1 ሳሜል ጭምዳ ዎደ ባ ናይታ እስራኤለ ቦላ ዳይና ኦꬅድ ሹምስ። 2 እያ ባይራ ናኣ ሱንꬃይ እዩኤላ፤ ካሎ ናአ ሱንꬃይ አብያ፤ ኤንቲ በርሳበን ፕርዶሶና። 3 ሽን እያ ናይት ባንታ አዋ ኦግያ ካልቦኮና። ኤንቲ በሶና ጎአ ደማናዉ ጉየ ስምዶሶና፤ ዎꬋፈ ኤክዶሶና፥ ሱረ ፕርዳ ዎቢስዶሶና።

4 ሄሳ ግሾ፥ እስራኤለ ጭማት እስፈ ሺቅድ፥ ሳሜላኮ ራማ ይድ፥ 5 “ሄኮ ኔኒ ጭማዳሳ፤ ነ ናይት ነ ኦግያ ካሎኮና፤ ሀራ ካዎተꬃት ኦይሳዳ ኑና አይስያ ካዎ ሀእ ኑስ ሹማ” ያግዶሶና።

6 ኤንቲ፥ “ኑና አይስያ ካዎ ኑስ እማ” ግድ ኦይችዳይስ ሳሜላ ኡፋይስቤና። ሄሳ ግሾ፥ ሳሜል ጎዳ ዎስስ። 7 ጎዳይ ሳሜላ፥ “ታኒ ኤንታ ቦላ ካዎቶናዳ ነና ግዶናሽን ታና እፅዳ ግሾ አሳይ ኔኮ ግያባ ኡባ ስአ። 8 ኤንታ ታኒ ግብፀፈ ከስዳ ዎድያፐ ዶምድ ሀች ጋካናዉ ታና አግድ፥ ሀራ ፆሳታ ጎይንሸ ደእዶሶና። ሀእ ኤንቲ ታ ቦላ ኦꬅዳ ኡባ ነ ቦላ ኦꬆሶና። 9 ሀእ ኤንቲ ግያባ ስአ፤ ሽን ኤንታ ቦላ ካዎታና ካዋ ዎጋ ኤንታዉ ምንꬃዳ ኦዳ” ያግስ።

10 ካዎ ኦይችዳ ደርያስ ጎዳይ ኦድዳ ቃላ ኡባ ሳሜል ያግድ ኦድስ። 11 “ህንተ ቦላ ካዎታና ካዎይ ኦꬃናባይ ሀይሳ፤ እ ህንተ አደ ናይታ ኤክድ፥ ፓራ ጋረ አሳታነ ፓራ አሳታ ኦꬃና፤ ኤንቲ እያ ጋርያ ስንꬃን ዎፃና። 12 ኤንታፈ አትዳይሳታ ሻላቃታነ ሀምሳላቃታ፥ ሀራታ እያ ቢታ ጎየይሳታ እያ ካꬃ ጫከይሳታ፥ ቃስ ሀራታ እያ ኦላ ሚሸነ ፓራ ጋረ ሚሸ ኦይሳታ ከሳና። 13 ህንተ ማጫ ናይታካ ኤፍድ፥ ባዉ ሽቶ ጊግሰይሳታ፥ ካይሳታነ ኡከይሳታ ኦꬃና። 14 ህንተ ጎሻፈ፥ ዎይነ ጋደፐነ ሻማሆ ጋደፐ ሎኦ በሳታ ኤክድ፥ ባ ሞርናታስ እማና። 15 ካꬃፈነ ዎይንያፐ ታማፈ እስ ኩሽያ ኤክድ ባ ሹማታስነ ባ ሞርናታስ እማና። 16 ህንተ አደ አይለታፐ፥ ማጫ አይለታፐ፥ ህንተ ናአተꬃታፈነ ህንተ ሀርያፐ ሎኤይሳ ባዉ ጎኤታናዉ ኤካና። 17 ህንተ ዶርሳፈነ ዴሻፐ ታማፈ እስ ኩሸ ኤካና፤ ህንተ እያ ኦሳንቾ ግዳና። 18 ሄ ጋላሳይ ጋክዳ ዎደ ህንተ ዶርዳ ካዎይ ጋꬅያ ቆሁዋ ግሾ ዋሳና፤ ሽን ሄ ጋላስ ጎዳይ ህንተ ዋሱዋ ስኤና” ያግስ።

19 ግዶሽን፥ አሳይ ሳሜላ ቃላ ስኦና እፅድ፥ “አካይ፥ ኑስ ካዎይ ደኦ። 20 ሀራ ካዎተꬃታ መላ ኑና ካለꬅያ፥ ኑ ስንꬃን ብያነ ኑ ኦላ ኦለትያ ካዎይ ደኦ።”

21 ሳሜል አሳ ቃላ ኡባ ስእድ፥ ጎዳስ ኦድስ። 22 ጎዳይ ሳሜላኮ፥ “ኤንታ ቃላ ስአ፤ ኤንታ ቦላ ካዎ ካዎꬃ” ያግስ።

ሳሜል እስራኤለ አሳኮ፥ “ህንተ ሶ ሶ ስምተ” ያግስ።