1 ሳሜል ሀይቅን፥ እስራኤለ አሳ ኡባይ ሺቅድ፥ እያዉ ዬክዶሶና፤ ራማ ካታማን እያ ሞግዶሶና።

ሄሳፈ ጉየ፥ ዳዊቲ ማኦና መላ ቢታ ብስ። 2 ማኦና መላ ቢታን፥ ቃርመሎሳን ሻሎይ ደእያ እስ ዱረ አደይ ደኤስ። እያዉ እስ ሙኩሉ ዴሻትነ ሄꬑ ሙኩሉ ዶርሳት ደኦሶና። እ ኤንታ እክስያ ቃርመሎሳን ሜዴስ። 3 ሄ አድያ ሱንꬃይ ናባላ፥ እ ካለባ ያራ፤ እያ ማቸ ሱንꬃይ አብግያ። እያ አኬካንቾነ ማላ ሎኦ ማጫስ፥ ሽን እ አዝናይ ዎዛን ባይና ኢታ አስ።

4 ዳዊቲ መላ ቢታን ደእሸ፥ ናባል ዶርሳ እክሰ ሜደይሳ ስእስ። 5 ዳዊቲ ታሙ ፓንꬃታ ሀይሳዳ ያግድ ኪትስ፤ “ናባላኮ ቃርመሎሳ ብድ፥ ታ ሱንꬃን እያ ሳሮꬅተ። 6 ‘ነ ባረይ አዱቆ! ሳሮይ ነዉነ ነ ሶ አሳስ ግዶ፤ ነዉ ደእያ ኡባስ ሳሮይ ግዶ! 7 ነ ዶርሳ እክሰ ሜደይሳ ታኒ ስአስ፤ ነ ዶርሳ ሄመይሳት ኑራ ደእዳ ዎደ ኑኒ ኤንታ ገንቦኮ፤ ኤንቲ ቃርመሎሳን ደእዳ ዎደ ኡባን ኤንታባፐ አይብካ ፓጭቤና። 8 ሄሳ ኔኒ ነ አይለታ ኦይችኮ ኤንቲ ነዉ ኦዳና። ኑኒ ሀች ግብራ ጋላስ ኔኮ ይዳ ግሾ፥ ታ ፓንꬃታስ ሀያና ኬሀ። ነ ኩሸን ደእያባፐ ነ አይለታስነ ነ ናኣ ዳዊታስ ሀያና እማ’ ያግተ” ያግድ ኪትስ።

9 ዳዊታ አሳት ናባላኮ ጋክድ፥ ዳዊታ ሱንꬃነ ኪታ እያዉ ኦድድ፥ እ ጋናባ ናግሸ ያን ኡትዶሶና።

10 ናባል፥ “ዳዊቲ ኦኔ? እሰየ ናአይ ኦኔ? ሀ ዎድያን ዳሮ አይለት ባንታ ጎዳታፐ ባቃቶሶና። 11 ታ ካꬃ፥ ታ ሃꬃነ ታ ዶርሳታ ሜደይሳታስ ሹከትዳ አሹዋ ኤካዳ፥ ጉዬይ ኤረቶና አሳስ አይስ እሞ?” ያግስ።

12 ዳዊቲ አሳት ጉየ ስም ብድ ናባል ግዳባ ኡባ ዳዊታስ ኦድዶሶና። 13 ዳዊቲ፥ “ህንተ ማሻ ዳንጭተ” ያግን፥ ኡባይ ባንታ ማሻ ዳንጭዶሶና፤ ዳዊቲካ ባ ማሻ ዳንጭስ። ዳዊቲ ኦይዱ ፄቱ ግድያ አሳታራ ደንድድ ብስ፤ ናምኡ ፄቱ አሳይ ኤንታባ ናግድ አትስ።

