1 ፍልስፄመት ቃእላ ኦልድ፥ ዉዱማን ደእያ ካꬃ ቦንቅዳይሳ ዳዊቲ ስእስ።

2 ዳዊቲ፥ “ታኒ ባዳ ፍልስፄመታ ኦሎ?” ያግድ ጎዳ ኦይችስ።

ጎዳይ፥ “ባ፤ ፍልስፄመታ ኦላ፤ ቃእላ አሻ” ያግስ።

3 ሽን ዳዊታ ካለይሳት፥ “ኑኒ ሀይሳን ይሁዳ ቢታን ደእሸ ዳሮባን ያዮስ። ፍልስፄመታራ ኦለታናዉ ቃእላ ኑ ቢኮ ኑና ኡባ ሳእ መታና” ያግዶሶና።

4 ዳዊቲ ዛሪድ ጎዳ ኦይችን ጎዳይ፥ “ፍልስፄመታ ታኒ ነዉ አꬃ እማና፤ ደንዳዳ ቃእላ ባ” ያግስ። 5 ዳዊቲነ እያ ካለይሳት ቃእላ ብድ፥ ፍልስፄመታራ ኦለትድ ኤንታ መህያ ድእዶሶና። ኤንታፈ ዳሮ አሳ ዎꬍድ፥ ዳዊቲ ቃእላ አሳ አሽስ።

6 አብመለከ ናአይ አብያታር ዳዊታኮ ቃእላ ባቃትዳ ዎደ ኤፉደ ማኡዋ ኤክድ ብስ።

7 ዳዊቲ ቃእላ ብዳይሳ ሳኦል ስእድ፥ “ፆሳይ ዳዊታ ታ ኩሸን አꬅድ እሚስ፤ ዳዊቲ ግምበን ድረትዳ ካታማ ገልድ ባና ባዉ ቃችስ” ያግስ። 8 ቃእላ ብድ፥ ዳዊቲነ እያ አሳ ተቃና መላ ሳኦል ባ ኦላንቾታ ኡባ ፄግስ።

9 ሳኦል ባ ቦላ ኢታባ ኦꬃናዉ ማቅዳይሳ ዳዊቲ ኤርድ ካህንያ አብያታራኮ፥ “ኤፉድያ ሃ ኤካ ያ” ያግስ። 10 ዳዊቲ፥ “አቤት ጎዳዉ፥ እስራኤለ ፆሳዉ፥ ታ ጋሶን ሳኦል ቃእላ ꬋይሳናዉ ማቅዳይሳ ታኒ ነ አይለይ ስአስ። 11 ቃእላ አሳይ ታና ሳኦላስ አꬅድ እማነሻ? ታኒ ነ አይለይ ስእዳይሳዳ ሳኦል ቱማካ ሃ ያነሻ? አቤት ጎዳዉ፥ እስራኤለ ፆሳዉ፥ ታዉ ነ አይልያስ ኦዳ” ያግስ።

ጎዳይ ዳዊታኮ፥ “ኤ፤ ሳኦል ያና” ያግድ ዛርስ።

12 ዳዊቲ፥ “ቃእላ አሳይ ታናነ ታ አሳ ሳኦላስ አꬅድ እማነሻ?” ያግድ ዛሪድ ጎዳ ኦይችስ።

ጎዳይ፥ “ኤ፤ ኤንቲ ህንተና አꬅድ እማና” ያግስ። 13 ዳዊቲነ ኡሱፑን ፄቱ ግድያ አደት ቃእላፐ ከይድ፥ እስ በሳፈ ሀራ በሲ ዩይዶሶና። ዳዊቲ ቃእላፐ ባቃትዳይሳ ሳኦል ስእዳ ዎደ ባናዉ ቆፕዳይሳ አጋግስ።

