1 ሄ ዎደ ሳሜል ትግያባራ ዛይተ ኤክድ፥ ሳኦላ ሁጰን ትይስ። ሳኦላ ዬርድ፥ ሀይሳዳ ያግስ፤ “ባ አሳ እስራኤለ ካለꬃና መላ ጎዳይ ነና ትይስ። *ግርከ ብርሸꬃይ፥ “ኔኒ እያ አሳ ካለꬃዳ ኤንታ ዩሹዋን ደእያ ሞርከታ ኩሸፐ ኤንታ አሻና። እያ ላታ ኔኒ ካለꬃና መላ ጎዳይ ነና ትይዳይሳስ ሀይስ ማላ” ያግድ ጉጅስ። 2 ኔኒ ሀች ታፐ ሻከታዳ ብያ ዎደ ራሄል ዱፉዋ ማታን ብንያመ ዛዋን ደእያ ፃልፃሀ ጌተትያ በሳን ናምኡ አሳታራ ጋሄታና። ኤንቲ ነና፥ ‘ነ ኮያናዉ ብዳ ሀረት በንትዶሶና፤ ሀእ ነ አዋይ ሀረታ ቆፐይሳ አግድ፥ ታ ናአይ ዋንደሻ?’ ያግድ ነዉ ህርጌስ” ያግድ ኦዳና።

3 ኔኒ ሄ በሳፈ ደንዳዳ፥ ታቦረ ግታ ምꬃ ጋካናዉ ባና። ፆሳኮ ቤተለ ብያ ሄꬑ አሳት ያን ኔራ ጋሄታና። ኤንታፈ እሶይ ሄꬑ ዴሻ ማር ቶክስ፤ ናምአንꬆይ ሄꬑ ኡይꬅ ቶክስ፤ ሄꬓንꬆይ ኦጎሮ ኩምꬃ ዎይነ ቶክስ። 4 ኤንቲ ነና ሳሮꬃና፤ ነዉ ናምኡ ኡይꬁ እማና፤ ነ ኤንታ ኩሸፐ ሄ ኡይꬃ ኤካናዉ ኮሼስ።

5 “ሄሳፈ ጉየ፥ ኔኒ ፍልስፄመ ኦላንቾታ ጩጋይ ደእያ ፆሳ ደርያ ግብአ ባና። ኔኒ ሄ ካታማ ጋክያ ዎደ ዲꬃራ ካራቦራ፥ ሱሱልኤነ ዛየ ፑንድ ካእሸነ ትንብተ ኦድሸ፥ ጎይኖ በሳፈ ዎꬍያ ናበ ጩጋራ ጋሄታና። 6 ጎዳ አያናይ ነ ቦላ ዎልቃን ዎꬋና፤ ኔኒ ኤንታራ ትንብተ ኦዳና፤ ኔኒ ላመታዳ ሀራ አስ ግዳና። 7 ሀ ማላት ፖለትያ ዎደ ፆሳይ ኔራ ደእያ ግሾ ነ ኦꬃናዉ ዳንዳእያባ ኡባ ኦꬃ።

8 “ኔኒ ታፐ ስንꬃታዳ ጋልጋላ ዎꬋ። ታኒ ፁሳ ያርሾነ ሳሮተꬃ ያርሾ ያርሻናዉ ኔኮ ባና። ታ ኔኮ ባዳ ነ ኦꬃናባ ኦዳና ጋካናዉ ላፑን ጋላስ ጋምአ” ያግስ።

9 ሳኦል ሳሜላፐ ሻከትዳ ዎደ ፆሳይ ሳኦላ ዎዛና ላምስ፤ ሳሜል ኦድዳ ማላት ኡባይ ሄ ጋላስ ሀንዶሶና። 10 ሳኦልነ እያ አይለይ ግብአ ጋክያ ዎደ ናበ ጩጋይ እያራ ጋሄትስ። ፆሳ አያናይ እያ ቦላ ዎልቃራ ዎꬍን እ ኤንታ ግዶን ትንብተ ኦደትስ። 11 ሳኦላ ካሰ ኤርያ ኡባይ እ ናበታራ ትንብተ ኦደተይሳ በእዳ ዎደ፥ “ቂሳ ናአይ ዋንዴ? ሳኦል ናበ ያሬ?” ያግዶሶና። 12 ሄ በሳን ደእያ እስ ኡራይ፥ “ኑ ኤንታ አዋይ ኦነኮ ኤርዉ?” ያግድ ኦይችስ። ሄሳ ግሾ፥ “ሳኦል ናበ ኮቼ?” ገይስ ሀይሰ ግድስ። 13 ሳኦል ትንብተ ኦደይሳ ዉርስዳፐ ጉየ ጎይኖ ዙማ ቦላ ከይስ።

