1 ሶሎሞነይ፥ “አቤት ጎዳዉ፥ ‘ታ ꬉማ ሻራን ዳና’ ያጋዳሳ። 2 ሽን ታኒ ኔኒ ያን መርናዉ ዳና ሎኦ ኬ ነዉ ኬፃስ” ያግስ።

3 እስራኤለ ሺቆይ ያን ኤቅዳሽን፥ ካዎይ ኤንታኮ ስሚድ፥ ኤንታ ሀይሳዳ ያግድ አንጅስ፤ 4 “ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። ሄ እ ኦድዳ ኡፋይሳይ፥ 5 ‘ታኒ ታ አሳ እስራኤለ ግብፀፈ ከሳዳ ኤህዳ ዎደፐ ዶምን፥ ታ ሱንꬃይ እያን ፄገታና መላ ታዉ ኬ ኬፃናዉ እስራኤለ ኮቻታ ግዶን አይ ካታማካ ዶራብከ፤ ዎይኮ እ ታ አሳ እስራኤለ ካለꬃና መላ ኦናካ ዶራብከ። 6 ሽን ሀእ ታ ሱንꬃይ የሩሳላመን ፄገታና መላ ታኒ የሩሳላመ ዶራስ፤ ቃስ ታ አሳ እስራኤለ ካለꬃና መላ ዳዊታ ዶራስ።’

7 “ታ አዋይ ዳዊቲ ጎዳ እስራኤለ ፆሳ ሱንꬃስ ኬ ኬፃናዉ ባ ዎዛናን ቆፕስ። 8 ሽን ጎዳይ ታ አዋ ዳዊታኮ፥ ‘ኔኒ ታ ሱንꬃስ ኬ ኬፃናዉ ነ ዎዛናን ቆፕዳ ግሾ ሎኦ ኦꬃዳሳ። 9 ግዶሽን፥ ታዉ ኬ ኬፃናይ ነና ግዳካ፤ ታ ሱንꬃስ ኬ ኬፃናይ ነ ጉልባታፐ ከያና ነ ናኣ።’

10 “ጎዳይ ባ ግዳ ኡፋይሳ ቃላ ፖልስ። ጎዳይ ካሰ እምዳ ኡፋይሳዳ ታኒ ታ አዋ ዳዊታ በሳን ካዎታዳ እስራኤለ ካዎተꬃ አራታን ኡታስ። ቃስ ጎዳ እስራኤለ ፆሳ ሱንꬃስ ኬ ኬፃስ። 11 ጎዳይ እስራኤለራ ጫቅዳ ጫቆይ ፃፈትዳ ሎቸ ሹቻት ደእያ ታቦትያ እያ ግዶን ዎꬃስ” ያግስ።

12-13 ሶሎሞነይ አዱሳተꬃይ እቻሹ ዋꬋ፥ ጎምፓይ እቻሹ ዋꬋነ ꬎቃተꬃይ ሄꬑ ዋꬋ ግድዳ ማድራከ ናሰ ብራታፐ ኦꬅድ ዳባባ ግዶን ዎꬅስ። ሶሎሞነይ ጎዳ ያርሾ በሳ ስንꬃን፥ እስራኤለ ማባራይ ደእያ በሳን ኤቅድ፥ ባ ኩሽያ ምጭድ እስራኤለ ሺቁዋ ስንꬃን ጉልባትስ። 14 እ ሀይሳዳ ያግድ ዎስስ፦

