1 ፍልስፄመት ባንታ ኦላንቾታ ይሁዳን ደእያ ሶኮ ጌተትያ በሳን ኦላስ ሺሽዶሶና። ኤንቲ ሶኮፐነ አዜቃፐ ግዶን ደእያ ኤፌስ-ዳምማ ጌተትያ በሳን ሺቅድ ኡትዶሶና። 2 ሳኦልነ እስራኤለት ኤላ ዛንጋራን ሺቅድ፥ ፍልስፄመታራ ኦለታናዉ ከይዶሶና። 3 ፍልስፄመ ኦላንቾት እስ ባጋ ዙማ ቦላ ሳልፕን፥ እስራኤለት ሀንኮ ባጋ ዙማን ሳልፕዶሶና፤ ዛንጋራይ ኤንታዉ ግዶን ደኤስ።

4 ጋተ ካታማን ደእያ ጎልያዳ ጌተትያ እስ ቶራ ቃራ አደይ ፍልስፄመት ዱንካንዳ ጉታፐ ከይስ፤ እያ ጌሳይ ኡሱፑን ዋꬋነ ታካꬎ። 5 እ እሻታማነ ላፑን ክሎ ግራመ ዴፅያ ናሰ ብራታ ፁሩረ ማእስ፤ ቃስ ናሰ ብራታ ባርኔፃ ባ ሁጰን ዎꬅስ። 6 ናሰ ብራታ ጋምባለ ባ ቶሆን አꬅስ፤ ባ ሀሽያን ናሰ ብራታ ቶራ ቶክስ። 7 እያ ቶራ ቶማይ ዋንዳራሸ መላ ኦርደ፤ እያ ቶራ አይፈይ ላፑን ክሎ ግራመ ዴፄስ፤ እያ ጎንዳልያ ቶክያ እስ አደይ እያ ስንꬃን ሄመቴስ።

8 ጎልያድ ኤቅድ ባ ቃላ ꬎቁ ኦꬅድ፥ “እስራኤለ ኦላንቾታ ቦላ ሀይሳዳ ያግድ ጋይሬስ፤ ህንተ ዋናና ግድ ኦላስ ከይደቲ? ታኒ ፍልስፄመ አስ፤ ህንተ ቃስ ሳኦላ አይለታ ግደከቲ? አነ ህንተ ግዶፈ እስ አስ ዶርተ፤ ሄ አደይ ታኮ ዱገ ዎꬎ። 9 ሄ አደይ ታራ ኦለትድ ታና ዎꬍኮ፥ ኑኒ ህንተ አይለ ግዳና፤ ሽን ታኒ እያ ፆናዳ ዎꬍኮ ህንተ ኑ አይለ ግዳናነ ኑስ ሃረታና” ያግስ። 10 ቃስካ ሄ ፍልስፄመ አደይ፥ “ታኒ ሀች እስራኤለ ኦላንቾታ ማንዳይስ፤ ታዉ እስ አስ እምተ፤ አነ ናምአይ ኦለታና” ያግስ። 11 ሳኦልነ እስራኤለት ፍልስፄመ አድያ ቃላ ስእድ ዳጋምዶሶና፥ ዳሮ ያይዶሶና።

12 ዳዊቲ ይሁዳ ቢታን ቤተለመን ደእያ ኤፍራታ አድያ እሰየ ናአ። እሰየስ ሆስፑን አደ ናይት ደኦሶና፤ ሳኦላ ካዎተꬃ ላይꬃን እሰየይ ዳሮ ላይꬅ ደእዳ ጭማ። 13 እሰየ ሄꬑ ባይራ አደ ናይት ሳኦላ ካልድ ኦላ ብዶሶና። ኤንታ ሱንꬃይ:- ባይራይ ኤልያባ፤ ካሎይ አምናዳበ፤ ሄꬓንꬆይ ሳማ። 14 ዳዊቲ ናይታ ኡባፈ ካሎ፤ ባይራ ሄꬑ ናይት ሳኦላ ካልዶሶና። 15 ሽን ዳዊቲ ባ አዋ ዶርሳታ ሄማናዉ ሳኦላ ማታፐ ቤተለመ ስመረቴስ።

