1 ዳዊቲነ እያ አሳት ሄꬓንꬆ ጋላስ ፅቅላጋ ጋክዶሶና። አማለቃት ነገባነ ፅቅላጋ ኦልድ፥ ፅቅላጋ ታማን ፁግዶሶና። 2 ፅቅላጋን ደእያ ማጫሳነ ናአፐ ጭማ ጋካናዉ ደእያ ኡባ ድእዶሶና፤ ኤንታፈ እስ አስካ ዎꬎና ኤንታ ኡባ ድእድ ኤፍዶሶና።

3 ዳዊቲነ እያ አሳት ፅቅላጋ ጋክያ ዎደ ካታማይ ታማን ፁገትዳይሳነ ኤንታ ማቸት፥ አደ ናይትነ ማጫ ናይት ድኤትዳይሳ በእዶሶና። 4 ዳዊቲነ እያራ ደእያ አሳይ ባንታ ዎልቃይ እፃና ጋካናዉ ዋስድ ዬክዶሶና። 5 ዳዊታ ማቸት እዝራኤለ አክናሆማነ ካሰ ናባላ ማችያ ቃርመሎሳ አብግያ ናምአይካ ድኤትዶሶና።

6 እያ አሳይ ባንታ አደ ናይትነ ማጫ ናይት ድኤትዳ ግሾ ይሎትድ ዳዊታ ሹቻን ጫዳናዉ ኦደትን፥ ዳዊቲ ዳሮ ኡንኤትስ። ግዶሽን፥ ዳዊቲ ጎዳን ባ ፆሳን ምነትስ።

7 ዳዊቲ አብመለከ ናኣ ካህንያ አብያታራኮ፥ “ኤፉድያ ኤካዳ ያ” ያግን፥ አብያታር ኤፉድያ ዳዊታስ ኤህስ። 8 ዳዊቲ፥ “ታኒ፥ ታና ኦልያ አሳታ ካላዳ ጋካኔ?” ያግድ ጎዳ ኦይችስ።

ጎዳይ፥ “ኤ፤ ኤንታ ካላዳ ባ፤ ቱማ ኤንታ ነ ጋካና፤ ቱማ ድኡዋ ዛራና” ያግስ።

9 ዳዊቲነ እያራ ደእያ ኡሱፑን ፄቱ አሳት ደንድድ ቦሶራ ሻፋ ጋክያ ዎደ ኤንታፈ ጉꬃ አሳት ያን አትዶሶና። 10 ናምኡ ፄቱ አሳይ ሻፋ ፕናናዉ ዳሮ ዳቡርዶሶና። ሽን ዳዊቲነ ኦይዱ ፄቱ አሳይ ካልዶሶና።

11 ኤንቲ እስ ግብፀ አስ ደንባን ደምድ፥ ዳዊታኮ ኤህድ፥ እያዉ ሃነ ካꬅ እምዶሶና። 12 ባላሰ ኦንጎቾነ ናምኡ ዎይነ ኑካ እያዉ እምን ምድ ጋሽትስስ። እ ሄꬑ ጋላስነ ሄꬑ ቃማ ካꬅ ሞና ሃ ኡዮና ጋምእስ። 13 ዳዊቲ፥ “ኔኒ ኦደ አይሌ? አዉፐ ያዲ?” ያግድ አድያ ኦይችስ።

አደይ፥ “ታኒ አማለቃ አድያስ አይለትዳ ግብፀ አስ፤ ሄꬑ ጋላሳፐ ካሰ ታ ሳከትን፥ ታ ጎዳይ ታና የግ አግድ ብስ። 14 ኑኒ ይሁዳ ዛዋ፥ ከልታወታ ዱገሀ ባጋነ ካለባ ዱገሀ ባጋ ኦልድ ፅቅላጋ ታማን ፁግዳ” ያግስ።