“አቤት ጎዳዉ፥ እስራኤለ ፆሳዉ፥ ሳሎን ዎይኮ ሳአን ነ መላ ፆሲ ባዋ። ኔኒ ነ ኡፋይሳ ቃላ ናጋሳ፤ ባንታ ኩመꬃ ዎዛናፐ ነ ስንꬃን ሄመትዳ ነ አይለታ መርና ሲቁዋን ዶሳዳሳ። 15 ነ አይልያ፥ ታ አዋ ዳዊታስ ኔኒ ኦꬃና ጋዳ ኦድዳ ቃላ ናጋዳሳ። ኔኒ ካሰ ነ ዶናን ኦድዳይሳ ነ ኩሸን ሀች ፖላዳሳ። 16 አቤት ጎዳዉ፥ እስራኤለ ፆሳዉ ኔኒ ነ አይልያ፥ ታ አዋ ዳዊታስ፥ ‘ኔኒ ታ ስንꬃን ሄመትዳይሳዳ ነ ናይትካ ታ ህግያን ሄመታናዉ ባንታ ኦግያ ናግኮ፥ እስራኤለ አራታን ኡትያ አሰ ꬋያካ’ ያግዳ ቃላ ፖላ። 17 አቤት ጎዳዉ፥ እስራኤለ ፆሳዉ፥ ኔኒ ነ አይልያ ዳዊታስ ኦድዳ ነ ኡፋይሳ ቃላይ ፖለቶ።

18 “ሽን ፆሲ ቱማ፥ አሳራ ሳአን ደእዬ? ሄኮ፥ ሳሎይ፥ ኡባፈ ꬎቃ ሳሎይ ነና ኦይካናዉ ዳንዳኤና። ያትን፥ ሀ ታ ኬፅዳ ኬꬃይ ነዉ አይ መላ ጉፃንደሻ! 19 ግዶሽን፥ አቤት ጎዳዉ፥ ታ ፆሳዉ፥ ታ ዎሳ፥ ነ አይልያ ዎሳነ ፄሳ ስአ። ታኒ ነ አይለይ ነ ስንꬃን ዎስያ ዎሳነ ዋሱዋ ስአ። 20 ኔኒ፥ ‘ታ ሱንꬃይ ሄ በሳን ፄገታና’ ግዳ ሀ ፆሳ ኬꬃኮ፥ ነ አይፈይ ቃማ ጋላስ ፄሎ። ታኒ ነ አይለይ ሀ ኬꬃኮ ስማዳ ዎስያ ዎሳ ስአ። 21 ታኒ ነ አይለይነ ነ አሳይ እስራኤለይ ሀ ነ ኬꬃኮ ስሚድ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ።

22 “እስ አስ ባ ሾሩዋ ቆህድ አካይ ግን፥ እያ ጫቀꬃናዉ ሀ ነ ኬꬃ ኤህን፥ እያ ግዶን ደእያ ያርሾ በሳ ስንꬃን እ ጫቅኮ፥ 23 ኔኒ ሳሎን ስአዳ ኦꬃ። ነ አይለታ ግዶን ፕርዳ። ቆህዳ ኡራ ቦላ ፕርዳዳ፥ እ ኦꬅዳባ እያ ቦላ ዛራ፤ ፅሉዋ ፆንሳዳ እያዉ እያ ፅሎተꬃዳ ዛራ።

24 “ነ አሳይ እስራኤለይ ነ ቦላ ናጋራ ኦꬅድ፥ ሞርከን ፆነትድ፥ ኔኮ ስሚድ፥ ነ ሱንꬃ ፄግድ፥ ሀ ኬꬃን ነና ዎስኮ፥ 25 ነ ሳሎን ስአ። ነ አሳ እስራኤለ ናጋራ አቶ ያጋ፤ ነ ካሰ ኤንታዉነ ኤንታ ማይዛታስ እምዳ ቢታ ኤንታ ዛራ።

26 “ነ አሳይ ነ ቦላ ናጋራ ኦꬅን፥ ሳሎይ ጎርደትኮ፥ እር ቡኮና እፅን፥ ኤንቲ ሀ በሳ ስሚድ፥ ዎስኮ ነ ኤንታ ኡንኤꬅዳ ግሾ፥ ነ ሱንꬃ ፄግድ፥ ባንታ ናጋራፐ ስምኮ፥ 27 ነ ሳሎን ስአ። ነ አይለታ ናጋራ፥ ነ አሳ እስራኤለ ናጋራ አቶ ያጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ኔኒ ነ አሳስ እምዳ ቢታን እራ ቡክሳ።

