1 ሶሎሞነይ ዎሳ ፖልዳ ዎደ ሳሎፐ ታም ዎꬍድ ፁሳ ያርሹዋነ ሀራ ያርሹዋ ምስ። ጎዳ ቦንቾይ ፆሳ ኬꬃ ኩምስ። 2 ጎዳ ቦንቾይ ፆሳ ኬꬃ ኩምዳ ግሾ ካህነት ፆሳ ኬꬃ ገላናዉ ዳንዳእቦኮና። 3 እስራኤለ አሳ ኡባይ ታም ሳሎፐ ዎꬍሽንነ ጎዳ ቦንቾይ ፆሳ ኬꬃ ኩምሽን በእዳ ዎደ ባንታ ሶምኡዋ ሳአ ጋꬅድ ጎይንዶሶና።

4 ካዎይነ አሳ ኡባይ ጎዳ ስንꬃን ያርሾ ያርሽዶሶና። 5 ካዎይ ሶሎሞነይ ላታማነ ናምኡ ሙኩሉ ኮርማታነ ፄታነ ላታሙ ሙኩሉ ዶርሳታ ያርሽስ። ሄሳዳ ኦꬅድ፥ ካዎይነ አሳ ኡባይ ፆሳ ኬꬃ ጎዳስ ዱማይዶሶና። 6 ካህነት ባንታዉ ጊግዳ በሳን ኤቅን፥ ሌወት ካዎይ ዳዊቲ ጎዳ ሳባናዉ ካሰ ኦꬅዳ ማዝሙረ የፅያ ሚሸታ ኦይክድ ኤንታ ስንꬃን ኤቅድ፥ “እያ ሲቆይ መርናሳ” ያግድ የፅሸ ጎዳ ጋላትዶሶና። ካህነት ሌወታ ስንꬃን ኤቅድ ሞይዘ ፑንን እስራኤለ አሳ ኡባይ ኤቅስ።

7 ሶሎሞነይ ፆሳ ኬꬃ ስንꬃን ደእያ ግዶ ዳባባ ዱማይስ። ሄ በሳን ፁሳ ያርሾነ እስፈተꬃ ያርሹዋፈ ሞꬉዋ ያርሽስ። እ ሄሳ ኦꬅዳይ፥ ጎዳ ስንꬃን ደእያ ናሰ ብራታፐ ኦሰትዳ ያርሾ በሳይ፥ ፁሳ ያርሹዋ፥ ካꬃ ያርሹዋነ እስፈተꬃ ያርሹዋፈ ሞꬉዋ ያርሻናዉ ጉፅዳ ግሾሳ።

8 ሄ ዎደ ሶሎሞነይነ እስራኤለ አሳ ኡባይ ላፑን ጋላስ ባኣለ ቦንችዶሶና። እስራኤለ አሳይ ሀማታፐ ብድ ግብፀ ሻፋ ጋካናዉ ደእያ ዳሮ አሳይ ሄ በሳን ሺቅዶሶና። 9 አሳይ ያርሾ በሳ አንጅስያ ባኣለ ላፑን ጋላስ ቃስ ሻቃራ ባኣለ ሀራ ላፑን ጋላስ ቦንችዶሶና። ሆስፑንꬃ ጋላስ ዉርሰꬃ ሺቆ ሺቅዶሶና። 10 ሶሎሞነይ ላፑንꬃ አጌናን፥ ላታማነ ሄꬓንꬆ ጋላሳን አሳ ሞይዝስ። አሳይ፥ ጎዳይ ዳዊታስ፥ ሶሎሞነስነ ባ አሳ እስራኤለስ ኦꬅዳ ኬሀተꬃን ኡፋይትሸ ባ ሶ ሶ ብዶሶና።

11 ሶሎሞነይ ፆሳ ኬꬃነ ካዎ ጋꬎ ኬፅድ ዉርስስ። ሶሎሞነይ ፆሳ ኬꬃንነ ባ ጋꬎን ኦꬃናዉ ባ ዎዛናን ቆፕዳባ ኡባ ፖልስ። 12 ጎዳይ ሶሎሞነስ ቃማ ቆንጭድ፥ “ታኒ ነ ዎሳ ስአስ፤ ታኒ ሀ ፆሳ ኬꬃ ያርሾ በሲ ግዳና መላ ዶራስ። 13 እር ቡኮና መላ ታ ሳሉዋ ጎርድያ ዎደ ዎይኮ ካꬅ ማና መላ ቦለ ኪትያ ዎደ ዎይኮ ታ አሳ ቦላ ጋዶ የድያ ዎደ 14 ታ ሱንꬃን ፄገትዳ ታ አሳይ ባንታ አሳተꬃ ካዉሽድ ዎስኮ፥ ታና ኮይኮ፥ ባንታ ኢታ ኦግያፐ ስምኮ፥ ታ ሳሎን ኤንታ ዎሳ ስአና፤ ኤንታ ናጋራ አቶ ጋና፤ ኤንታ ቢታ ፓꬃና። 15 ሀእ ሀ በሳን ዎሰትያ ዎሳ ታ አይፈይ ፄላና፤ ታ ሀይꬃይ ስአና። 16 ሀእ ታ ሱንꬃይ መርናዉ እያን ዳና መላ ሀ ኬꬃ ዶራስነ ጌሻስ። ታ አይፈይነ ታ ዎዛናይ ኡባ ዎደ ሀ ኬꬃን ዳና።

17 “ነ አዋይ ዳዊቲ ኦꬅዳይሳዳ ኔኒ ታ ስንꬃን ሄመትኮ፥ ታ ኪታ ኡባ ኦꬅኮ፥ ታ ዎጋነ ታ ህግያ ናግኮ፥ 18 ታኒ ነ አዋ ዳዊታራ፥ ‘ነ ኮቻፈ እስራኤለ ቦላ ካዎ ግድያ አስ ꬋያካ’ ያጋዳ ጫቅዳይሳዳ ነ አራታ ምንꬃዳ ኤሳና።

19 “ሽን ህንተ ታና አግድ ታ ህንተዉ እምዳ ዎጋነ ህግያ አግኮ፥ ሀራ ፆሳታ ጎይንኮነ ኤንታዉ ኦꬅኮ፥ 20 ታኒ ካሰ ህንተዉ እምዳ ቢታፈ ህንተና ꬎቆላና፤ ታ ሱንꬃስ ዱማይዳ ሀ ኬꬃካ አጋጋና። ታ ሀ ኬꬃ ካዎተꬃ ኡባ ግዶን ሚቻስነ ቀልቅሰꬃስ ኦꬃና። 21 ሀ ፆሳ ኬꬃይ ዳሮ ማላልስያባ ግድኮካ፥ እያ ማታራ አꬍያ ኡባይ ማላለትድ፥ ‘ጎዳይ ሀ ቢታነ ሀ ፆሳ ኬꬃ አይስ ሀይሳዳ ኦꬅዴ?’ ” ያጋና። 22 አሳይ ዛሪድ፥ “ሀይሳ ኡባ ኤንታ ቦላ ኤህዳይ፥ ኤንታና ግብፀፈ ከስዳ ኤንታ ማይዛታ ፆሳ አግድ ሀራ ፆሳታ ካልዳ ግሾነ ኤንታ ጎይንዳ ግሾሳ” ያጋና።