14 ናባላ አይለታፐ እሶይ ናባላ ማቸ አብግያኮ ሀይሳዳ ያግስ፤ “ዳዊቲ መላ ቢታን ደእሸ ኑ ጎዳ ሳሮ ጋናዉ አሰ ኪትስ፥ ሽን እ ኤንታ ጫይድ የድስ። 15 ግዶሽን፥ ሀ አሳት ኑስ ዳሮ ሎኦ፤ ኤንቲ ኑና ገንቦኮና፤ ኑኒ ኤንታራ ባዞን ፔእዳ ዎደ ኡባን ኑባፐ አይኮይካ ፓጭቤና። 16 ኑኒ ኑ ዶርሳ ዉድያ ኤንታ ማታን ሄምያ ዎደ፥ ቃማነ ጋላስ ኤንቲ ኑስ ድርስ ግድዶሶና። 17 ኑ ጎዳ ቦላነ እያ ሶ አሳ ቦላ ኢታባይ ጋካና ሀንያ ግሾ፥ ሀያና ሀ ኦዳ ዋታነኮ ቆፓ። ኑ ጎዳይ አሳ ዞረ ስኦና ኢታ አስ ግድያ ግሾ፥ ኦንካ እያ ሃሳይሳናዉ ዳንዳኤና” ያግስ።

18 አብግያ ኤሶን ናምኡ ፄቱ ኡይꬁ፥ ናምኡ ኦጎሮ ዎይነ ኡሹ፥ እቻሹ ጫጨትዳ ዶርሳታ፥ እሻታሙ ክሎ ግራመ ጫጨትዳ ትያ፥ እስ ፄቱ ኡከትዳ ዎይነ ሞርኤነ ናምኡ ፄቱ ባላሰ ኑካ ኤካዳ ሀረታ ቦላ ጫናሱ። 19 ባ አይለታኮ፥ “ህንተ ስንꬃትድ ቢተ፤ ታ ህንተና ካላና” ያጋሱ፤ ሽን ባ አዝና ናባላስ አይኮካ ኦዳቡኩ። 20 ባ ሀርያ ቶጋዳ ዙማ ሎቡዋ ዱገ ዎꬍያ ዎደ ዳዊቲነ እያ አሳይ ይሸ ኢራ ጋሄትዶሶና።

21 ዳዊቲ፥ “እያባፐ አይኮይካ ፓጮና መላ ታኒ ሀ አድያ ሻሉዋ ናግዳይ ጮ መላ፤ ታኒ ኦꬅዳ ሎኦ ኦሱዋስ እ ታዉ ኢታ ኩሸ ዛርስ። 22 ዎንቶ ዎንታ ጋካናዉ፥ እያባ ግድዳ አደታፐ እሱዋ ታ ፓፃ አግኮ፥ ፆሲ ታና ፕርዶ” ያግስ።

23 አብግያ ዳዊታ በእዳ ዎደ ሀርያፐ ኤሶታ ዎꬋዳ፥ ዳዊታ ስንꬃን ጉፋናዳ ዝጋሱ። 24 እያ ቶሁዋ ቦላ ኩንዳዳ፥ “ታ ጎዳዉ፥ ታ ባላይ ታ ቦላ ግዶ! ታ እስባ ኦዳና፤ ታ ነ አይልያ ግያባ ስአ። 25 ሀ ዎዛን ባይና አደይ፥ ናባል *ናባላ፦ ናባላ ጉሳይ ኤያ ጉሱ። ግያባ ስኦፓ፤ እ ባ ሱንꬃዳ ኤያ። ታ ጎዳዉ፥ ነ ኪትዳ አሳታ ታ ነ አይልያ በአብከ። 26 ደኦ ጎዳይ ኤርያ መላ፥ ነ ሸምፖይ ኤርን፥ ነ ሱꬁ ጉሶናዳነ ሀሎ ከዮናዳ ነና ተቅዳይ ጎዳ። ነ ሞርከትነ ነና ቆሀናዉ ኮየይሳት ናባላዳ ሀኖ። 27 ሀ እሞታይ ታኒ ነ አይልያ ነዉ፥ ታ ጎዳስ ኤህዳይስ ነና ካልያ አሳታስ እመቶ። 28 ታ ጎዳዉ፥ ነ አይለ ናጋራ አቶ ያጋ! ኔኒ ጎዳ ኦላ ኦለትያ ግሾ፥ ጎዳይ ነናነ ነ ሼሻ ካዎያና። ነ ደኦ ላይꬃ ኡባን ኢታተꬅ ነ ቦላ በንቶፎ። 29 አይ አስካ ነና ዎꬋናዉ ኮይኮ፥ እስ አስ ባ አልኦ ሻሉዋ ናገይሳዳ ጎዳይ፥ ነ ፆሳይ ነና ሳሮ ናጋና። ሽን ያምባርሻን ሹቹ ሆለይሳዳ እ ነ ሞርከታ ሆላና። 30 ጎዳይ፥ ታ ጎዳስ ኦꬃናዉ ቃላ ገልዳ ኬሀተꬃ ኡባ ኦꬅያ ዎደነ እስራኤለ ቦላ ካዎꬅያ ዎደ፥ 31 ታ ጎዳይ አዛንያ ጋሶይ ዎይኮ ቂሮያባይ ባዋ። ጋሶይ ባይና ሱꬁ ጉስዳባይ ዎይኮ ሀሎ ከይዳባይ ባይና ግሾ ነ ዎዛናይ ዳጋመና። ጎዳይ ነዉ ሎኦባ ኦꬅዳ ዎደ ታና ነ አይልዉ ዶጎፓ” ያጋሱ።

