቃ ሚሸት ደእያ ሳፅንያ ጋርያፐ ዎꬍስድ፥ ግታ ሹቻ ቦላ ዎꬅዶሶና። ሄ ጋላስ ቤት-ሳሜሳ አሳይ ጎዳስ ፁሳ ያርሾነ ሀራ ያርሾታ ያርሽዶሶና። 16 እቻሹ ፍልስፄመ ሀላቃት ሀንዳባ ኡባ በእድ ሄ ጋላስ ኤቅሮና ስምዶሶና።

17 ዎርቃ ክፃት ፍልስፄመ ሀላቃት ናጋራ ያርሾ ኦꬅድ ጎዳስ ኪትዳ አሽዶዳ፥ ጋዛ፥ አስቃሎና፥ ጋተነ ኤቅሮና ጌተትያ እቻሹ ካታማታ ሱንꬃን እሱዋ እሱዋ እምዶሶና። 18 ዎርቃ ኤጨረታ ታይቦይ ፍልስፄመ ሀላቃታ እቻሻይ ደእያ ግምበትዳ ካታማታነ ሄራን ደእያ ጉታታ ታይቡዋ መላ። ቤት-ሳሜሳን ደእያ እያሱ ጌተትያ ኡራ ጋደን ጎዳ ታቦትያ ዎꬅዳ ግታ ሹቻይ ሀች ጋካናዉ ማርካ ግድድ ደኤስ።

19 ሽን ኤንቲ ጎዳ ታቦትያስ ግዶ ባጋ በእዳ ግሾ ጎዳይ ቤት-ሳሜሳ አሳፐ ላፑን ታሙ አሳታ ዎꬍስ። ጎዳይ ኤንታፈ ዳሮ አሳ ዎꬍዳ ግሾ አሳይ ዬክዶሶና። 20 ሄሳ ግሾ፥ ቤት-ሳሜሳ አሳይ፥ “ጎዳ ስንꬃን፥ ሀ ጌሻ ፆሳ ስንꬃን ኦን ኤቃናዉ ዳንዳኢ? ታቦተይ ኑፐ ከይድ ኦደኮ ባኔ?” ያግዶሶና። 21 ቅርያት-ይኣርማን ደእያ አሳኮ ኪታ የድድ፥ “ፍልስፄመ አሳይ ጎዳ ታቦትያ ዛርዶሶና፤ ይድ እያ ህንተኮ ኤክተ” ያግዶሶና።