14 ዳዊቲ ባዞ ሚፃታንነ ዚፋ መላ ቢታን ደእያ ዙማታ ቦላ ደእስ። ሳኦል እያ ደማናዉ ኡባ ጋላስ ኮዬስ፥ ሽን ፆሳይ እያ ሳኦላ ኩሸን አꬅድ እምቤና። 15 ዳዊቲ ዚፋ መላ ቢታን ደእያ ሆረሳን ደእሽን፥ ሳኦል እያ ዎꬋናዉ ከይዳይሳ ዳዊቲ ኤርስ። 16 ሳኦላ ናኣ ዮናታን ደንድድ፥ ዳዊታኮ ሆረሳ ብድ ዳዊቲ ጎዳ ዎልቃን ምናናዳ ዞርድ፥ 17 “ያዮፋ፤ ታ አዋ ሳኦል ነና ኩሸራካ ቦቸና፤ ኔኒ እስራኤለ ቦላ ካዎታና፤ ታንካ ኔፐ ጋርሳራ ሃራና፤ ታ አዋይ ሳኦል ሄሳ ሎይꬅድ ኤሬስ” ያግስ። 18 ኤንቲ ናምአይ ጎዳ ስንꬃን እሶይ እሱዋራ ጫቅዶሶና፤ ዳዊቲ ሆረሳን ጋምእን ዮናታን ባ ሶ ብስ።

19 ዚፋ አሳይ ሳኦላኮ ግብአ ብድ፥ “ዳዊቲ ያስሞናፐ ዱገሀ ባጋን፥ ሀክላ ዙማ ቦላ ሆረሳ ሚፃታን ኑ ማታን ቆሰትድ ደኤስ። 20 ካዋዉ፥ ሀእካ ነ ዶስዳ ዎደ ዱገ ዎꬋ፤ ኑኒ እያ ነ ኩሸን አꬅድ እማና” ያግዶሶና።

21 ሳኦል፥ “ህንተ ታዉ ቆፕዳ ግሾ ህንተና ጎዳይ አንጆ። 22 ብድ አነ ጉጅድካ ጌሽተ፤ ዳዊቲ ዳሮ ቶሆ አዉ ብያኮካ ኦን እያ በእዳኮ፥ ሻክድ ኤርተ፤ እ ገነ አስ ግደይሳ ታ ስአስ። 23 ዳዊቲ ቆሰትያ በሳታ ኡባ በእድ፥ ሙሩታ ኦዳ ኤክድ ታኮ ስሚድ ዪተ። ሄሳፈ ጉየ፥ ታኒ ህንተራ ባና፤ እ ሄ ሄራን ደእኮ፥ ታኒ እያ ይሁዳ ቢታ ኡባን ደማና ጋካናዉ ኮያና” ያግስ።

24 ሄሳ ግሾ፥ ኤንቲ ሳኦላፐ ስንꬃትድ ዚፋ ብዶሶና። ሄ ዎደ ዳዊቲነ እያ አሳይ ያስሞናፐ ዱገሀ ባጋራ ደእያ ማኦና መላ ቢታን አራባ ጋꬋን ደኦሶና። 25 ሳኦልነ እያ አሳይ ዳዊታ ኮያናዉ ብዶሶና። ዳዊቲ ሄሳ ስእዳ ዎደ ዛላኮ ዎꬍድ፥ ማኦና ባዙዋን ኡትስ። ሳኦል ሄሳ ስእዳ ዎደ ማኦና ባዙዋን ዳዊታ ኮይሸ ብስ። 26 ሳኦል ዙማፐ እስ ባጋ ምይያራ ቤስ፤ ዳዊቲነ እያ አሳይ ሀንኮ ባጋ ምይያራ ቦሶና። ኤንቲ ሳኦላፐ ባቃታናዉ ኤሶቶሶና፤ ሳኦልነ እያ አሳት፥ ዳዊቲነ እያ አሳታ ኦይካናዉ ማት ኡትዶሶና። 27 ሽን፥ “ኤለሳዳ ሃያ፤ ፍልስፄመት ኑ ቢታ ኦላናዉ ይዶሶና” ግያ ሀራ ኪት ሳኦላ ጋክስ። 28 ሳኦል ዳዊታ ኮየይሳ አግድ፥ ፍልስፄመታራ ኦለታናዉ ብስ። ሄሳ ግሾ፥ ሄ በሳይ “ከስ ኤክድ አትያ ዛላ” ጌተትስ። 29 ዳዊቲ ሄ በሳፈ ከይድ፥ ኤንጋዳ ማታን ደእያ ሚፃታን ኡትስ።