1 ሶሎሞነይ ፆሳ ኬꬃነ ባዉ ጋꬎ ኬፅዳ ላታማንꬆ ላይꬃ ዉርሰꬃን፥ 2 ካዎይ ክራም እምዳ ካታማታ ሶሎሞነይ ዛር ኬፅድ እስራኤለ አሳ ሄ ካታማታን ዎꬅስ።

3 ሶሎሞነይ ሀማታነ ሱባ ጌተትያ ቢታ ብድ ኦይክስ። 4 ያትድ መላ ቢታን ደእያ ታድሞራ ካታማነ ሻሎ ምንጅያ ካታማታ ሀማታ ቢታን ኬፅስ። 5 ሄሳዳካ፥ ሶሎሞነይ ቆሞ ቤት-ሆሮናነ ጋርሳ ቤት-ሆሮና ጌተትያ ካታማታ ዛሪድ ኬፅስ። ሄ ካታማት ድርስ፥ ፐንገይነ ኮበይ ደእያ ድረትድ ኡትዳ ካታማታ። 6 ባላታ ካታማ፥ ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ዎꬅያ ካታማታ ኡባነ እ ኬፃናዉ አሞትዳ ኡባ የሩሳላመን፥ ልባኖሰንነ ባ ሃርያ ቢታ ኡባን ኬፅስ።

7 እስራኤለ ግዶናሽን ሀራ ቢታ አሳታፐ አትዳ ህተታ፥ አሞረታ፥ ፓርዘታ፥ ህወታነ ያቡሰታ፥ 8 እስራኤለ አሳይ ዉርስድ ꬋይሶና አግዳ አሳ ዎልቃ ኦሶ ኦꬃና መላ ሶሎሞነይ ዶርስ፤ ሀች ጋካናዉ ኤንቲ ኦꬆሶና። 9 ሽን ሶሎሞነይ እስራኤለ አሳፐ ኦናካ አይለ ኦꬅድ ኦስስቤና። ኤንቲ እያ ኦላንቾታ፥ ቶራ ሞጮናታ፥ ፓራ ጋረ ላገይሳታ ሀላቃታነ ፓራ አሳታ ግድድ ኦꬅዶሶና። 10 ኤንታ ግዶፈ ናምኡ ፄታነ እሻታሙ አሳት ካዋ ሶሎሞነ ኦሱዋ አዋተꬃን ኦስሶሶና።

11 ሶሎሞነይ፥ “ጎዳ ታቦተይ ገልዳ በሳይ ጌሽ ግድያ ግሾ፥ ታ ማችያ፥ ፋሮና ናእያ፥ እስራኤለ ካዋ ዳዊታ ጋꬎን ዳናዉ በሱኩ” ያግድ፥ ግብፀ ካዋ ናእዉ ዳዊታ ካታማፐ ደንꬅድ እዉ ኬፀትዳ ኬꬃን ዎꬅስ።

12 ሶሎሞነይ ሄ ዎደ ፆሳ ኬꬃ ስንꬃን ጎዳስ ኬፅዳ ያርሾ በሳን ፁሳ ያርሾ ጎዳስ ያርሽስ። 13 ሙሰ ህገይ ኪተይሳዳ ጋላስ ጋላስ ፁሳ ያርሾ ያርሼስ። ሶሎሞነይ ሳምባታ ጋላሳን፥ አጌና ፄሮንነ ላይꬃን ሄꬑ ቶሆ ቦንቸትያ ባለታን፥ ሄስካ ኡይꬃ ባለን፥ ሳምንታ ባለንነ ሻቃራ ባለን ጎዳስ ያርሾ ያርሼስ።

14 እያ አዋይ ዳዊቲ ካሰ ኪትዳይሳዳ ካህነታ ኤንታ ኦሶን ኦሶን ሻክድ ሹምስ፤ ጋላስ ጋላስ ማዝሙረን ሳባና መላነ ካህነታ ማዳና መላ ሌወታ ሻክድ ሹምስ። ፆሳ አስ ግድዳ ዳዊቲ ኪትዳይሳዳ ፐንገ ናግያ አሳታ እስ እስ ፐንግያ ናጋና መላ ሹምስ። 15 ሄሳዳካ፥ ካሰ ዳዊቲ ቡቁራ ምንጅያ በሳነ ሀራ አላለታባ ካህነታነ ሌወታ ኪትዳይሳዳ እሶይካ አቶና ኡባይ ፖለትስ።

16 ሶሎሞነይ ቆፕዳ ኦሶ ኡባይ ኦሰትድ ዉርስ፤ ፆሳ ኬꬃይ ባሰትዳ ዎድያፐ ዶምድ ፖለታና ጋካናዉ ኦሶ ኡባይ ሎኦ ኦሰትስ።

17 ሄ ዎደ ካዎይ ሶሎሞነይ ኤዶመ ቢታን ዞኦ አባ ዶናን ደእያ ኤፅዮን-ጋብራነ ኤሎታ ብስ። 18 ካዎይ ክራም ማርካበታነ ማርካብያ ላጎን ሎህዳ አሳታ ሶሎሞነስ የድስ። ኤንቲ ሶሎሞነ አሳታራ እስፈ ኦፍራ ቢታ ብድ ያፐ 15,000 ክሎ ግራመ ዎርቃ ካዋ ሶሎሞነስ ኤህዶሶና።