16 ሄ ፍልስፄመ አደይ ኦይታሙ ጋላስ ዎንታነ ኦማርስ ይድ እስራኤለታ ማንዴስ።

17 እስ ጋላስ እሰየይ ባ ናኣ ዳዊታ ሀይሳዳ ያግስ፤ “ሀ ጫጨትዳ ትያፐ ላታሙ ክሎ ግራመነ ሀ ታሙ ኡይꬃታ ኤካዳ ነ እሻታስ ኤፋዳ ነ እሻት ዱንካንዳ ጉታ ኤለ ጋꬃ። 18 ሀ ታሙ ኑካ ፕላ ኤንታ ሻላቃስ ኤፋ፤ ነ እሻት ዋን ደእያኮ በአዳ፥ ኤንቲ ሳሮ ደኤይሳስ ማላታ ኤንታፈ ኤካዳ ያ። 19 ካዎይ ሳኦል፥ ነ እሻትነ እስራኤለ አሳ ኡባይ ፍልስፄመታራ ኦለትሸ ኤላ ዛንጋራን ደኦሶና” ያግስ።

20 ዳዊቲ ጉራ ደንድድ ዶርሳታ ሀራ አስ ሄንꬅድ፥ እሰየይ ኪትዳባ ጫን ኤክድ ብስ። እስራኤለ ኦላንቾት ባንታ ቃላ ꬎቁ ኦꬅድ ጋይርሸ ኦላስ ከይሽን ዳዊቲ ጋክስ። 21 እስራኤለትነ ፍልስፄመት እሶይ እሱዋኮ ስሚድ ሳልፕዶሶና። 22 ዳዊቲ ባ ኤህዳባ ሽንቀ ናገይሳ ኩሸን ዎꬅድ፥ ኦላ ሳልፕያ ግዶ ዎፅ ብድ፥ ባ እሻታ ሳሮꬅስ። 23 ዳዊቲ ባ እሻታራ ሃሳይሽን፥ ጋተፐ ይዳ ቶራ ቃራይ፥ ፍልስፄመ ጎልያድ ባ ሳልፕያፈ ጋፃ ከይድ ካሰይሳዳ እስራኤለታ ማንድሽን ዳዊቲ ስእስ። 24 እስራኤለ አሳ ኡባይ ሄ አድያ በእዳ ዎደ ዳሮ ያይድ ባቃትዶሶና።

25 እስራኤለ አሳይ እሶይ እሱዋኮ፥ “ሀ ከይያ አድያ በእደቲ? እ ቱማ እስራኤለ ማንዳናዉ ከይስ። ሀ አድያ ዎꬍያ ኡራስ ካዎይ ሳኦል ዳሮ ሻሎ እማና፤ ባ ናእዉካ እያዉ እማና፤ እያ አዋ ኬꬃ አሳይ እስራኤለን ካዎ ጊራ ጊረና” ያግዶሶና።

26 ዳዊቲ ባ ማታን ኤቅዳ አሳ፥ “ሀ ፍልስፄመ አድያ ዎꬍድ፥ ሀ ዬላ እስራኤለፐ ደንꬅያ ኡራስ አይበ ኦሰታናይ? ሀ ቃፃረትቦና ፍልስፄመይ ደኦ ፆሳ ኦላንቾታ ማንደይ እ ኦኔ?” ያግድ ኦይችስ።

27 ኤንቲ፥ “ሀ አድያ ዎꬍያ ኡራስ ሀይስ ሀይስ ኦሰታና” ያግድ ካሰይሳዳ ዛርዶሶና።

28 ዳዊቲ አሳራ ኦደተይሳ እያ ባይራ እሻይ ኤልያብ ስእድ፥ ዳዊታ ቦላ ሸነ ኤፅስ። “ኔኒ ሀ በሳ አይስ ያዲ? ሄ ጉꬃ ዶርሳታ ባዞን ኦደስ የጋዲ? ነ ኦቶሩዋነ ነ ዎዛና ኢታተꬃ ታ ኤራይስ፤ ኔኒ ኦላ በአናዉ ያዳሳ” ያግስ።

29 ዳዊቲ፥ “ታኒ ሀእ አይ ኦꬃድና? ሀር አቶሽን ኦደታናዉካ ዳንዳእክና?” ያግስ። 30 ዳዊቲ ባ እሻ አግድ፥ ሀራ አሳኮ ስሚድ፥ ካሰይሳዳ ኦይችን አሳይ እያዉ ካሰይሳዳ ዛርዶሶና።