15 ዳዊቲ፥ “ኔኒ ታና ሄ ኦልዳ ጩጋታኮ ካለꬃናዉ ዳንዳአይ?” ያግድ ኦይችስ።

እ ዛሪድ፥ “ኔኒ ታና ዎꬎና መላነ ታ ጎዳስ አꬃዳ እምከ ጋዳ ታዉ ፆሳን ጫቃ፤ ታኒ ነና ኤንታኮ ካለꬃና” ያግስ።

16 ዳዊቲ ካለꬅድ ኤንታኮ ጋꬅስ። ኤንቲ ፍልስፄመፐነ ይሁዳፐ ዳሮ ድኦ ድእዳ ግሾ ኡፋይትድ ምሸነ ኡይሸ ላለትድ ኡትዶሶና። 17 ሄ ጋላስ ኦማርሳፈ ዶምድ ዎንተꬃ ጋላስ ኦማርስ ጋካናዉ ዳዊቲ ኤንታ ሾጭስ። ግማለ ቶግድ ባቃትዳ ኦይዱ ፄቱ ፓንꬃታፐ አትሽን፥ ሀር እስ አስካ አትቤና። 18 አማለቃ አሳት ኤፍዳ ኡባ፥ ባ ናምኡ ማቸታራ እስፈ ዳዊቲ ዎስስድ ኤክስ። 19 አሳት ድእድ ኤፍዳባፐ እስባይካ ፓጭቤና፤ ናእ ዎይኮ ጭም፥ አደይ ዎይኮ ማጭ፥ ሄሳዳካ ኤንቲ ድእድ ኤፍዳ ሀራባ ኡባይ ፓጮና ደእሽን ዳዊቲ ኡባ ዛርስ። 20 ዳዊቲ ዶርሰ፥ ዴሸነ መሄ ኡባ ድእስ፤ ዳዊቲ አሳይ እ ድእዳ መህያ ሀንኮ መህያፐ ስንꬃራ ላግሸ፥ “ሀይስ ዳዊታ ድኦ” ያግዶሶና።

21 ዳዊቲ ዳቡርድ ቦሶራ ሻፋ አቻን አትዳ ናምኡ ፄቱ አሳኮ ይስ። ኤንቲ ዳዊታነ እያራ ደእያ አሳ ሞካናዉ ከይዶሶና። ዳዊቲ ባ አሳራ ሺቅድ ኤንታ ሳሮꬅስ። 22 ሽን ዳዊታራ ብዳ አሳታ ግዶፈ ፓꬆና ኢታ አሳት፥ “ኤንቲ ኑራ ቦና ግሾ ኑኒ ዛሪድ ኤህዳባፐ አይኮካ ኤንታዉ ሻኮኮ፤ ኤንቲ ባንታ ናይታነ ባንታ ማቸታ ኤክድ ቦና” ያግዶሶና።

23 ዳዊቲ ዛሪድ፥ “ታ እሻቶ፥ ጎዳይ ኑስ እምዳባን ህንተ ሀይሳዳ ኦꬃናዉ በሰና። እ ኑና ናግድ፥ ኑና ኦልዳ ጩጋታ ኑስ አꬅድ እሚስ። 24 ህንተ ግያባ ኦንካ ኤከና። ኦለታናዉ ብዳይሳታነ ኑባ ናግሸ ሀይሳን ጋምእዳይሳታ ግሾይ እስኖ፤ ኡባይ ግና ሻከታና” ያግስ። 25 ሄ ጋላሳፐ ዶምድ ሀች ጋካናዉ እስራኤለ ቢታን ሄስ ህገነ ዎጋ ግድስ።

26 ዳዊቲ ፅቅላጋ ጋክዳ ዎደ ባ ላገ ግድዳ ይሁዳ ጭማታኮ፥ “ጎዳ ሞርከታፐ ድኤትዳባፐ ታኒ ህንተዉ እመይሳ ኤክተ” ያግድ ጉꬃራ የድስ። 27 እ ሄሳ ቤተለን፥ ራሞታ ነገባንነ ያትራን ደኤይሳታስ፥ 28 አሮኤራን፥ ስፍሞታን፥ ኤሽታሞአንነ 29 ራካላን፥ ይራህማኤላን፥ ቄና ካታማታን፥ 30 ሆርማና፥ ቦራሳና፥ አታካንነ 31 ከብሮናን ደኤይሳታስ የድስ። እነ እያ አሳት ዩይዳ በሳ ኡባን ደእያ አሳስ የድስ።