1 ሄሳፈ ጉየ፥ ሶሎሞነይ አዱሳተꬃ ላታሙ ዋꬋ፥ ጎምፓይ ላታሙ ዋꬋ፥ ꬎቃተꬃይ ታሙ ዋꬋ ግድያ ያርሾ በሳ ናሰ ብራታፐ ኦስስስ።

2 ቃስ ናሰ ብራታ ሴርስድ፥ ዶናይ ያ ጋፃፐ ሀ ጋፃ ጋካናዉ ታሙ ዋꬋ፥ አዱሳተꬃይ እቻሹ ዋꬋነ ዩሾይ ሀስታሙ ዋꬋ ግድያ አባ ሳነ መꬍስስ። 3 አባ ሳነ ዶናን ካረ ባጋራ ዩይ አꬍድ፥ እያራ ኦይከትድ መትዳ ምስለት ደኦሶና፤ ሄ ምስለት ናምኡ ማራን ደእያ ቦራታ ምስለታ።

4 ሄ አባ ሳነ ናሰ ብራታፐ መትዳ ታማነ ናምኡ ቦራታ ምስለታስ ዞኩዋን ኡትስ። ቦራታፐ ሄꬓት ፑደሀ ባጋ፥ ሄꬓት ዉሎሀ ባጋ፥ ሄꬓት ዱገሀ ባጋ፥ ሄꬓት ቃስ ዶሎሀ ባጋ ስሚድ ፄልያባ ዳኖሶና። አባ ሳነ ኤንታ ቦላ ኡትስ፤ ኤንታስ ጉየ ባጋይ ግዶኮ ስም ኡትስ። 5 አባ ሳነይ እስ ታካꬎ መላ ኦርደ፤ እያ ዶናይ ዋንጫ ዶና መላ፤ ሱፈ ጪሽ ዳኔስ። ሄ አባ ሳነይ ኡሱፑን ታሙ ሙኩሉ ልትሮ ግድያ ሃꬃ ኦይከይሳ።

6 ሶሎሞነይ ሜጨትያ ታሙ ከረታ፤ ኦስስድ፥ እቻሻ ኡሻቻ ጋርሳ ባጋራ፥ እቻሻ ሀድርሳ ባጋራ ዎꬅስ። ኤንታን ፁሳ ያርሾ አሾይ ሜጨቴስ፤ ሽን አባ ሳነ ሃꬃን ካህነት ሜጨቶሶና።

7 ሄሳፈ ጉየ፥ ሶሎሞነይ ኤንታዉ እመትዳ ሀልቹዋዳ ፆምፐ ዎꬅያ ታሙ ኮጫታ ዎርቃፈ ኦꬅድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬꬃን ዎꬅስ። 8 ታሙ ፃርጴዛታ ኦꬅድ፥ እቻሻ ኡሻቻ ባጋራ፥ እቻሻ ሀድርሳ ባጋራ ፆሳ ኬꬃ ግዶን ዎꬅስ። ቃስ ፄቱ ድስተታ ዎርቃፈ ኦꬅስ። 9 ሶሎሞነይ ካህነታስ ግዶ ዳባባ፥ ካረ ባጋ ግታ ዳባባ ጊግስስ፤ ዳባባስ ፐንገታ ጊግስድ፥ ፐንገታ ናሰ ብራታን ላንፅስ። 10 አባ ሳንያ ፆሳ ኬꬃፈ ጋርሳን ዶሎሀ ባጋን ዎꬅስ።

11 ክራም ከረታ፥ አካፋታነ ፃሮታ መꬍስ፤ ክራም ካዋ ሶሎሞነስ ፆሳ ኬꬃን ኦሶ ኦꬅድ ፖልስ። 12 እ ኦꬅዳ ኦሶትካ ናምኡ ቱሳታ፥ ቱሳታ ሁጰን ዎꬅያ ሳነ መላ ናምኡ ጉምቦታ፥ ቱሳታ ቦላ ደእያ ናምኡ ጉምቦታ አሌቅስያ ናምኡ ግተ ዳንያ ሳንꬃላታ፥ 13 እስ እስ ቱቅያ ቦላ ናምኡ ማራን ናሰ ብራታፐ ኦሰትዳ እስ እስ ፄቱ ኦሮማነ ቴራ ምስለታ፥ ኩመꬅ ኦይዱ ፄቱ ኦሮማነ ቴራ ምስለታ፥ 14 ኦይደታነ ኦይደታ ቦላ ኡትያ ሜቻ ታሙ ከረታ፥ 15 አባ ሳነይነ እያፐ ጋርሳን ደእያ ታማነ ናምኡ ቦራ ምስለታ፥ 16 ከረታ፥ አካፋታ፥ ቃጰታነ ሀራ ሚሸታ ኡባ።

ክራም-አብ ካዋ ሶሎሞነስ ፆሳ ኬꬃ ኦሱዋስ መꬍዳ ሀ ሚሸታ ኡባ ጌሻ ናሰ ብራታፐ መꬍስ። 17 ካዎይ ሶሎሞነይ ሱኮታፐነ ፃሬዳፐ ግዶን፥ ዮርዳኖሰ ደንባን ደእያ ናሰ ብራታ ሼሽያ በሳን ሀ ኡባ ኦስስስ። 18 ናሰፐ መትዳ ሀ ሚሸ ኡባይ ዳሮ ግድዳ ግሾ፥ አይ መላ ዴፅያኮ ልከይ ኤረትቤና።

19 ሶሎሞነይ ፆሳ ኬꬃን ደእያ ሚሸታ ኡባ ዎርቃፈ ኦስስስ። ሄስካ ዎርቃፈ ኦሰትዳ ያርሾ በሳ፥ ጎዳ ስንꬃን ዎꬅያ ኡይꬃይ ኡትያ ፃርጴዛ፥ 20 ዎጋ መላ ኡባፈ ጌሻ በሳ ስንꬃን ፖአና መላ ፆምፐ ዎꬅያ ዎርቃ ኮጫ፥ ዎርቃ ፆምፐታ፥ 21 ዋላህ ባይና ዎርቃፈ ኦሰትዳ ጪሻ ምስለታ፥ ፆምፐታነ ቃጰታ፥ 22 ፆምፐ ቶይስያባታ፥ ፃሮታ፥ እፃነ ጩይስያባታነ ታማ ኤክያ ቃጰታ። ሀ ሚሸት ኡባይ ጌሻ ዎርቃፈ ኦሰትዶሶና። ፆሳ ኬꬃስ ካረ ባጋ ፐንገታነ ኡባፈ ጌሻ በሳ ገልያ ፐንገታ ዎርቃን ትይስ።