1 ብንያመ ኮቸ ግድዳ እስ ቂሳ ጌተትያ አደይ ደኤስ፤ እ ኤረትዳ አስ። እ አብኤላ ናአ፤ አቤል ፃሮራ ናአ፤ ፃሮር ባኮራተ ናአ፤ ባኮራት ብንያመ ኮቸ ግድዳ አፌቃ ናአ። 2 እያዉ ሳኦላ ጌተትያ እስ ማላ ሎኦ ግድዳ ፓንꬃ ናእ ደኤስ። እስራኤለታ ግዶን እያ መላ ማላ ሎኦይ ባዋ፤ እ አስ ኡባይ እያ ሀሸፐ ጋርሳን አትያ አዱሳ አስ።

3 እስ ጋላስ ሳኦላ አዋ ቂሳ ሀረት ꬋይዶሶና፤ ቂስ ባ ናኣ ሳኦላኮ፥ “ኦሳንቾታፐ እሱዋ ኤካዳ ሀረታ ኮያናዉ ባ” ያግስ። 4 ኤንቲ ደረይ ዳርያ ኤፍሬማ ቢታራነ ሻልሻ ቢታራ ኮይሸ አꬍዶሶና፥ ሽን ሀረታ ደምቦኮና። ቃስ ሻአልማ ቢታራ ኮይሸ አꬍዶሶና፥ ሽን ያንካ ሀረት ዶኮና። ብንያመ ቢታራ አꬍዶሶና፥ ሽን ያንካ ደምቦኮና።

5 ኤንቲ ዙፋ ቢታ ጋክዳ ዎደ ሳኦል ባራ ደእያ ኦሳንቹዋኮ፥ “ሃያ፤ አነ ጉየ ስሞስ፤ አዋይ ሀረታባ ቆፐይሳ አግድ፥ ኑስ ህርጋና” ያግስ።

6 ሽን ኦሳንቾይ፥ “ሄኮ፥ እስ ቦንቸትዳ ፆሳ አስ ሀ ካታማን ደኤስ፤ እ ኦድያ ኡባይ ፖለቴስ። አነ ሀእ ያ ቦስ፤ ኦን ኤር ኑ ባና ኦግያ እ ኑስ ኦዳነኮ” ያግስ።

7 ሳኦል፥ “ኑ ብያባ ግድኮ እያዉ አይ እማኔ? ኑ ኦይክዳ ካꬃይ ዉርስ፤ ኑ ፆሳ አሳስ እምያባይ ባዋ። ኑስ አይብ ደኢ?” ያግስ።

8 ኦሳንቾይ ዛሪድ፥ “ታ ኩሸን ጉꬃ ብራ ሳንትመይ ደኤስ፤ ኑ ባና ኦግያ ኑስ ኦዳና መላ ፆሳ ኡራስ ሀኖ እማና” ያግስ።

9 (በን ዎደ እስራኤለ ቢታን እስ አስ ፆሰ ኦይቻናዉ ብሸ፥ “አነ ቆንጨꬅ በእያ አሳኮ ቦስ” ያጌስ። ሀእ ናበ ጌተተይስ ሄ ዎደ ቆንጨꬅ በእያ አስ ጌተቴስ።) 10 ሳኦል ዛሪድ፥ “ሎኦ፤ የꬋ” ያግን፥ ፆሳ ኡራይ ደእያ ካታማ ብዶሶና። 11 ኤንቲ ፑደ ካታማ ከይሽን፥ ሃ ትካናዉ ያ ጌላኦታራ ኦገን ጋሄትድ፥ “ቆንጨꬅ በእያ አስ ሀይሳን ደኢ?” ያግድ ኦይችዶሶና።

12 ኤንቲ፥ “ኤ ደኤስ፤ እ ህንተፈ ስንꬃን ደኤስ፤ ኤለስድ ቢተ። ሀች አሳይ ꬎቃ ጎይኖ በሳን ያርሾ ያርሽያ ግሾ፥ እ ኑ ካታማ ይስ። 13 ህንተ ካታማ ገልያ ዎደ እ ማናዉ ꬎቃ ጎይኖ በሳ ከዮና ደእሽን ህንተ እያ ደማና። እ ያርሹዋ አንጃናዉ ኮሽያ ግሾ እ ጋኮና ደእሽን አሳይ ካꬃ ሜና። እ አንጅዳፐ ጉየ ፄገትዳይሳት ማና። ኤለ ከይተ፤ ህንተ እያ ሀእ ደማና” ያግዶሶና። 14 ኤንቲ ካታማ ገልያ ዎደ ሳሜል ጎይኖ በሳ ከያናዉ ብሸ ኤንታራ ጋሄትስ።