31 ዳዊቲ ኦድዳይሳ ስእዳ አሳይ ሳኦላስ ኦድን፥ ሳኦል ዳዊታ ፄግስስ። 32 ዳዊቲ ሳኦላኮ፥ “ሀ አድያ ጋሶን ኦደ ዎዛንካ ትልኦፎ፤ ታኒ ነ አይለይ ባዳ፥ ሀ ፍልስፄመ አድያራ ኦለታና” ያግስ።

33 ሳኦል ዳዊታኮ፥ “ኔኒ ናአ፤ እ ባ ናአተꬃፈ ዶምድ ኦላ ሜዘትድ ድጭዳ ግሾ፥ ሀ ፍልስፄመ አድያራ ኔኒ ኦለታናዉ ዳንዳአካ” ያግስ።

34 ሽን ዳዊቲ፥ “ታኒ፥ ነ አይለይ ታ አዋ ዶርሳታ ሄምያ ዎደ ጋሞይ ዎይኮ ጋርማፌለይ ከይድ ዶርሰ ኦይክያ ዎደ፥ 35 እያ ካላ ባዳ እያ ዶናፐ ዎꬃ ኤካይስ። ታኮ ስምያ ዎደ ቆꬍያ ጩላዳ ዎꬋይስ። 36 ታኒ ነ አይለይ ጋሞነ ጋርማፌለ ዎꬋስ፤ ሀ ቃፃረትቦና ፍልስፄመ አደይ ደኦ ፆሳ ኦላንቾታ ጉꬅዳ ግሾ እ ኤንታፈ እሱዋዳ ሀናና። 37 ጋሞፈነ ጋርማፌለፐ ታና አሽዳ ጎዳይ፥ ሀ ፍልስፄመ አድያ ኩሸፐ ታና አሻና” ያግስ።

ሳኦል ዳዊታኮ፥ “ባ፥ ጎዳይ ኔራ ግዶ” ያግስ።

38 ሳኦል ባ ማኡዋ ዳዊታ ማይዝስ፤ ዳዊታ ሁጰን ናሰ ብራታ ባርኔፃ ዎꬅስ፤ ናሰ ብራታ ፁሩርያ ዳዊታ ማይዝስ። 39 ዳዊቲ ባ ኦላ ማኡዋ ቦላ ማሻ ዳንጭድ ሄመትድ በእስ። ሽን ሄሳ መላ ማኦ ማእድ ኤሮና ግሾ ሄመታናዉ ዳንዳእቤና።

ሄሳ ግሾ፥ ዳዊቲ ሳኦላኮ፥ “ታኒ ሀይሳ መላ ማኦ ማአዳ ሜዘታቦና ግሾ ሀይሳራ ባናዉ ዳንዳእከ” ያግድ ኦላ ማኡዋ ቃርስ። 40 ዳዊቲ ባ ሄንꬃ ፃምአ ኦይክድ፥ ሻፋፐ እቻሹ ሙሉሙቀ ሹቹ ዶር ኤክድ፥ ባ ሄንꬃ ቃርፂታን የግድ፥ ባ ያምባርሻ ኦይክድ፥ ጎልያዳኮ ሺቅስ።

41 ጎልያድ ባ ጎንዳልያ ቶክያ አድያራ እስፈ ሄመትሸ ዳዊታኮ ማትስ። 42 እ ዳዊታ ትሽ ኦꬅ ፄልድ፥ ዳዊቲ አርሰ፥ ማላ ሎኦነ ናአ ግደይሳ በእድ ካꬍስ። 43 እ ዳዊታኮ፥ “ኔኒ ፃምአ ኦይካዳ ታኮ ያናዉ ታና ካና ጋዲ?” ያግስ። ባ ፆሳታ ሱንꬃን ዳዊታ ባድስ። 44 ካልድ ዳዊታኮ፥ “ሃያ፤ ታኒ ነ አሹዋ ሳሎ ካፎታስነ ሳአ ዶአታስ እማና” ያግስ።

