1 እስራኤለ አሳ ኡባይ ኦሮብኣማ ካዎያናዉ ሴከማ ብዳ ግሾ እካ ያ ብስ። 2 ናባፃ ናአይ እዮርባም ካዋ ሶሎሞነፐ ባቃትድ ግብፀን ደኤይስ፥ ሄሳ ስእዳ ዎደ ግብፀፈ ይስ። 3 እስራኤለ አሳ ኡባይ እዮርባማስ ኪትድ ፄግስን፥ እነ ሺቅዳ እስራኤለ አሳ ኡባይ ሮብኣማኮ ብድ፥ 4 “ነ አዋይ ኑና ዴፆ ቃምባራ ቶስስ፤ ሽን ሀእ እ ኑና ኦስስያ ዎልቃማ ኦሱዋነ ዴፆ ቃምባራ ኑስ ካዉሽሳ፤ ያትኮ፥ ኑ ነዉ ሃረታና” ያግዶሶና።

5 ሮብኣም፥ “ሄꬓንꬆ ጋላስ ስሚድ፥ ታኮ ዪተ” ያግስ። አሳይ ስሚድ ብዶሶና።

6 ሄሳፈ ጉየ፥ ካዎይ ሮብኣም እያ አዋይ ሶሎሞነይ ፓፃ ደእያ ዎደ ሶሎሞነ ዞርዳ ጭማታ፥ “ሀ አሳስ ዎይጋዳ ዛራ ጌቲ?” ያግድ ኤንታና ዞረ ኦይችስ።

7 ጭማት ሮብኣማኮ፥ “ነ ሀ አሳስ ኬህኮ፥ ኤንታ ኡፋይስኮነ ኤንታዉ ሎኦ ቃላ ዛርኮ ኤንቲ ኡባ ዎደ ነዉ ሃረታና” ያግዶሶና።

8 ሽን ሮብኣም ጭማት ዞርዳ ