1 ሶሎሞነይ ፆሳ ኬꬃ ኦሶ ኡባ ፖልዳፐ ጉየ እያ አዋይ ዳዊቲ ጎዳስ ዱማይድ ዎꬅዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬꬃ ቡቁራ ምንጅያ በሳን ዎꬅስ።

2 ሄሳፈ ጉየ፥ ካዎይ ሶሎሞነይ ጎዳ ቃላ ጫቆ ታቦትያ ዳዊታ ካታማ ግድዳ ፅዮነፐ ኤሀና መላ እስራኤለ ጭማታ፥ እስራኤለ ኮቻታነ ሶ አሳ ሀላቃታ የሩሳላመ ሺሽስ። 3 እስራኤለ አሳ ኡባይ ላፑንꬆ አጌናን፥ ሻቃራ ባለይ ቦንቸትያ ዎደ ካዋኮ ሺቅዶሶና። 4 እስራኤለ ጭማት ኡባይ ጋክን፥ ሌወት ታቦትያ ደንꬅዶሶና። 5 ሌወትነ ካህነት ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና። 6 ካዎይ ሶሎሞነይነ እያራ ደእያ እስራኤለ ማባራ ኡባይ ታቦትያ ስንꬃን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና።

7 ካህነት ጫቆ ታቦተይ ፆሳ ኬꬃ ኡባፈ ጌሻ በሳ ኤህድ፥ ክሩበታ ምስለታ ቀፈታፐ ጋርሳራ ዎꬅዶሶና። 8 ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና። 9 ካሶት ዳሮ አዱሰ ግድያ ግሾ፥ ኤንታ ፄራይ ኡባፈ ጌሻ በሳ ስንꬃን ደእያ ጌሻ በሳን ኤቅዳ አስ በአናዉ ዳንዳኤስ፤ ሽን ጌሻ በሳፈ ካረራ በንተና። ኤንቲ ሀች ጋካናዉ ሄ በሳን ደኦሶና። 10 እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎꬅዳ ናምኡ ሎቸ ሹቻታፐ አትሽን፥ ታቦትያ ግዶን ሀራባይ ባዋ።

11 ሄ በሳን ደእያ ካህነት ኡባይ ባንታ ኦꬅያ በሳን በሳን ሻከቶና ደእሸ ባንታና ጎዳስ ዱማይዶሶና። 12 ማዝሙረ ዛማርያ ሌወት ኡባይ፥ አሳፍ፥ ሄማንነ ኤዶታፐ፥ ኤንታ ናይትነ ኤንታ ዳቦት ሊኖ ጌተትያ ማኦ ማእዶሶና። ሄ ማኡዋ ማእድ፥ ዳላ፥ ዲꬅነ ማስንቆ ኦይክድ፥ ያርሾ በሳፈ ዶሎሀ ባጋራ ኤቅዶሶና። 13 ፄታነ ላታሙ ካህነት ሞይዘ ፑናናዉ ኤንታራ ኤቅዶሶና። ኤንቲ ኡባይ ሞይዘ ፑንሸ፥ ዳላ ቃꬅሸ፥ ዲꬅ ዲፅሸነ ሀራ ሚሸታ ካእሸ፥

14 ጎዳ ቦንቾይ ፆሳ ኬꬃ ኩምዳ ግሾ፥ ሻራ ጋሶን ካህነት ባንታ ኦሱዋ ኦꬃናዉ ዳንዳእቦኮና።