1 ሳኦል ፍልስፄመታ ኦልድ ስምዳፐ ጉየ፥ ዳዊቲ ኤንጋዳ ባዙዋን ደኤስ ገይሳ ስእስ። 2 ሳኦል እስራኤለ ግዶፈ ዶረትዳ ሄꬑ ሙኩሉ አሳ ኤክድ፥ ዳዊታነ እያ አሳ ኮያናዉ፥ “ባዞ ዴሻታ ዛላ” ጌተትያ በሳ ማታ ብስ።

3 ሳኦል ኦግያ ዶናን ዶርሳ ግርብያ ማታን ደእያ ጎንጎሉዋ ግዶ ገልድ ሼአናዉ ኡትስ። ዳዊቲነ እያ አሳይ ጎንጎሉዋስ ጉየ ባጋራ ሺቅድ ኡትዶሶና። 4 ዳዊታ አሳይ፥ “ ‘ሄኮ፥ ታኒ ነ ሞርክያ ነ ኩሸን አꬃ እማና፤ ኔኒ እያ ቦላ ኮይዳባ ኦꬃና’ ያግድ ጎዳይ ነዉ ኦድዳ ጋላሳይ ሀች” ያግዶሶና። ዳዊቲ ሳኦላ ኤርሶና ሺቅድ ሳኦላ ማኡዋ ማጫራፐ ቃንፅ ኤክስ።

5 ዳዊቲ ሳኦላ ማኡዋ ማጫራ ቃንፅዳ ግሾ እያ ዎዛናይ ቂሮትስ። 6 ዳዊቲ ባ አሳኮ፥ “ጎዳይ ትይዳ ካዋ፥ ታ ጎዳ ቦላ ታኒ ሄሳ ኦꬃናይስ ዎይኮ እያ ቦላ ታ ኩሽያ ደንꬃናይስ ታፐ ሃኮ፤ ጎዳይ ትይድ እያ ካዎꬅስ” ያግስ። 7 ዳዊቲ ሀይሳዳ ግድ፥ ሳኦላ ባ አሳን ቦሽሶና ድግስ። ሳኦል ጎንጎሉዋ ግዶፈ ከይድ ባ ኦግያ ብስ።

8 ሳኦል ብዳፐ ጉየ፥ ዳዊቲ ጎንጎሉዋ ግዶፈ ከይድ፥ “ታ ጎዳዉ፥ ካዋዉ” ያግድ ሳኦላ ፄግን፥ ሳኦል ጉየ ስሚድ ፄልስ። ዳዊቲ ሳአን ጉፋንድ ሳኦላስ ዝግስ። 9 ዳዊቲ ሳኦላኮ፥ “ዳዊቲ ነና ቆሀናዉ ኮዬስ” ግያ አሳ ኔኒ አይስ ስአይ? 10 ሀች ሀ ጎንጎሉዋን ጎዳይ ነና ታዉ አꬅድ እምዳይሳ ኔኒ ነ አይፈን በአዳሳ። ታኒ ነና ዎꬋና መላ ጉꬃ አሳት ታና ደንꬅዶሶና። ሽን፥ “እ፥ ጎዳይ ትይድ ካዎꬅዳይሳ ግድያ ግሾ ታኒ ታ ጎዳ ቦላ ታ ኩሽያ ደንꬅከ” ያጋዳ ነና አጋስ። 11 ታ አዋዉ፥ ታ ኩሸን ደእያ ነ ማኡዋ ማጫራ ሀይሳ ፄላ። ነ ማኡዋ ማጫራፐ ቃንፃ ኤካስ፥ ሽን ነና ዎꬋብከ። ታኒ ነና ቆሆናይሳነ ነ ቦላ ማካሎናይሳ አኬካ፤ ታኒ ነና ቆሀብከ፥ ሽን ኔኒ ታና ዎꬋናዉ ሻንካታሳ። 12 ነባነ ታባ ጎዳይ ፕርዶ፤ ጎዳይ ኔኒ ታና ቆህዳይሳ ሃሉዋ ከሶ፥ ሽን ታኒ ነ ቦላ ታ ኩሽያ ደንꬅከ። 13 “ኢታ ኦይሳታፐ ኢት ከዬስ” ግያ በን ሌምሶይ ደኤስ። ሄሳ ግሾ፥ ታኒ ነና ኩሸንካ ቦችከ።

14 “እስራኤለ ካዎይ ኦደ ቦላ ደንዲ? ኦና ኦይካናዉ ካሊ? ሀይቅዳ ካና ዎይኮ ካስቶለ ጎድዬ? 15 ጎዳይ ኑ ቦላ ዳናቶ፤ ነባነ ታባ እ ፕርዶ፤ ታ ግሾ እ ሞተቶ፤ ነ ኩሸፐ ታና እ አሾ” ያግስ።

16 ዳዊቲ ሃሳያ ዉርስዳ ዎደ ሳኦል ዳዊታኮ፥ “ታ ናአ ዳዊታ፥ ሄስ ነ ቃሌ?” ያግድ ሳኦል ባ ቃላ ꬎቁ ኦꬅድ ዬክስ።

17 “ኔኒ ታፐ አꬍዳ ፅሎ፤ ታኒ ነዉ ኢታባ ኦꬅን፥ ኔኒ ታዉ ሎኦባ ኦꬃዳሳ። 18 ጎዳይ ታና ሀች ነዉ አꬅድ እምን ኔኒ ታና ዎꬋቦና ግሾ ኔኒ ታዉ ሎኦባ ኦꬃዳ በሳዳሳ። 19 አስ ባ ሞርከ ደምድ ቆሆና የድዬ? ኔኒ ታዉ ሀች ኦꬅዳ ኬሀተꬃ ግሾ፥ ጎዳይ ነና አንጆ። 20 ኔኒ እስራኤሌ ካዎ ግዳናይሳነ እስራኤለ ካዎተꬃይ ነ ማታ ጋርሳን ኤቃናይሳ ታ ኤራይስ። 21 ህዛ ታ ኮቻ ꬋይሶና መላነ ታ ሱንꬃ ታ አዋ ሶ አሳ ግዶፈ ቁቾና መላ ጎዳ ሱንꬃን ታዉ ጫቃ” ያግስ።

22 ዳዊቲ ሳኦላስ ጫቅስ። ሄሳፈ ጉየ፥ ሳኦል ባ ሶ ስሚድ ብስ፤ ዳዊቲነ እያ አሳይ ባንታ ሚፃ ብዶሶና።