1 ጳዉሎስ ስላሰይነ ፅሞትዮስ ተሰሎንቀ ዎሳ ኬꬃን ደእያ፥ ፆሳ አዋባነ ጎዳ የሱስ ክርስቶሳባ ግድዳ አሳስ ፃፍዳ ኪታ። ሀዋ 17:1.

አꬎ ኬሀተꬃይነ ሳሮይ ህንተዉ ግዶ።

2 ኑኒ ፆሳ ዎስያ ዎደ ኡባን ህንተና ቆፕሸ ህንተ ግሾ ኡባ ዎደ ፆሳ ጋላቶስ። 3 ፆሳ ኑ አዋ ስንꬃን አማኖን ህንተ ኦꬅዳ ኦሱዋ፥ ሲቆን ህንተ ዳቡርዳ ዳቡራነ የሱስ ክርስቶሳን ደእያ ኡፋይሳ ኤካናዉ ህንተ ምንድ ኤቅዳ ኤቁዋ ኡባ ዎደ ኑኒ ቆፖስ።

4 ኑ እሻቶ፥ ፆሳይ ህንተና ዶሰይሳነ ባ አሰ ኦꬅድ ህንተና ዶርዳይሳ ኑኒ ኤሮስ። 5 አይስ ጊኮ፥ ኑኒ ዎንገላ ዶና ፃላላን ግዶናሽን፥ ዎልቃን፥ ጌሻ አያናንነ ዎንገላ ቱማ አማኖን ህንተዉ ኤህዳ። ኑኒ ህንተራ ጋምእዳ ዎደ ኡባን ህንተ ግሾ ዋንድ ደእዳኮ ህንተ ኤሬታ። 6 ህንተ ዳሮ መቶ ኤክኮካ ጌሻ አያናይ እምያ ኡፋይሳን ኪታ ኤክደታ፤ ኑናነ ጎዳ ዳንደታ። ሀዋ 17:5-9. 7 ሄሳ ግሾ፥ ማቀዶነነ አካያ ቢታን ደእያ አማንያ ኡባስ ሌምሶ ግድደታ። 8 ጎዳ ቃላይ ህንተፈ ከይድ፥ ማቀዶነንነ አካያ ፃላላን ግዶናሽን፥ ፆሳ ህንተ አማነይስ ኡባሶን ስኤትስ። ህዛ፥ ኑኒ ጋናባይ አይኮይካ ባዋ። 9 ኑኒ ህንተኮ ብዳ ዎደ ህንተ ኑና ሞክዳ ሞኩዋነ ህንተ፥ ህንተ ኤቃ አግድ ቱማነ ደኦ ፆሳ ሀጋዛናዉ ህንተ ስምዳይሳ ኤንቲ ባንታ ሁጰን ኦዶሶና። 10 ቃስ ፆሳ ናአይ፥ የሱሲ፥ ፆሳይ ሀይቆፐ ደንꬅዳይስ፥ ስንꬃፈ ያና ፆሳ ሀንቁዋፈ ኑና አሻናይስ፥ ሳሎፐ ያናይሳ ህንተ ናገይሳ ኤንቲ ማርካቶሶና።