1 ታ እሻቶ፥ ሀ ሀኖት ሀናና ዎድያነ አጌና ህንተዉ ፃፋናዉ ኮሸና። 2 ጎዳ ጋላሳይ ካይሶይ ቃማ የይሳዳ ያናይሳ ህንተ ሎይꬅ ኤሬታ። ማቶ 24:43፤ ሉቃ 12:39፤ 2 ጰፅ 3:10. 3 አሳይ፥ “ሳእ ሳሮ፥ አይኮይካ ሀነና” ያግሽን፥ ማጫስ እቀꬅ ኦይከይሳዳ ꬋዮይ ኤንቲ ቆፖና ኤንታ ቦላ ያና። ኤንቲ አይ ኦገንካ ከስ ኤኮኮና።

4 ሽን ኑ እሻቶ፥ ሄ ጋላሳይ ህንተዉ ካይሶይ የይሳዳ ያናዉ ህንተ ꬉማን ደኤከታ። 5 ህንተ ኡባይ ፖኦ አስነ ጋላሳን ደእያ አስ፤ ኑኒ ቃማ አስ ዎይኮ ꬉማ አስ ግዶኮ። 6 ሄሳ ግሾ፥ ኑኒ ሀራት ꬍስከይሳዳ ꬍስካናዉ በሰና፤ ኑኒ ባርካናዉነ ጊግድ ዳናዉ በሴስ። 7 ꬍስከይሳት ቃማ ꬍስኮሶና፤ ማꬆተይሳት ቃማ ማꬆቶሶና። 8 ሽን ኑኒ ጋላሳ አስ ግድያ ግሾ ጊግድ ዳናዉ በሴስ። አማኖነ ሲቆ ፁሩረዳ ትራን ማእድ፥ አቶተꬃ ኡፋይሳ ሁጰን ዎꬅያ ኦላ ብራታ ባርኔፃዳ ዎꬅድ ዳናዉ በሴስ። እሳ 59:17፤ ኤፈ 6:13-17. 9 ፆሳይ ኑና ኑ ጎዳ የሱስ ክርስቶሳ ባጋራ ኩመꬃ አቶተꬅ ኤካና መላ ዶርስፐ አትሽን፥ ሀንቆስ ዶርቤና። 10 ኑኒ ፓፃ ደእን ዎይኮ ሀይቅን፥ ክርስቶስ ያ ዎደ እያራ እስፈ ዳና መላ ክርስቶስ ኑ ግሾ ሀይቅስ። 11 ሄሳ ግሾ፥ ህንተ ካሰ ኦይሳዳ፥ እሶይ እሱዋ ምንꬅተነ ድችተ።

12 ኑ እሻቶ፥ ህንተ ግዶን ኦይሳታ፥ ህንተና ካለꬃና መላነ ዞራና መላ ጎዳይ ዶርዳይሳታ ቦንቻና መላ ህንተና ዎሶስ። 13 ኤንቲ ኦꬅያ ኦሱዋ ግሾ፥ ኤንታ ዳሮ ቦንችተነ ሲቅተ። እሶይ እሱዋራ ሳሮተꬃን ደእተ።

14 ኑ እሻቶ፥ ኑኒ ህንተና ዞሮስ። ቦዛታ ሀንቅተ፤ ባበይሳታ ምንꬅተ፤ ዳቡራንቾታ ማድተ፤ አሰ ኡባ ዳንዳእተ። 15 ኦንካ ኢታ ግሾ ኢታ ዛሮና መላ ናገትተ። ህንተ ዎልስነ አሳ ኡባስ ሎኦባ ኦꬃናዉ ምንተ።

16 ኡባ ዎደ ኡፋይትተ። 17 ኡባ ዎደ ፆሳ ዎስተ። 18 ኡባባን ጋላትተ። ክርስቶስ የሱሳ ባጋራ ፆሳይ ህንተፈ ኮየይ ሄሳ።

19 ጌሻ አያና ኦሱዋ ቶይሶፕተ። 20 ትንብተ ቃላ ካꬎፕተ። 21 ኡባባ ፓጭተ፤ ሎኦባ ኤክተ። 22 ኢታ ኦሶ ኡባፈ ሃክተ።

23 ሳሮ እምያ ፆሳይ ባ ሁጰን ህንተና ፖሎ ጌሾ። ኑ ጎዳይ የሱስ ክርስቶሲ ያና ጋላሳስ፥ ፆሳይ ህንተ አያና፥ ህንተ ሸምፑዋነ ህንተ ኩመꬃ አሳተꬃ ቦረይ ባይና ናጎ። 24 ህንተና ፄገይስ አማነትዳይሳ ግድያ ግሾ፥ ሄሳ እ ፖላና።

25 ኑ እሻቶ፥ ኑስ ፆሳ ዎስተ።

26 አማንያ አሳ ኡባ ጌሻ ዬረተꬃን ሳሮꬅተ።

27 ህንተ ሀ ኪታ አማንያ አሳ ኡባስ ናባባናዳ ጎዳ ሱንꬃን ህንተና ዎሳይስ።

28 ኑ ጎዳ የሱስ ክርስቶሳ አꬎ ኬሀተꬃይ ህንተራ እስፈ ግዶ። አምንእ።