45 ዳዊቲ፥ “ኔኒ ማሻ፥ ቶራነ ጉምባ ኦይካዳ ታኮ ያሳ፤ ሽን ታኒ ኡባፈ ዎልቃማ ጎዳ ሱንꬃን፥ ኔኒ ጉꬅዳ እስራኤለ ኦላንቾታ ፆሳ ሱንꬃን ነ ቦላ ያይስ። 46 ሀች ጎዳይ ነና ታ ኩሸን አꬅድ እማና፤ ታኒ ነና ሾጫና፤ ነ ቆꬍያ ሙጫ ሆላና። ፍልስፄመ ኦላንቾታ አሀ ሳሎ ካፎታስነ ሳአ ዶአታስ ሀች እማና። ሄ ዎደ እስራኤለን ፆሲ ደኤይሳ ሳአን ደእያ አሳ ኡባይ ኤራና። 47 ጎዳይ ባ አሳ አሻናዉ ቶራ ዎይኮ ማሸ ኮዮናይሳ ሀይሳን ሺቅዳ አሳ ኡባይ ኤራና። ኦላይ ጎዳባ ግድያ ግሾ፥ እ ህንተና ኡባ ኑ ኩሸን አꬅድ እማና” ያግስ። 48 ፍልስፄመ አደይ ደንድድ፥ ዳዊታራ ኦላ ጋሄታናዉ ሺቅዳ ዎደ ዳዊቲ እያራ ጋሄታናዉ ኦላ ደምባ ዎፅድ ብስ። 49 ዳዊቲ ባ ቃርፂታን ኩሸ የድድ፥ እስ ሹቹ ኤክ ያምባርድ፥ ፍልስፄመ አድያ ሶምኡዋን ጫድስ። ሹቻይ እያ ሶምኡዋ ሉክድ ገልስ፤ ያትን፥ አደይ ባ ሶምኡዋራ ሳአን ኩንድስ።

50 ዳዊቲ ፍልስፄመ አድያ ያምባርሻንነ ሹቻን ፆንስ። ዳዊቲ ባ ኩሸን ማሽ ባይና ፍልስፄመ አድያ ጫድድ ዎꬍስ። 51 ዳዊቲ ዎፅ ብድ፥ እያ ቦላ ከይ ኤቅድ፥ እያ ዎꬍድ፥ ፍልስፄመ አድያ ማሻ ሾሁዋፐ ሾድድ፥ እያ ቆꬍያ ሙጭ የግስ።

ፍልስፄመት ባንታ ቶራ ቃራይ ሀይቅዳይሳ በእዳ ዎደ ባቃትዶሶና። 52 እስራኤለ አሳይነ ይሁዳ አሳይ ደንድድ ገሬርሸ፥ ፍልስፄመታ ጋተነ ኤቅሮና ፐንገታ ጋካናዉ የደꬅዶሶና። ፍልስፄመ አሳ አሀይ ጋተነ ኤቅሮና ጋካናዉ ሻእራይማ ኤፍያ ኦግያ ኡባን ኩንድስ። 53 እስራኤለ አሳይ ፍልስፄመታ የደꬅ ስሚድ፥ ኤንቲ ዱንካንዳ ጉታ ቦንቅዶሶና። 54 ዳዊቲ ፍልስፄመ አድያ ሁጵያ የሩሳላመ ኤህስ፤ ሽን ፍልስፄመ አድያ ኦላ ሚሽያ ባ ዱንካንያ ግዶን ዎꬅስ።

55 ዳዊቲ ፍልስፄመ አድያራ ኦለታናዉ ብሽን፥ ሳኦል በእድ፥ ቶራ ሞጮና አበኔራ፥ “ሀ ናአይ ኦደ ናኤ?” ያግድ ኦይችስ።

አበኔር ዛሪድ፥ “ካዋዉ፥ ቱማ ነ አሾ ታኒ እያ ኤርከ” ያግስ።

56 ካዎይ ዛሪድ፥ “ሀ ናአይ ኦደ ናኤኮ አነ ኦይቻ” ያግስ።

57 ዳዊቲ ፍልስፄመ አድያ ዎꬍድ ስምዳ ዎደ አበኔር እያ ሳኦላ ስን ኤህስ። ሄ ዎደ ዳዊቲ ሙጭዳ ፍልስፄመ አድያ ሁጵያ ባ ኩሸን ኦይክድ ኡትስስ። 58 ሳኦል፥ “ታ ናአዉ፥ ነ ኦደ ናኤ?” ያግድ ኦይችስ።

ዳዊቲ ዛሪድ፥ “ታኒ ቤተለመን ደእያ ነ ኦሳንቹዋ፥ እሰየ ናአ” ያግስ።