1 ዳዊቲ ጋተፐ ባቃትድ፥ አዱላማ ማታን ደእያ ጎንጎሉዋ ብስ። እያ እሻትነ እያ አዋ ሶ አሳ ኡባይ ሄሳ ስእዳ ዎደ ያ እያኮ ብዶሶና። 2 መቶትዳይ፥ አጮትዳይነ ሳእ ኢትዳ ኡባይ ዳዊታኮ ሺቅን፥ ኤንታ ታይቦይ ኦይዱ ፄቱ ግድስ፤ እ ኤንታ ሀላቃ ግድስ።

3 ዳዊቲ ያፐ ደንድድ ሞአበን ደእያ ምፅጳ ብድ ሞአበ ካዋ፥ “ፆሳይ ታዉ ኦꬃናባ ታ ኤራና ጋካናዉ ታ አዋነ አይዉ ነ ማታን ዎꬃርክ” ያግድ ዎስስ። 4 ዳዊቲ ኤንታ ሞአበ ካዋ ማታን ዎꬅስ፤ ዳዊቲ ቆሰትዳ በሳን ደእያ ዎደ ኡባን ኤንቲ ካዋ ማታን ደእዶሶና።

5 ሄሳፈ ጉየ፥ ናበይ ጋድ ዳዊታኮ ይድ፥ “ቆሰትዳ በሳን ጋምኦፋ፤ ሀይሳፈ ደንዳዳ ይሁዳ ቢታ ባ” ያግስ፤ ዳዊቲ ያፐ ከይድ ሄረታ ዎራ ብስ።

6 ዳዊቲነ እያ አሳይ በንትዳይሳ ሳኦል ስእስ። ሳኦል ግብአ ማታን ደእያ ደረ ቦላ፥ ታማርስከ ምꬃ ጋርሳን ቶራ ኦይክድ ኡትስ፤ እያ ሞርናት እያ ዩሹዋን ኤቅዶሶና። 7 ሳኦል ኤንታኮ፥ “ህንተኖ፥ ብንያመ አሳዉ፥ ስእተ፤ እሰየ ናአይ ጋደነ ዎይነ ቶክያ በሲ ህንተ ኡባስ እማኔ? ሻላቃታነ ማቶ ሀላቃታ ኦꬅድ ህንተና ሹማኔ? 8 ህንተ ኡባይ ታ ቦላ ማቀትደታ፤ ታ ናአይ እሰየ ናኣራ ጫቅዳባ ታዉ ኦንካ ኦድቤና። ህንተፈ እስ አስካ ታዉ ቃተና፤ ሀች ሀንዳይሳዳ ታ ናአይ ታ አይልያን ታና ዎꬍሳናዉ ደንꬅዳይሳ ታዉ ኦንካ ኦድቤና” ያግስ።

9 ሳኦላ ሞርናታራ ኤቅዳ ኤዶመ አደይ ዶይቅ፥ “እሰየ ናአይ አክፁባ ናኣ አብመለከኮ ኖባ ብዳይሳ ታኒ በአስ። 10 ዳዊቲ አይ ኦꬃነኮ አብመለከይ ጎዳ ኦይችስ፤ ያትድ ዳዊታስ ሽንቀነ ፍልስፄመ አድያ ጎልያዳ ማሻ እያዉ እሚስ” ያግድ ሳኦላስ ኦድስ።

11 ሄሳፈ ጉየ፥ አክፁባ ናኣ ካህንያ አብመለከነ ኖባን ካህነ ግድድ ደእያ እያ አዋ ሶ አሳ ኡባ ካዎይ ፄግስን፥ ኤንቲ ካዋኮ ይዶሶና። 12 ሳኦል፥ “አክፁባ ናአዉ፥ ስአ” ያግስ።

አብመለከይ፥ “ኤሮ ታ ጎዳዉ” ያግስ።

13 ሳኦል፥ “ኔራ እሰየ ናኣራ ታ ቦላ አይስ ማቀትደቲ? ኔኒ እያዉ ኡይꬅነ ማሸ እማዳ፥ እ ታና ዎꬋናዉ ደንዳና መላ እያ ግሾ ፆሳ አይስ ኦይቻዲ?” ያግስ።

14 አብመለከይ፥ “ነ ኦሳንቾታ ኡባ ግዶን ዳዊቲ መላ አማነተይ፥ ካዋ ቦሎይ፥ ነና ናገይሳታ ኪተይነ ነ ሶ አሳ ግዶን ዳሮ ቦንቸተይ እያ መል ኦኔ? 15 ታኒ እያ ግሾ ፆሳ ኦይችሽን፥ ሀይስ ታዉ ኮይሮ? ግደና፥ ካዋዉ፥ ታና ነ አይልያ ዎይኮ ታ አዋ ሶ አሳ ኡባ አይኮካ ሞቶፓ። ታኒ ነ አይለይ ሀ ኦዳባ ጉꬃ ግድን ዎይኮ ግታ ግድን ኤርከ” ያግስ።

16 ካዎይ፥ “አብመለከ፥ ነነ ነ አዋ ሶ አሳ ኡባይ ሀይቃና” ያግስ። 17 ሳኦል ባ ማታን ኤቅድ ናገይሳታ፥ “ጎዳ ካህነታ ዎꬍተ፤ ኤንቲ ዳዊታ ማድዶሶና። ዳዊቲ ባቃትዳይሳ ኤርሸ ታዉ ኦድቦኮና” ያግስ። ሽን ካዋ ናገይሳት ጎዳ ካህነታ ቦላ ባንታ ኩሽያ ደንꬆና እፅዶሶና።

18 ካዎይ ዶይቃ፥ “ኤንታ ነ ዎꬋ” ያግድ ኪትስ። ኤዶመ አደይ ዶይቅ ካህነታ ሾጭድ፥ ሄ ጋላስ ኤፉደ ማእዳ ሆስፑን ታማነ እቻሹ ካህነታ ዎꬍስ። 19 ቃስ ዶይቅ ካህነታ ካታማ፥ ኖባ ማሻን ዉርስስ፤ ሄ ካታማን ደእያ አደነ ማጫ፥ ናይታነ ዮጋ ናይታ፥ መሄታ፥ ሀረታነ ዶርሳታ ማሻን ዎꬍስ።

20 ሽን አክፁባ ናኣ አብመለከ ናይታፐ አብያታራ ጌተትያ እስ ናአይ ከስ ኤክድ፥ ዳዊታኮ ባቃትስ። 21 እ፥ ሳኦል ጎዳ ካህነታ ዎꬍዳይሳ ዳዊታስ ኦድስ። 22 ዳዊቲ አብያታራ፥ “ኤዶመ አደይ ዶይቅ ሄ በሳን ደኤይሳ ታኒ በእዳ ዎደ እ ሳኦላስ ኦዳናይሳ ሄ ጋላስ ኤራስ። ነ አዋ ሶ አሳ ኡባ ሀይቆስ ጋꬅዳይ ታና። 23 ህዛ ኔኒ ታራ ደአ፤ ያዮፋ። ነና ዎꬋናዉ ኮይያ ኡራይ ታና ዎꬋናዉ ኮዬስ፤ ኔኒ ታ ማታን ሳሮ ዳና” ያግስ።