32 ዳዊቲ አብግያኮ፥ “ታራ ጋሄታና መላ ሀች ነና ኪትዳ ጎዳይ፥ እስራኤለ ፆሳይ ጋላተቶ። 33 ታኒ አሳ ሱꬁ ጉሶናዳነ ሀሎ ከዮናዳ ነ ሎኦ ቆፋይ ታና ተቅዳ ግሾ ኔኒ አንጀታ። 34 ታ ነና ቆሆናዳ ተቅዳ ደኦ ጎዳይ፥ እስራኤለ ፆሳይ ኤርያ መላ ነ ታራ ጋሄታናዉ ኤለሳዳ ዮናኮ፥ ሳእ ዎንታና ጋካናዉ ናባላ አሳፐ እስ አደይካ ፓፃ አተና” ያግስ። 35 አብግያ እያዉ ኤህዳ እሞታ እ ኩሸፐ ዳዊቲ ኤክድ፥ “ነ ሶ ሳሮ ባ፤ ታኒ ነ ግዳባ ስአስ፤ ነ ኦይሻካ ኤካስ” ያግስ።

36 አብግያ ስማዳ ናባላኮ ያ ዎደ፥ ካዎ ሶን ጊግያ ግብራ መላ ግብራ ሙዝሸ ሶን ኡትስ። ናባል ዳሮ ማꬆትድ፥ ባ ዎዛናን ኡፋይትያ ግሾ ሳእ ዎንታና ጋካናዉ አብግያ እያዉ አይኮካ ኦዳቡኩ። 37 ዎንታ ናባላ ማꬆይ ስምዳፐ ጉየ፥ እያ ማችያ ሀንዳባ ኡባ እያዉ ኦዳሱ፤ ናባላ ዎዛናይ ዎꬍን፥ እ ዳቡርስ። 38 ታሙ ጋላሳፐ ጉዬ ጎዳይ ናባላ ሾጭን፥ እ ሀይቅስ።

39 ናባል ሀይቅዳይሳ ዳዊቲ ስእዳ ዎደ፥ “ጎዳይ ጋላተቶ! ናባል ታና ጫይዳይሳ ሀሎ ጎዳይ ከስስ። ታኒ እያ አይለይ ኢታባ ኦꬆና መላ ታና ተቅስ። ናባል ኦꬅዳ ኢታባ ጎዳይ እያ ቦላ ዛርስ” ያግስ።

ሄሳፈ ጉየ፥ ዳዊቲ አብግያ ኤካናዉ ኮይድ ኪታ የድስ። 40 ዳዊታ አይለት ቃርመሎሳን ደእያ አብግያኮ ብድ፥ “ዳዊቲ ነና ማቻናዉ ዶስዳ ግሾ ኑኒ ነና ኤካናዉ ይዳ” ያግዶሶና።

41 አብግያ ጉፋና ዝጋዳ፥ “ታኒ ነ አይልያ ነዉ ኪተታናዉነ ነ አይለታ ቶሁዋ ሜጫናዉ ጊገታ ኡታስ” ያጋሱ። 42 አብግያ ኤለሳ ደንዳዳ ባ ሀርያ ቶጋሱ፥ እያ ባ እቻሹ ማጫ አይለታራነ ዳዊታ ኪትዳ ኣሳራ ባዳ ዳዊታ ገላሱ።

43 ዳዊቲ ካሰ እዝራኤለ ማጫስዉ አክናሆሞ ኤክድ ደኤስ፤ ኤንቲ ናምአይ እያ ማቸታ። 44 ሳኦል ዳዊታ ማችዉ፥ ባ ናእዉ መልኮሎ ጋልማ አድያ ሌሳ ናኣ ፋልፃስ እሚስ።