28 “ቢታ ቦላ ኮሽ ዎይኮ ቦሽ ዎይኮ ሌገይ ዎይኮ ቦለይ ዎይኮ ጎንዶይ ꬋይስን ዎይኮ ሞርከይ ኤንታ ካታማታ ተቅን ዎይኮ ꬋዮይ ዎይኮ ሀርገይ ይን፥ 29 ነ አሳ እስራኤለፐ ኦንካ ዎይኮ ነ አሳ ኡባይ ነና ዎስኮ፥ አይ አስካ ባ ዎዛናን ኡንኤትያባነ አዛንያባ ኤርድ፥ ሀ ፆሳ ኬꬃኮ ስሚድ፥ ባ ኩሽያ ምጭኮ፥ 30 ነ ደእያ በሳን ሳሎን ስአ። ኤንታ ናጋራ አቶ ያጋ፤ ኤንታዉ ኦꬃ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ። 31 ሄስካ ነ ኑ ማይዛታስ እምዳ ቢታን ባንታ ደኦ ላይꬃ ኡባን ነዉ ያያና መላነ ነ ኦግያን ሄመታና መላሳ።

32 “እስራኤለ ግዶና ሀራ ቢታ አስ ነ ግታ ሱንꬃ ግሾነ ኔኒ ነ አሳስ ኦꬅዳ ማላልስያ ኦሶታ ግሾ ሃሆ ቢታፈ ይድ፥ ሀ ፆሳ ኬꬃኮ ስሚድ ዎስኮ፥ 33 ነ ደእያ በሳን ሳሎን ስአ። ሀራ ቢታ አሳይ ኦይችያባ ኡባ ኦꬃ። ሀ አላምያን ደእያ አሳ ኡባይ ነ ሱንꬃ ኤራናዳነ ነ አሰ ግድዳ እስራኤለዳ ነዉ ያያናዳ ታ ኬፅዳ ሀ ኬꬃይ ነ ጎይነትያ በሲ ግደይሳ ኤንቲ ኤራናዳ ሀራ ቢታ አሳይ ነና ዎስያባ ኡባ ኦꬃ።

34 “ኤንቲ ባንታ ሞርከታ ኦላና መላ ነ ኪትያ ዎደ ነ ዶርዳ ሀ ካታማኮነ ታ ነ ሱንꬃ ግሾ ኬፅዳ ሀ ኬꬃኮ ስሚድ ነና ዎስኮ፥ 35 ኤንታ ዎሳነ ኤንታ ኦይሻ ሳሎን ስአ፤ ኤንታ ኦይሻ ዛራ።

36 “ናጋራ ኦꬆና አስ ባይና ግሾ ነ አሰ ግድዳ እስራኤለይ ናጋራ ኦꬅድ ነና ቆህኮ ኔኒ ሸነታዳ ሞርከታስ አꬃ እምን ሞርከት ኤንታ ድእድ ሃሆ ዎይኮ ማታ ቢታ ኤንታ ኤፍን፥ 37 ኤንቲ ሄ ድኤትዳ ቢታን ደእሸ ባንታ ዎዛናን ናጋራፐ ስምኮ፥ ‘ኑኒ ናጋራ ኦꬅዳ፤ ኑኒ ቆህዳ፤ ኑኒ ኢታባ ሀንዳ’ ያግድ ነና ዎስኮ፥ 38 ባንታና ድእድ ኤፍዳ ሞርከታ ቢታን ደእሸ ኤንቲ ባንታ ኩመꬃ ዎዛናንነ ኩመꬃ ቆፋን ኔኮ ስምኮ፥ ኔኒ ኤንታ ማይዛታስ እምዳ ቢታኮ፥ ኔኒ ዶርዳ ካታማኮነ ታኒ ነ ሱንꬃ ግሾ ኬፅዳ ኬꬃኮ ስሚድ ነና ዎስኮ፥ 39 ኤንታ ዎሳነ ኦይሻ ነ ደእያ በሳን ሳሎን ስአ፤ ኤንታዉ ፕርዳ፤ ኤንታ ናጋራ አቶ” ያጋ።

40 “አቤት ታ ፆሳዉ፥ ሀ በሳን ዎስያ ዎሳ ነ አይፈይ ፄሎ፤ ነ ሀይꬃይ ስኦ።