1 ፍልስፄመት ባንታ ኦላንቾታ ኡባ አፌቃን ሺሽዶሶና። እስራኤለት እዝራኤለን ደእያ ፑልቶ ሃꬃ ማታን ዱንካንዶሶና። 2 ፍልስፄመ ሀላቃት ባንታ ኦላንቾታ ፄታንነ ሙኩሉ ጩጋን ሳልፕስዶሶና፤ ዳዊቲነ እያ አሳይ አንኩሳራ እስፈ ግድድ ጉየ ባጋራ ሳልፕዶሶና። 3 ፍልስፄመ ሀላቃት ኤንታ በእድ፥ “ሀ እብራወት ሀይሳን አይ ኦꬆና?” ያግዶሶና።

አንኩስ፥ “ሀይስ እስራኤለ ካዋ ሳኦላ አይልያ ዳዊታ ግደኔ? እ ዳሮ ዎደ ታራ አꬅስ፤ እ ሳኦላ ካድድ ከዮደፐ ሀች ጋካናዉ ታኒ እያፐ ባላ ደማብከ” ያግስ።

4 ሽን ፍልስፄመ ሀላቃት አንኩሳ ቦላ ሀንቀትድ፥ “ሀ አድያ ኔኒ እያዉ እምዳ ካታማ ጉየ ዛራ። ኦላይ ጎብያ ዎደ እ ኑ ቦላ ስሚድ ደንዶና መላ እ ኑራ ኦላ ቦፖ። እ ባ ጎዳራ ስገታናዉ ኑ አሳታ ቆꬍያ ቃንፆፈ አትሽን፥ ሀራ አይ ኦꬃኔ? 5 ሀይሳፈ ካሰ ማጫሳይ፥ ‘ሳኦል ሙኩላታ ዎꬍስ፤ ዳዊቲ ታሙ ሙኩላታ ዎꬍስ’ ያግድ ዱርሸነ የፅሸ ሳቢዳይ ዳዊታ ግደኔ?” ያግዶሶና።

6 ሄሳ ግሾ፥ አንኩስ ዳዊታ ፄግድ፥ “ደኦ ጎዳይ ኤርያ መላ፥ ኔኒ አማንꬅያ አስ፤ ኔኒ ታራ ኦላስ በይሳ ታ ዶሳይስ። ኔኒ ታኮ ዮሳፐ ሀች ጋካናዉ ታኒ ነ ቦላ ባላ ደማብከ። ሽን ሀላቃት ኔኒ ኦላስ በይሳ ዶሶኮና። 7 ኔኒ ጉየ ስማዳ ሳሮ ባ፤ ፍልስፄመ ሀላቃታ ኡፋይሶናባ አይኮካ ኦꬆፋ” ያግስ።

8 ዳዊቲ፥ “ታኒ አይ ኦꬃድና? ታኒ ኔራ ደኦደፐ ሀች ጋካናዉ ነ ታፐ አይ ባላ ደማዲ? ያትን፥ ካዋ፥ ታ ጎዳ ሞርከታራ አይስ ኦለትክና?” ያግስ።

9 አንኩስ፥ “ፆሳ ኪታንቾዳ ኔኒ ታዉ ሎኦ ግደይሳ ታኒ ኤራይስ። ሽን ፍልስፄመ ሀላቃት፥ ‘እ ኑራ ኦላ ቦፖ’ ያግዶሶና። 10 ነነ ኔራ ይዳ ነ ጎዳ አይለታራ ዎንቶ ጉራ ደንድድ ቢተ” ያግስ።

11 ሄሳ ግሾ ዳዊቲነ እያ አሳት ፍልስፄመ ስማናዉ ዎንታ ጉራ ደንድዶሶና፤ ፍልስፄመት እዝራኤለ ብዶሶና።