1 ፍልስፄመት እስራኤለታራ ኦለትዶሶና፤ እስራኤለት ፍልስፄመታ ስንꬃፈ ባቃትዶሶና፤ ዳሮ እስራኤለት ግልቦአ ደርያ ቦላ ሀይቅዶሶና። 2 ፍልስፄመት ሳኦላነ እያ አደ ናይታ የደꬅድ፥ እያ አደ ናይታ ዮናታና፥ አምናዳበነ ማልክሳ ዎꬍዶሶና። 3 ኦላይ ተቅድ ሳኦላ ኡንኤꬅስ፤ ዶንገን ዱከይሳት እያ ጫድድ ዳሮ ማዱንፅስዶሶና።

4 ሳኦል ባ ኦላ ሚሽያ ቶከይሳኮ፥ “ሀ ቃፃረትቦናይሳት ይድ፥ ታና ጫድድ ካኦና መላ ነ ማሻን ታና ጫዳዳ ዎꬋ” ያግስ።

ሽን እያ ኦላ ሚሽያ ቶከይስ ያይድ እፅን፥ ሳኦል ባ ማሻ ሳአን ኤስድ፥ እያ ቦላ ኩንድስ። 5 እያ ኦላ ሚሽያ ቶከይስ ሳኦል ሀይቅዳይሳ በእድ፥ እካ ባ ማሻ ሳአን ኤስድ፥ እያ ቦላ ኩንድድ እያራ እስፈ ሀይቅስ። 6 ሀይሳዳ ሀንድ፥ ሳኦልነ እያ ሄꬑ አደ ናይት፥ እያ ኦላ ሚሽያ ቶከይስነ እያ አሳት ኡባይ ሄ ጋላስ ሀይቅዶሶና።

7 ዛንጋራንነ ዮርዳኖሰ ሻፋፐ ሄፍንꬃ ባጋራ ደእያ እስራኤለ አሳይ፥ እስራኤለ ኦላንቾት ባቃትዳይሳ፥ ሳኦልነ እያ ናይት ሀይቅዳይሳ በእድ ባንታ ካታማ አግድ ባቃትዶሶና። ፍልስፄመት ይድ፥ ሄ ካታማታ ኦይክዶሶና።

8 ዎንተꬃ ጋላስ ፍልስፄመት አሀ ቦላፈ ኦላ ሚሸታ ቃርድ ኤካናዉ ይድ፥ ሳኦልነ እያ ሄꬑ አደ ናይት ግልቦአ ደርያ ቦላ ሀይቅድ ዝንእዳይሳታ ደምዶሶና። 9 ኤንቲ ሳኦላ ቆꬍያ ቃንፅድ እያ ኦላ ሚሽያ ቃር ኤክዶሶና። ያትድ ባንታ ኤቃ ኬꬃንነ ባንታ አሳ ግዶን ፆኑዋ አዋጃና መላ ፍልስፄመ ቢታ ኡባስ ኪታ የድዶሶና። 10 ሳኦላ ኦላ ሚሽያ አስታሮተ ጌተትያ ኤንታ ማጫ ፆሰ ኬꬃን ዎꬅዶሶና። ሳኦላ አሀ ቤት-ሳና ካታማ ግምብያ ቦላ ምስማረን ꬍሽድ ካቅዶሶና።

11 ፍልስፄመት ሳኦላ ኦꬅዳባ ጋላዳን ደእያ ያበሳ አሳይ ስእዳ ዎደ፥ 12 ምኖ አሳት ቃማ ደንድ ብድ፥ ሳኦላ አሃነ እያ ናይታ አሀ ቤት-ሳና ካታማ ግምብያ ቦላፈ ዎꬍስድ ያበሳ ካታማ ኤህድ፥ ያን ፁግዶሶና። 13 ሄሳፈ ጉየ፥ ኤንታ መቀꬃ ማፅ ኤክድ፥ ያበሳን ደእያ ታማርስከ ምꬃ ጋርሳን ሞግዶሶና፤ ያትድ ላፑን ጋላስ ፆምዶሶና።