18
ዳዊታነ ዮናታና
1 ዳዊቲ ሳኦላራ ሃሳያ ዉርስዳፐ ጉየ፥ ሳኦላ ናአይ ዮናታን ዳዊታራ ዳሮ ማታ ዳቦተꬅ መꬍስ፤ ዮናታን ዳዊታ ባ ሸምፑዋዳ ዶስስ። 2 ሄ ጋላሳፐ ዶምድ፥ ሳኦል ዳዊታ ባራ ዎꬅስ፤ ባ አዋ ሶ ጉየ ስሞና መላ ድግስ። 3 ዮናታን ዳዊታ ባ ሁጰዳ ዶስያ ግሾ እያራ ጫቅስ። 4 ዮናታን ባ ማእዳ ካባ፥ ባ ኦላ ማኡዋ፥ ባ ማሻ፥ ባ ዶንግያነ ባ ሳቅያ ከስድ ዳዊታስ እሚስ።
5 ሳኦል ኪትዳ ኡባ ዳዊቲ ናገትድ ኦꬅያ ግሾ፥ ሳኦል ዳዊታ ባ ኦላንቾታ ግዶን ሀላቃ ኦꬅድ ሹምስ። ሄስ አሳ ኡባነ እያ ሞርናታ ኡፋይስስ።
6 ዳዉተ ፍልስፄመ አድያ ጎልያዳ ዎꬍን፥ አሳይ ሶ ስምያ ዎደ ማጫሳይ ኡፋይሳ የꬅ የፅሸነ ዱርሸ፥ ካራቦ ባቅሸነ ዲꬅ ዲፅሸ፥ ካዋ ሳኦላ ሞካናዉ እስራኤለ ካታማታ ኡባፈ ከይዶሶና። 7 ማጫሳት ዱርሸ፥
“ሳኦል ሙኩላታ ዎꬍስ፤
ዳዊቲ ታሙ ሙኩላታ ዎꬍስ”
ያግድ የፅዶሶና። 8 ሳኦላ ሀ የꬃይ ሻትን፥ ዳሮ ሀንቀትስ። ሳኦል ባ ቆፋን፥ “ዳዊቲ፥ ‘ታሙ ሙኩላታ ዎꬋዳሳ ግድ፥ ታና ሙኩላታ ዎꬋዳሳ’ ግዶሶና። ያትን፥ ካዎተꬃፈ አትሽን ሀር አይብ አትዴ?” ያግስ። 9 ሄ ዎደፐ ዶምድ ሳኦል ዳዊታ ቃናተ አይፈን ፄሌስ።
10 ዎንተꬃ ጋላስ ኢታ አያን ፆሳፈ ኪተትድ ሳኦላ ኦይክን፥ ሳኦል ባ ሶን ኤልሞቴስ። ዳዊቲ ካሰይሳዳ ዲꬅ ዲፅሽን ሳኦል ቶራ ባ ኩሸን ኦይክድ ኡትስ። 11 እ፥ “ዳዊታ ጎዳራ ጋꬃዳ ስካና” ያግ ቆፕድ ቶራ ፆንግስ። ሽን ዳዊቲ ናምኡ ቶሆ እያፐ አትስ።
12 ጎዳይ ሳኦላ አግድ ዳዊታራ ደእያ ግሾ ሳኦል ዳዊታ ያይስ። 13 ሳኦል ዳዊታ ባ ስንꬃፈ ሃሳናዉ ኮይድ ሙኩሉ ኦላንቾታስ ሀላቃ ኦꬅስ። ያትን፥ ዳዊቲ ባ ጩጋ ኦላስ ካለꬅስ። 14 ጎዳይ ዳዊታራ ደእያ ግሾ እ ኦꬅያባይ ኡባይ እያዉ እንጀቴስ። 15 ዳዊቲ ኦꬅያባ ኡባይ እንጀተይሳ ሳኦል በእድ እያዉ ዳሮ ያይስ። 16 ሽን ዳዊቲ ኤንታ ኦላን ካለꬅያ ግሾ እስራኤለ አሳይነ ይሁዳ አሳ ኡባይ እያ ዶሶሶና።
