1 ቅርያት-ይኣርማ አሳይ ይድ፥ ጎዳ ታቦትያ ኤፍድ ደረ ሁጰን ደእያ አምናዳበ ሶን ዎꬅዶሶና። ጎዳ ታቦትያ ናጋና መላ አምናዳበ ናኣ አላዛራ ዱማይድ ሱንꬅዶሶና።

2 ታቦተይ ቅርያት-ይኣርማን ዳሮ ዎደ ጋምእስ፤ ያን ላታሙ ላይꬅ ኡትስ። እስራኤለ አሳ ኡባይ አዛንድ ጎዳ ኮይዶሶና።

3 ሳሜል እስራኤለ አሳኮ፥ “ኩመꬃ ዎዛናፐ ህንተ ጎዳኮ ስምዳባ ግድኮ፥ አላጋ ፆሳታነ አስታሮተ ኤቃ ህንተ ግዶፈ ድግተ። ህንተናተꬃ ጎዳስ ሼꬍተ፤ እያ ፃላላስ ኪተትተ፤ እ ህንተና ፍልስፄመታ ኩሸፐ አሻና” ያግስ። 4 ሄሳ ግሾ፥ እስራኤለ አሳይ ባኣለነ አስታሮተ ኤቃ ባንታ ግዶፈ ድግድ፥ ጎዳ ፃላላ ጎይንዶሶና።

5 ሄሳፈ ጉየ፥ ሳሜል፥ “እስራኤለታ፥ ኡባይ ምፅጳ ሺቅተ፤ ታኒ ያን ህንተዉ ጎዳ ዎሳና” ያግስ። 6 ኤንቲ ምፅጳ ሺቅድ ሃ ዱቅድ፥ ጎዳ ስንꬃን ጉስዶሶና፤ ሄ ጋላስ ፆምዶሶና፤ ሄ በሳን፥ “ኑኒ ጎዳ ቦላ ናጋራ ኦꬅዳ” ያግድ ፓፅዶሶና። ምፅጳን ሳሜል እስራኤለ አሳ ቦላ ዳይናትስ።

7 እስራኤለት ምፅጳን ሺቅዳይሳ ፍልስፄመ አሳይ ስእዳ ዎደ ኤንታ ኦላናዉ ከይዶሶና። እስራኤለት ሄሳ ስእድ፥ ፍልስፄመታስ ያይዶሶና። 8 እስራኤለ አሳይ ሳሜላኮ፥ “ፍልስፄመ አሳ ኩሸፐ ኑና አሻና መላ ኔኒ ጎዳ፥ ኑ ፆሳ ዎሳ አጎፋ” ያግዶሶና። 9 ሳሜል እስ ꬋምያ ዶርሳ ናአ ኤክድ፥ ኩመꬅ ፁሳ ያርሾ ኦꬅድ ጎዳስ ያርሽስ፤ እስራኤለ አሳ ግሾ ጎዳ ዎስስ፤ ጎዳይ እያ ዎሳ ስእስ።

10 ሳሜል ፁሳ ያርሾ ያርሽያ ዎደ ፍልስፄመት እስራኤለታ ኦላናዉ ሺቅዶሶና። ሽን ሄ ጋላስ ፍልስፄመታ ቦላ ጎዳይ ግታ ዳዳ ጉንꬅድ ዳጋንꬅን፥ ኤንቲ እስራኤለታ ስንꬃፈ ባቃትዶሶና። 11 እስራኤለት ምፅጳፈ ከይድ፥ ፍልስፄመታ የደꬅድ፥ ቤት-ካራፐ ጋርሳ ባጋራ ደእያ በሳ ጋካናዉ ኦገ ቦላ ዎꬍዶሶና።

12 ሄሳፈ ጉየ፥ ሳሜል እስ ሹቹ ኤክድ፥ ምፅጳፈነ ሸናፐ ግዶን ኤስስ፤ “ሀእ ጋካናዉ ጎዳይ ኑና ማድስ” ያግድ ሄ በሳ አበንኤዘራ ግድ ሱንꬅስ።*አበንኤዘራ፦ ሀ ሱንꬃ ብርሸꬃይ “ማዶ ሹቹ” ጉሱ። 13 ፍልስፄመ አሳይ ፆነትዶሶና፤ ኤንቲ እስራኤለ ቢታ ቦላ ናምአንꬆ ደንድቦኮና። ሳሜል ደእዳ ላይꬃ ኡባን ጎዳ ኩሸይ ፍልስፄመ አሳ ቦላ ዴፅስ። 14 ፍልስፄመ አሳይ ኤቅሮናፐ ጋተ ጋካናዉ እስራኤለፐ ድእዳ ካታማት እስራኤለስ ስምዶሶና። እስራኤለ አሳይ ባንታ ካሰ ዛዋ ፍልስፄመ አሳ ኩሸፐ ዎꬅ ኤክዶሶና። እስራኤለ አሳይነ አሞረ አሳይ ሳሮ ደእስ።

15 ሳሜል ባ ደኦ ላይꬃ ኡባን እስራኤለ ቦላ ፕርዴስ። 16 ሳሜል ላይꬃን ላይꬃን ቤተለ፥ ጋልጋላነ ምፅጳ ዩይድ እስራኤለ ቦላ ፕርዴስ። 17 እያ ኬꬃይ ራማን ደእያ ግሾ ያ ስሚድ ሄ በሳንካ እስራኤለ ቦላ ፕርዴስ። እ ራማን ጎዳስ ያርሾ በሲ ኬፅስ።