1 ሄ ዎደ ፍልስፄመ አሳት እስራኤለታ ኦላናዉ ባንታ ኦላንቾታ ሺሽዶሶና። አንኩስ ዳዊታኮ፥ “ነነ ነ አሳት ታራ ኦላስ ባናይሳ ቱማ ኤራ ኡታ” ያግስ።

2 ዳዊቲ፥ “ሄሳ ግድኮ፥ ታ ነ አይለይ ኦꬃናባ ነ በአና” ያግስ።

አንኩስ፥ “ዳሮ ሎኦ፤ ታኒ ነና ታ ደኦ ላይꬃ ኡባን ታና ናገይሳ ኦꬃና” ያግስ።

3 ሀይሳፈ ካሰ ሳሜል ሀይቅን፥ እስራኤለ አሳ ኡባይ እያዉ ዬክድ፥ እያ ካታማን ራማን እያ ሞግዶሶና። ሳኦል ሞይትለ ፄገይሳታነ ማሮታ እስራኤለ ቢታፈ የደꬅድ ከስስ።

4 ፍልስፄመ ኦላንቾት ሺቅድ፥ ሱኔማ ካታማን ዱንካንዶሶና፤ ሳኦል እስራኤለ አሳ ኡባ ሺሽድ፥ ግልቦአ ዙማን ዱንካንስ። 5 ሳኦል ፍልስፄመ ኦላንቾታ በእድ ያይስ፤ እያ ዎዛናይ ዳሮ ዳጋምስ። 6 ሄሳ ግሾ፥ አይ ኦꬃነኮ ጎዳ ኦይችስ፤ ሽን ጎዳይ አሙሆን ዎይኮ ኡሪመን ከሳ 28:30. ዎይኮ ናበታ ባጋራ እያዉ ኦድቤና። 7 ሄሳፈ ጉየ፥ ሳኦል ባ አይለታ፥ “ሞይትለ ፄግያ ማሮ ታዉ ኮይተ፤ ታኒ ኢኮ ባዳ እዮ ኦይቻና” ያግድ ኪትስ።

ሳኦላ አይለት፥ “ሞይትለ ፄግያ እስ ማሮይ ኤንዶራን ደአኡሱ” ያግዶሶና።

8 ያግን ሳኦል ባና ኤርሶና መላ ሀራ ማኦ ማእድ፥ ናምኡ አሳታ ኤክድ፥ ቃማ ሄ ማሬኮ ብድ፥ ማጫስዉ፥ “ሀያና፥ ታዉ እስ ሞይትለ ፄጋርክ፤ ታኒ ሱንꬃ ኦድያ አሳ ታዉ ደንꬃርክ” ያግስ።

9 ያግን ማጫስያ፥ “ሞይትለ ፄገይሳታነ ማሮታ እስራኤለ ቢታፈ ሳኦል ዋት የደꬅ ከስዳኮ፥ ቱማ ኔኒ ኤራሳ። ታና ዎꬍሳናዉ ኔኒ ታዉ አይስ ፅሄ የጋይ?” ያጋሱ።

10 ያግን ሳኦል ማጫስዉ፥ “ደኦ ፆሳይ ኤርያ መላ፥ ኔኒ ሀይሳ ግሾ ሴረታካ” ያግድ ጎዳን ጫቅስ።

11 ማጫስያ፥ “ታኒ ነዉ ኦና ደንꬆ?” ያጋዳ ኦይቻሱ።

ሳኦል፥ “ሳሜላ ታዉ ደንꬃ” ያግስ።

12 ማጫስያ ሳሜላ በአዳ፥ ዋሶ ጎቻዳ፥ ሳኦላኮ፥ “ኔኒ ታና አይስ ጭማዲ? ኔኒ ሳኦላ ግድክ!” ያጋሱ።

13 ካዎይ፥ “ያዮፋ! ነዉ አይበ በንተይ?” ያግስ።

ማጫስያ፥ “እስ ሞይትለይ ቢታ ግዶፈ ከይሽን በአስ” ያጋሱ።

14 ሳኦል ማጫስዉ፥ “እ አይ ዳኒ?” ያግስ።

ማጫስያ፥ “ካባ ማእዳ እስ ጭማ አደይ ከይስ” ያጋሱ።

ሳኦል ሄ አደይ ሳሜላ ግደይሳ ኤርድ፥ እያ ስንꬃን ሳአን ጉፋንስ።

15 ሳሜል ሳኦላኮ፥ “ታና ደንꬃዳ አይስ ዋይሳይ?” ያግስ።

ሳኦል፥ “ታኒ ዳሮ ኡንኤታስ፤ ፍልስፄመ አሳት ታና ኦሎሶና፤ ፆሳይ ታፐ ሻከትስ፤ ናበታ ባጋራ ዎይኮ አሙሆን እ ታኒ ኦይችያባ ኦደና። ሄሳ ግሾ፥ ታኒ ኦꬃናባ ነ ታዉ ኦዳና መላ ነና ፄጋስ” ያግስ።

16 ሳሜል፥ “ጎዳይ ሻከትድ ነዉ ሞርከ ግድኮ ታና አይስ ዞረ ኦይቻይ? 17 ጎዳይ ታ ባጋራ ካሰት ኦድዳባ ኦꬅስ፤ ጎዳይ ካዎተꬃ ኔፐ ኤክድ፥ ነ ሾሩዋ ዳዊታስ እሚስ። 18 ኔኒ ጎዳስ ኪተታቦና ግሾነ እያ ኤፅያ እያ ሸንያ አማለቃ ቦላ ፖላቦና ግሾ ጎዳይ ሀች ሀይሳ ነ ቦላ ኤህስ። 19 ነናነ እስራኤለ፥ ጎዳይ ፍልስፄመታስ አꬅድ እማና፤ ነነ ነ አደ ናይት ዎንቶ ታናን ጋሄታና፤ ጎዳይ እስራኤለ ኦላንቾታ ፍልስፄመታስ አꬅድ እማና” ያግስ።

20 ሳኦል ሳሜላ ኦዳ ስእድ ያይዳ ግሾ ዳቡርድ፥ ባና ዶግድ ሳአን ኩንድስ። ሳኦል ቃማነ ጋላስ ካꬅ ምቦና ግሾ እያዉ ዎልቅ እፅስ። 21 ሄ ማጫስያ ሳኦላኮ ያዳ፥ እ ዳሮ ኮኮረይሳ በአዳ፥ “ታኒ ነ አይልያ ነዉ ኪተታስ፤ ኔኒ ታና ኦይችዳባ ታ ሸምፑዋ ዶጋዳ ኦꬃስ። 22 ሀእ ታኒ ነ አይልያ ግያባ ሀያና ስአ፤ ኔኒ ማዳ ጋሽታዳ ነ ኦግያ ባና መላ ታኒ ነዉ ጉꬃ ካꬅ ጊግሳስ” ያጋሱ።

23 ሳኦል፥ “ሚከ” ያግስ። ሽን እያ አሳት ሄ ማጫሴራ ግድድ እያ ዎስዶሶና፤ ኤንታ ዎሳ ስእስ፤ ቢታፈ ደንድድ ሂፃን ኡትስ። 24 ሄ ማጫስያ ባ ሶን ደእያ አንቃራ ማራ ሹካሱ፤ ꬊለ ኤካ ሙኑቃዳ፥ ኡይꬅ ኡካሱ። 25 ያታዳ ካꬃ ሳኦላስነ እያ አሳታስ አꬅን፥ ኤንቲ ምዶሶና። ሄ ቃማ ደንድድ ብዶሶና።