15 ሳኦል ያናፐ ካሰ ጋላስ ሳሜላስ ጎዳይ ሀይሳዳ ያግድ ቆንጭስስ፤ 16 “ዎንቶ ሀኖደ ብንያመ ቢታፈ እስ አስ ታ ኔኮ የዳና፤ እ ታ አሳ እስራኤለ ካለꬃና መላ ትያ። እ ታ አሳ ፍልስፄመ ኩሸፐ አሻና፤ ታ አሳ ዋሶይ ታኮ ጋክዳ ግሾ ታ ኤንታ በአስ” ያግስ።

17 ሳሜል ሳኦላ በእዳ ዎደ ጎዳይ፥ “ታኒ ነዉ ኦድዳ ኡራይ ሀይሳ፤ እ ታ አሳ ካለꬃና” ያግስ።

18 ሳኦል ግምበ ድርሳ ፐንግያ ማታን ደእያ ሳሜላኮ ሺቅድ፥ “ቆንጨꬅ በእያ ኡራ ሶይ አዉነኮ ታዉ ኦዳርኪ?” ያግስ።

19 ሳሜል ዛሪድ፥ “ቆንጨꬅ በኤይ ታና። ሀች ህንተ ታራ ምያ ግሾ ታፐ ስንꬃትድ ጎይኖ በሳ ቢተ። ታኒ ነና ዎንቶ ጉራ የዳና፤ ነ ዎዛናን ደእያ ኡባ ታ ነዉ ኦዳና። 20 ሄꬑ ጋላሳፐ ስን ꬋይዳ ሀረታባ ግድኮ ኤንቲ በንትዳ ግሾ ህርጎፋ። እስራኤለ አሳ ኡባ አሞይ ኦኔ? ነናነ ነ አዋ ሶ አሳ ግደኔ?”*እስራኤለ ኡባን ኮየተይ ነና ግድኪ? ያግስ።

21 ሳኦል ዛሪድ፥ “ሽን ታኒ እስራኤለ ዛረ ኡባፈ ላፋ ግድዳ ብንያመ ኮቸ ግድክና? ታ ሶ አሳይ ብንያመ ኮቻ ግዶን ጉꬃ ግደኔ? ኔኒ አይስ ታዉ ሀይሳ መላባ ኦዳይ?” ያግስ።

22 ሄሳፈ ጉየ፥ ሳሜል ሳኦላነ እያ ኦሳንቾይ ኤፍድ፥ ዳልጋ ኬꬅ ገልስድ ሄ በሳ ፄገትዳ ሀስታሙ ግድያ አሳ ግዶን ቦንቾ በሳን ኡትስስ። 23 ሳሜል ካꬅ ካይሳኮ፥ “ነ ማታን ዱማ ዎꬃሻ ጋዳ ታኒ ነዉ እምዳ አሹዋ ሀማ” ያግስ።

24 ካꬅ ካይስ ምሳ አሹዋ ኤህድ፥ ሳኦላ ስንꬃን ዎꬅስ። ሳሜል ሳኦላኮ፥ “ታ ነዉ ዱማ ሻካዳ ዎꬅዳ አሾይ ሀይሳ፤ ኤካዳ ማ። ታኒ እማꬃታ ፄግዳ ዎደፐ ዶማዳ ሀይሳ ነዉ አሻስ” ያግስ። ሄ ጋላስ ሳኦል ሳሜላራ ምስ። 25 ኤንቲ ጎይኖ በሳፈ ዱገ ካታማ ዎꬍን፥ ኬꬃ ቦላ ደእያ በሳን ሳሜል ሳኦላራ ኦደትስ።

26 ሳእ ዎንትን፥ ሳሜል ሳኦላ ኬꬃ ቦላፈ ፄግድ፥ “ደንዳ፤ ታ ነና ሞይዛና” ያግስ። ሳኦል ደንድን፥ ናምአይ ኦገ ቦላ ከይዶሶና። 27 ኤንቲ ካታማ ጋፃ ጋክሽን፥ ሳሜል ሳኦላኮ፥ “ነ ኦሳንቾይ ስን ባና መላ ኦዳ” ያግስ። ኦሳንቾይ ስን አꬍድ ብን፥ ሳሜል ሳኦላኮ፥ “ፆሲ ግዳባ ታ ነዉ ኦዳና መላ ሀይሳን ጉꬁ ጋምአ” ያግስ።