1 ጎዳይ ሳሜላኮ፥ “እስራኤለ ቦላ እ ካዎ ግዶና መላ ታኒ እፅዳ ሳኦላስ ኔኒ አዉደ ጋካናዉ ዬካይ? አነ ካጨን ዛይተ ኩንꬃዳ ቤተለመ አድያ እሰየኮ ባ፤ ካዎ ግዳና መላ ታኒ እያ ናይታ ግዶፈ እሱዋ ዶራ ዎꬃስ” ያግስ።

2 ሳሜል፥ “ታኒ ዋናዳ ቦ? ሳኦል ስእድ ታና ዎꬋና” ያግስ።

ጎዳይ፥ “እስ ኡስ ኤካ ባዳ፥ ‘ታኒ ጎዳስ ያርሻናዉ ያስ’ ያጋ። 3 እሰየካ ያርሾስ ፄጋ። ነ ኦꬃናባ ታ ነና በሳና፤ ታ ነና በሰይሳ ትያ” ያግስ።

4 ሳሜል ጎዳይ ኦድዳይሳ ኦꬅስ፤ ቤተለመ ብድ ካታማ ጭማታራ ጋሄትዳ ዎደ ኤንቲ ኮኮርሸ እያኮ ይድ፥ “ነ ሳሮ ያዲ?” ያግድ ኦይችዶሶና።

5 ሳሜል፥ “ኤ፥ ሳሮ ያስ፤ ታ ጎዳስ ያርሻናዉ ያስ፤ ህንተካ ጌይድ ታራ ያርሾስ የꬍተ” ያግስ። ቃስ እሰየነ እያ ናይታ ጌሽድ ኤንታ ያርሾስ ፄግስ።

6 ኤንቲ ያ ጋክያ ዎደ ሳሜል እሰየ ናኣ ኤልያባ በእድ፥ “ቱማ እያ ስንꬃን ኤቅዳ፥ ጎዳይ ትያ ኡራይ ሀይሳ” ያግድ ቆፕስ።

7 ሽን ጎዳይ ሳሜላ፥ “እያ ማላ ዎይኮ እያ አዱሳተꬃ ፄሎፋ፤ ታኒ እያ ካꬋስ። ታኒ ጎዳይ አስ በኤይሳዳ በእከ፤ አስ ሶምኦ በኤስ፥ ሽን ጎዳይ ዎዛና በኤስ” ያግስ።

8 እሰየይ አብናዳበ ፄግድ፥ ሳሜላ ስን አꬅን፥ ሳሜል፥ “ጎዳይ ሀይሳካ ዶርቤና” ያግስ። 9 እሰየይ ሳማ አꬅን፥ ሳሜል፥ “ጎዳይ ሀይሳካ ዶርቤና” ያግስ። 10 ሄሳዳ ኦꬅድ፥ እሰየይ ባ ናይታ ላፑናታ ሳሜላ ስን አꬅስ፤ ሽን ሳሜል እሰየኮ፥ “ጎዳይ ሀይሳታ ዶርቤና” ያግስ። 11 ሳሜል፥ “ነዉ ደእያ አደ ናይት ሀይሳታ ፃላሌ?” ያግድ እሰየ ኦይችስ።

እሰየይ፥ “ኡባፈ ካሎ ናአይ አትስ፤ ሽን እ ዶርሰ ሄማናዉ ብስ” ያግስ።

ሳሜል፥ “ኪታዳ እያ ኤህሳ፤ እ ያና ጋካናዉ ኑ ማናዉ ኡቶኮ” ያግስ። 12 እሰየይ ኪትድ ናኣ ኤህስስ፤ ሄ ናአይ አርሰ፤ አይፈይ ሎኦነ ማላ ሎኦ ናአ።

ጎዳይ ሳሜላ፥ “ታ ዶርዳይ ሀይሳ ግድያ ግሾ ደንዳ ኤቃዳ ትያ” ያግስ። 13 ሳሜል ካጨን ኩምዳ ዛይተ ኤክድ፥ እያ እሻታ ስንꬃን ዳዊታ ትይስ። ሄ ጋላሳፐ ዶምድ፥ ጎዳ አያናይ ዳዊታ ቦላ ዎልቃን ዎꬍስ። ሄሳፈ ጉየ፥ ሳሜል ደንድድ፥ ራማ ብስ።

14 ጎዳ አያናይ ሳኦላፐ ሻከትን ጎዳፐ ኪተትዳ ኢታ አያናይ ሳኦላ ዋይሴስ። 15 ሳኦላ አይለት፥ “ፆሳፈ ኪተትዳ ኢታ አያናይ ነና ዋይሴስ። 16 ኑኒ ዲꬅ ዲፅያ አስ ኮይድ ኤሀና መላ ኑ ጎዳይ ባ አይለታ ኪቶ። ፆሳፈ ኪተትዳ ኢታ አያናይ ነና ኦይክያ ዎደ ሄ ኡራይ ዲꬅ ዲፅኮ ነዉ ሎኦ ግዳና” ያግዶሶና።

17 ሳኦል ባ አይለታ፥ “ዲꬅ ዲፅያ አስ ኮይድ ታዉ ኤህተ” ያግስ።

18 አይለታፐ እሶይ፥ “ቤተለመን እሰየስ ዲꬅ ዲፅያ እስ ናእ ደኤስ። ሄ ናአይ ፃላነ ቶራንቾ። እ ማላ ሎኦነ ጭንጫ፤ ጎዳይ እያራ ደኤስ” ያግስ።

19 ሳኦል እሰየኮ ኪትድ፥ “ዶርሰ ሄምያ ነ ናኣ ዳዊታ ታዉ የዳ” ያግስ። 20 እሰየይ ኡይꬁነ ኦጎሮ ዎይነ ኡሹ ሀረን ጫንድ፥ እስ ኮለ ጎሽስድ ባ ናኣ ዳዊታራ ሳኦላስ የድስ።

21 ዳዊቲ ሳኦላኮ ይድ ኦሶ ዶምስ። ሳኦል ዳዊታ ዳሮ ዶስስ፤ ዳዊቲ ሳኦላስ ኦላ ሚሸ ቶከይሳ ግድስ። 22 ሳኦል፥ “ዳዊቲ ታዉ ኦꬅሸ ታ ማታን ጋምኦ፤ ታኒ እያ ዶሳስ” ያግድ እሰየኮ ኪትስ።

23 ሄሳፈ ስምን፥ ፆሳፈ ኪተትዳ ኢታ አያናይ ሳኦላ ኦይክያ ዎደ ኡባን ዳዊቲ ዲꬅ ኤክድ ዲፄስ። እ ዲፅያ ዎደ ኢታ አያናይ ሳኦላ የዴስነ እያዉ ሎኤስ።