1 ታ እሻቶ፥ ኑኒ ህንተኮ ብዳይ መላ ግዶናይሳ ህንተ፥ ህንተ ሁጰን ኤሬታ። 2 ሽን ኑኒ ህንተኮ ተሰሎንቀ ያናፐ ስን ፍልጵስዩሳ ካታማን ዋየትዳይሳነ ጫየትዳይሳ ህንተ ኤሬታ። ዳሮ እፆይ ደእኮካ ህንተዉ እያ ዎንገላ ኦዳና መላ ፆሳይ ኑስ ምኖተꬅ እሚስ። ሀዋ 16:19-24፤ 17:1-9. 3 ኑኒ ህንተና ዞርዳይ ባለꬆን ዎይኮ ጭሞን ዎይኮ ገነን ግደና።

4 ሽን ፆሳይ ኑናን አማነትድ ባ ዎንገላ ኦዳና መላ ኑስ ሀዳራ እምዳ ግሾ ኦዶስ። ኑ ሄሳ ኦይ ኑ ዎዛና በእያ ፆሳ ኡፋይሳናሳፈ አትሽን፥ አሰ ኡፋይሳናሳ ግደና። 5 ኑ ሚሸ ያርድ ዎርዶ ህንተና ሳቢሸ ህንተኮ ዮናይሳ ሎይꬅድ ኤሬታ፤ ፆሳይ ኑስ ማርካ። 6 ኑኒ ህንተፈ ግድን ዎይኮ ሀራ አሳ ኦደፈካ ቦንቾ ኮይቦኮ። 7 ኑኒ ክርስቶሳ ሀዋረ ግደይሳዳ ኑስ ኮሽያባ እምተ ግድ ኤካናዉ ዳንዳኦስ፥ ሽን አይያ ባ ናይታ ድቸይሳ መላ ህንተ ግዶን አሽከ ግድዳ። 8 ኑ ህንተና ዶስዳ ግሾ ፆሳ ዎንገላ ህንተዉ ሻኮ ፃላላ ግዶናሽን፥ ኑ ደኡዋካ ህንተዉ እማናዉ ጊግዳ። ህንተ ኑስ ዳሮ አልኦ። 9 ኑ እሻቶ፥ ኑ ኦሱዋነ ኑ ዳቡራ ኤሬታ። ህንተዉ ፆሳ ዎንገላ ኦድሸ፥ ህንተና ዋይሶና መላ ቃማነ ጋላስ ኦꬅዳ።

10 ኑ ደኦይ ህንተ አማነይሳታ ማታንነ ፆሳ ስንꬃን ጌሽ፥ ፅሎነ ቦረቶናይሳ ግደይሳስ ህንተ ማርካ። 11 ኑኒ ህንተዉ ሁጰን ሁጰን የልዳይሳት ባንታ ናይታስ ሀነይሳዳ ሀንዳይሳ ኤሬታ። 12 ኑ ህንተና ዞርዳ፥ ምንꬅዳ። ቃስ ባ ካዎተꬃነ ባ ቦንቹዋ ሻካናዉ ህንተና ፄግያ ፆሳ ኡፋይስያ ደኦ ህንተ ዳና መላ ህንተዉ ምንꬅድ ኦድዳ።

13 ህንተዉ ኑኒ ፆሳ ቃላ ኦድዳ ዎደ አሳ ቃላዳ ግዶናሽን፥ ፆሳ ቃላዳ ስእድ ኤክዳ ግሾ ኑኒ ኡባ ዎደ ፆሳ ጋላቶስ። እ ቱማ ፆሳ ቃላ፤ ፆሳ ቃላይ አማንያ ህንተናን ኦꬄስ።

14 ታ እሻቶ፥ ህንተ ይሁዳ ቢታን ደእያ ዎሳ ኬꬃታነ ያን ክርስቶስ የሱሳ ካልያ አሳታዳ ሀንደታ። ኤንታ አይሁደት ዋይስዳይሳዳ ህንተናካ ህንተ ቢታ አሳይ ዋይስዶሶና። ሀዋ 17:5. 15 ሄ አይሁደት ጎዳ የሱሳነ ናበታ ዎꬍዶሶና፤ ቃስ ኑና ጎድዶሶና። ኤንቲ ፆሳ ኡፋይሶናይሳታነ አሰ ኡባ እፀይሳታ። ሀዋ 9:23፥ 29፤ 13:45፥ 50፤ 14:2፥ 5፥ 19፤ 17:5፥ 13፤ 18:12. 16 ኤንቲ ሀር አቶሽን፥ አይሁደ ግዶና አሳይ አታና መላ ኑኒ ኤንታዉ ቃላ ኦደይሳ ድጎሶና። ሄሳዳ ሀንድ ኤንታ ናጋራ ፁአይ ኩማና ጋካናዉ ኡባ ዎደ ናጋራ ኦꬆሶና። ዉርሰꬃን፥ ፆሳ ሀንቆይ ኤንታ ቦላ ዎꬌስ።

17 ሽን ኑ እሻቶ፥ ኑኒ ኑ ቆፋን ግዶናሽን፥ አሾን ህንተፈ ሻከትድ ጉꬃ ዎደ ጋምእዳይሳን ህንተና ዳሮ ላሞትድ በአናዉ ኮይዳ። 18 ኑ ስም ህንተኮ ባናዉ ኮይዳ። ታኒ ታ ሁጰን ህንተኮ ባናዉ ኮያስ፥ ሽን ፃላሄይ ኑና ድግስ። 19 ህዛ፥ ኑ ጎዳ የሱስ ክርስቶሲ ያ ዎደ፥ ኑ ኡፋይሳይ ዎይኮ ኑ ጬቀትያ ኑ ካላቻይ ኦኔ? ህንተና ግደከትዬ? 20 ቱማ ህንተ ኑ ቦንቾነ ኑ ኡፋይስ።