1 ዳዊቲ ካህንያ አብመለከኮ ኖባ ብስ። አብመለከይ ዳዊታራ ጋሄታናዉ ኮኮርሸ ይድ፥ “ኔኒ ነርካ ዋናዳ ያዲ? ኔራ አስ ዋንድ ባዌ?” ያግድ ኦይችስ።

2 ዳዊቲ ካህንያ አብመለከ፥ “ካዎይ ታኮ፥ ‘ታኒ ነና ኪትዳ ኪታነ ታ ነዉ ኦድዳባ ኦንካ ኤሮፖ’ ያግድ ታና ኪትስ። ታ አሳት እስ በሳን ታራ ጋሄታና መላ ኦዳ ዎꬃስ። 3 ሀእ ነ ኩሸን አይብ ደኢ? እቻሹ ኡይꬅ ዎይኮ ነዉ ደእያባ ታዉ እማ” ያግስ።

4 ካህነይ ዛሪድ፥ “ጮ አስ ምያ ኡይꬅ ታዉ ባዋ፤ ሽን ነ አሳት ባንታና ማጫሳፐ ናግዳባ ግድኮ፥ ኤንቲ ማናዉ ዳንዳእያ ጌሻ ኡይꬅ ደኤስ” ያግስ።

5 ዳዊተይ ዛሪድ፥ “ቱማ ኑኒ ሀ ኪታ ኤክድ ከይዳፐ ዶምድ፥ ማጫሳፐ ናገትዳ፤ ሀር አቶሽን ሀራ ኪታካ ኤክድ ከይያ ዎደ ኤንቲ ባንታ ጌሻተꬃ ናጎሶና። ሽን ሀች ዋንድ ጌያናዉ ኮሸኔ?” ያግስ። 6 ሄሳ ግሾ፥ ካህነይ ዳዊታስ ጌሻ ኡይꬃ እሚስ። ካህንያስ ደእያ ኡይꬃይ፥ ጎዳ ስንꬃን ዎꬃናዉ ሄ ጋላስ ሆኦ ኡይꬃራ ላመትዳ ኡይꬃፈ አትሽን፥ ሀር ባዋ።

7 ሳኦላ አይለታፐ እሶይ፥ እያ መህያ ሄመይሳታ ሀላቃይ፥ ዶይቃ ጌተትያ ኤዶመ አደይ፥ ሄ ጋላስ ጎዳ ስንꬃን ናግሸ ደኤስ።

8 ዳዊቲ አብመለከኮ፥ “ቶር ዎይኮ ማሽ ነዉ ዳንዴሻ? ካዋ ኪታይ ኤሶያ ግሾ ታኒ ታ ማሻ ዎይኮ ሀራ ኦላ ሚሸ ኤሀብከ” ያግድ ኦይችስ።

9 አብመለከይ፥ “ኔኒ ኤላ ዛንጋራን ዎꬍዳ ፍልስፄመ አድያ ጎልያዳ ማሻይ ሀይሳን ደኤስ፤ ጩርቃራ ፃፀትድ፥ ኤፉደ ማኡዋፐ ጉየ ባጋራ ደኤስ። ኔኒ ኮያባ ግድኮ እያ ኤካ፤ እያፐ አትሽን፥ ሀራ ማሽ ሀይሳን ባዋ” ያግስ።

ዳዊቲ፥ “እያ መላ ማሽ ባዋ፤ እያ ታዉ ሀማ” ያግስ።

10 ሄ ጋላስ ዳዊቲ ሳኦላፐ ባቃትድ፥ ጋተ ካዋ አንኩሳኮ ብስ። 11 ሽን አንኩሳ ሞርናት፥ “ሀይስ ዳዊቲ ባ ቢታን ካዎ ግደኔ? ማጫሳይ የፅሸነ ዱርሸ፥ ‘ሳኦል ሙኩሉ ዎꬍስ፤ ዳዊቲ ታሙ ሙኩሉ ዎꬍስ’ ያግድ ሳቢዳ አድያ ግደኔ?” ያግዶሶና።

12 ዳዊቲ ኤንታ ሃሳያ ባ ዎዛናን ስእድ፥ ጋተ ካዋ አንኩሳ ዳሮ ያይስ። 13 ሄሳ ግሾ፥ ዳዊቲ ኤንታ ስንꬃን ጎሹ ዳንስ። ኤንቲ እያ ኦይካና ሀንያ ዎደ ጎሻዳ ፐንገ እብꬃ ቃጨꬅ ኦይክስ፤ ቡቻራ ሳሶ ቆልስ። 14 አንኩስ ባ ኦሳንቾታኮ፥ “ሄኮ፥ ሀ አደይ ጎዬስ፤ ህንተ አይስ እያ ታኮ ኤህደቲ? 15 ሀ አደይ ታ ስንꬃን ጎያናዳ ህንተ ኤህዳይ፥ ታ ማታን ሀር ጎየይ ꬋይነዬ? ሀ አደይ ታ ሶ ገላናዉ በሲ?” ያግስ።