1 ዉርሰꬃን፥ ታ እሻቶ፥ ፆሳ ኡፋይሳናዉ ህንተ ዋንድ ዳናዉ በሲያኮ ኑፐ ታማርደታ። ሄስ ህንተ ኮይሮፐ ደእዳ ደኡዋ፥ ሽን ሀእ ህንተ ካሰይሳፈ አꬅድ ኦꬃናዳ ጎዳ የሱሳ ሱንꬃን ህንተና ዎሶስነ ዞሮስ። 2 ኑኒ ጎዳ የሱሳ ማታን ህንተና ኪትዳ ኪታይ አዉሰኮ ኤሬታ።

3 ፆሳይ፥ ህንተ ጌሽ ግዳና መላነ ላይማቶና መላ ኮዬስ። 4 ህንተ እሶይ እሶይ፥ ህንተ ማቸታራ ጌሻተꬃንነ ቦንቾን ዳናዉ በሴስ። 5 ፆሳ ኤሮናነ አማኖና አሳዳ ላይማተꬃ አሞን ፁገቶፍተ። 6 ኑ ካሰ ህንተዉ ኦድዳይሳዳነ ምንꬅ ዞርዳይሳዳ ጎዳይ ሄሳ መላባ ኦꬅያ ኡባ ፕርድያ ግሾ፥ ኦንካ ሀይሳታን ባ አማንያ እሻ ናቃናዉነ ጭማናዉ በሰና። 7 ፆሳይ ኑና ጌሻተꬃን ዳና መላ ፄግስፐ አትሽን፥ ቱናተꬃን ዳና መላ ፄግቤና። 8 ሄሳ ግሾ፥ ሀ ትምርትያ እፅያ ኦንካ ህንተዉ ጌሻ አያና እምያ ፆሳ እፄስፐ አትሽን፥ አሰ ግደና።

9 ህንተ እሶይ እሱዋ ዋት ሲቃነኮ ፆሳይ ህንተና ታማርስዳ ግሾ፥ ሀእ ሲቆባ ኑ ህንተዉ ፃፋናዉ ኮሸና። 10 ቃስ ማቀዶነ ቢታን ደእያ አማንያ እሻታ ኡባ ቱማ ህንተ ዶሴታ። ሽን ኑ እሻቶ፥ ሀእካ ህንተ ኤንታ አꬅድ ዶሳና መላ ህንተና ዎሶስ።

11 ኑኒ ካሰ ህንተዉ ኦድዳይሳዳ ዎፑ ግዳ ደኡዋ ደእተ። ህንተ፥ ህንተ ኦሶ ኦꬅድ ህንተዉ ዱሳስ ኮሽያባ ደምተ። 12 ሄሳዳ ሀንኮ፥ አማኖናይሳታ ማታን ህንተ ቦንቸታና፤ ቃስ ህንተና ኮሽያባስ ኦናካ አዳሸከታ።

13 ኑ እሻቶ፥ አማንድ ሀይቅዳ አሳት ሀናናባ ህንተ ኤራና መላ ኑ ኮዮስ። ህንተ ኤንታ ግሾ ኡፋይስ ባይና አሳዳ ካዮቶፍተ። 14 ኑኒ፥ የሱሲ ሀይቅዳይሳነ ቃስ ሀይቆፐ ደንድዳይሳ አማኖስ። ሄሳዳካ፥ ፆሳይ የሱሳ አማንድ ሀይቅዳይሳታ እያራ ዎላ ኤሀናይሳ አማኖስ።

15 ጎዳይ ኑስ ኦድዳይሳዳ ጎዳይ ያ ጋላስ እያራ ጋሄታናዉ ኑኒ ፓፃ ደኤይሳት፥ ሀይቅዳይሳታፐ ስንꬃቶኮ። 16 ጎዳይ ዎልቃማ ኪታራ፥ ኪታንቾታ ሀላቃ ግርሳራ፥ ፆሳ ሞይዘ ፑኖራ፥ ሳሎፐ ዎꬋና። ክርስቶሳ አማንድ ሀይቅዳይሳት ኮይሮትድ ሀይቆፐ ደንዳና። 17 ሄሳፈ ጉየ፥ ሄ ዎደ ኑኒ ፓፃ ደኤይሳት፥ ጎዳራ ሻራን ጋሄታናዉ ኤንታራ እስፈ ሳሎ ኤከታና። ሄሳፈ ጉየ፥ ኑኒ ጎዳራ እስፈ መርናዉ ዳና። 18 ሄሳ ግሾ፥ ሀ ቃላን እሶይ እሱዋ ምንꬅተ።