14 ሳኦላ አዋ እሻይ ሳኦላነ እያ አይልያ፥ “አዉ ብደቲ?” ያግስ።

ሳኦል፥ “ሀረታ ኮያናዉ ብዳ፤ ሀረት በንቶና እፅን ሳሜላ ኦይቻናዉ ብዳ” ያግስ።

15 ሳኦላ አዋ እሻይ፥ “ሀያና ሳሜል ነዉ ግዳባ ታዉ ኦዳርኪ” ያግስ።

16 ሳኦል፥ “ሀረት በንትዳይሳ ናበይ ሳሜል ኑስ ጌሽድ ኦድስ” ያግስ። ሽን “ነ ካዎ ግዳና” ግድ ሳሜል እያዉ ኦድዳይሳ ባ አዋ እሻስ ኦድቤና።

17 ሄሳፈ ጉየ፥ ሳሜል ምፅጳን እስራኤለ አሳ ጎዳ ስንꬃን ሺሽስ። 18 ኤንታ፥ “ጎዳይ፥ እስራኤለ ፆሳይ ሀይሳዳ ያጌስ፤ ‘ታኒ እስራኤለ ግብፀፈ ከሳስ፤ ግብፀ አሳ ኩሸፐነ ህንተና ኡንኤꬅያ ካዎተꬃታ ኡባ ኩሸፐ አሻስ።’ 19 ሽን ሀች ህንተና ህንተ መቱዋፐነ ዋያፐ አሽያ ታና ህንተ ፆሳ እፅደታ። ‘አካይ፥ ኑስ ካዎ ካዎꬃ’ ያግደታ። ሄሳ ግሾ፥ ሀእ ህንተ፥ ህንተ ኮቻን ኮቻን ግድድ ጎዳ ስን ሺቅተ” ያግስ።

20 ሳሜል እስራኤለ ዛረ ሺሽን፥ ብንያመ ኮቻይ ዶረትስ። 21 ብንያመ ኮቻ ሺሽን፥ ማፅራ ኮቻይ ዶረትስ። ዉርሰꬃን ቂሳ ናአይ ሳኦል ዶረትስ፤ ኤንቲ እያ ኮይዶሶና፥ ሽን እ በንትቤና። 22 ሄሳ ግሾ ኤንቲ፥ “አደይ ሀ በሳ ይዴ?” ያግድ ጎዳ ኦይችዶሶና።

ጎዳይ፥ “ኤ፥ ሳኦል ሚሸ ግዶን ቆሰትድ ኡትስ” ያግስ።

23 ኤንቲ ዎፅ ብድ፥ ቆሰትዳ በሳፈ ከስ ኤህዶሶና። አሳ ግዶን እ ኤቅያ ዎደ አስ ኡባይ እያ ሀሸፐ ጋርሳራ አትያ አዱሳ አስ። 24 ሳሜል አሳኮ፥ “ጎዳይ ዶርዳ አድያ በእቴ? እያ ዳንያ አስ ሀ አሳ ግዶን ኦንካ ባዋ” ያግስ።

አሳ ኡባይ ባንታ ቃላ ꬎቁ ኦꬅድ፥ “ካዎይ ብራታ ቱስ ግዶ” ያግስ።

25 ሄሳፈ ጉየ፥ ሳሜል ካዎተꬃ ዎጋ አሳስ ኦድስ፤ ፃꬃ ማፃፋን ሄ ዎጋ ፃፍድ ጎዳ ስንꬃን ዎꬅስ። ያትድ ሳሜል አሳ ኡባ ባ ሶ ሶ ሞይዝስ።

26 ሳኦል ባ ሶ ግብአ ብስ፤ ፆሳይ ኤንታ ዎዛና ቦችዳ ምኖ አሳት ሳኦላራ ብዶሶና። 27 ሽን እስ እስ ፓꬆና አሳት፥ “ሀ አደይ ኑና ዋትድ አሻኔ?” ያግዶሶና። ኤንቲ እያ ካꬍድ፥ እያዉ አይ እሞታካ እምቦኮና። ሽን ሳኦል ስእ ግስ።