17 ሳኦል ዳዊታኮ፥ “ታ ናአ ባይርያ መራባ ሀናሹ፤ ታኒ እዮ ነዉ ማቾ እማና፤ ኔኒ ምኖ አስ ግዳ፤ ጎዳ ኦላ ኦለታ” ያግስ። ሳኦል ባ ዎዛናን፥ “ታኒ እያ ቦችከ፤ ፍልስፄመት እያ ዎꬎ” ያግድ ቆፕስ። 18 ሽን ዳዊቲ፥ “ካዎራ ቦሎታናዉ ታኒ ኦኔ? ታ ሶ አሳይ አይቤ? ዎይኮ ታ አዋ ያራይ እስራኤለ አሳ ግዶን አይቤ?” ያግስ። 19 ሽን ሳኦላ ናእያ መራባ ዳዊታስ እመትያ ዎደይ ጋክን፥ ማሆላ አድያ አድርኤላስ እመታሱ።
20 ግዶሽን፥ ሳኦላ ናእያ መልኮላ ዳዊታ ዶሳሱ፤ ሳኦል ሄሳ ስእድ ኡፋይትስ። 21 እ ባ ዎዛናን፥ “እያዉ ፅሄ ግዳና መላነ ፍልስፄመት እያ ዎꬋና መላ ታኒ ምልኮሎ ዳዊታስ እማና” ያግድ ቆፕስ። ሄሳ ግሾ፥ ሳኦል ዳዊታ፥ “ኔኒ ታራ ቦሎታናዉ ናምአንꬆ ቃዳ ነዉ እማስ” ያግስ።
22 ሳኦል ባ ኦሳንቾታ ፄግድ፥ “ ‘ካዎይ ነናን ኡፋይትስ፤ እያ አይለት ኡባይ ነና ዶሶሶና፤ ሀእ ኔኒ ካዉዋራ ቦሎታ’ ያግድ ዱማ ዳዊታስ ኦድተ” ያግድ ኪትስ።
23 ሳኦል ግዳይሳዳ ኤንቲ ዳዊታስ ኦድዶሶና። ሽን ዳዊቲ፥ “ካዎራ ቦሎታናይስ ህንተዉ ላፋባ ዳንዬ? ታኒ ማንቆነ ኤረቶና አስ” ያግድ ዛርስ።
24 ሳኦላ ሞርናት ዳዊቲ ግዳባ ሳኦላስ ኦድዶሶና። 25 ሳኦል ባ አይለታኮ፥ “ዳዊታስ ሀይሳዳ ያግድ ኦድተ፤ ‘ካዎይ ባ ሞርከታ ሀሎ ከያናዉ ፄቱ ፍልስፄመ አሳታ ቃራትድ ኤሀና መላፐ አትሽን፥ ኔፐ ሀራ ኮይታ ኮየና’ ያግተ” ያግስ። ሳኦል ሄሳ ግዳይ ዳዊቲ ፍልስፄመታ ኩሸን ሀይቃና መላ ቆፕዳ ግሾሳ።
26 ሳኦላ አይለት ሳኦል ግዳባ ዳዊታስ ኦድዶሶና፤ ካዋራ ቦሎታናይስ ዳዊታ ኡፋይስስ። ዎደይ አꬋናፐ ስን፥ 27 ዳዊቲነ እያ አሳይ ደንድ ብድ ፍልስፄመታፐ ናምኡ ፄቱ አሳ ዎꬍዶሶና። ዳዊቲ ካዋራ ቦሎታናዉ ሄ አሳታ ቃራት ኤህድ፥ ካዋስ ኩመꬅ ታይብድ ሼꬍስ። ሳኦል ባ ናእዉ መልኮሎ ዳዊታስ እሚስ።
28 ሳኦል ጎዳይ ዳዊታራ ደኤይሳነ እያ ናእያ ምልኮላ ዳዊታ ዶሰይሳ ኤርስ። 29 ሳኦል ዳዊታስ ካሰይሳፈ አꬅድ ያይስ። ሳኦል ባ ደኦ ላይꬃ ኡባን ዳዊታስ ሞርከ ግድስ።
30 ፍልስፄመ ኦላንቾት ኦላስ ከስ አግቦኮና። ሽን ኦላስ ከይዳ ዎደ ኡባን ሳኦላ ቶራ ሞጮናታፐ አꬅድ ፆኖይ ሀነይ ዳዊታሳ፤ ሄሳ ግሾ እ ኤረትዳ አስ ግድስ።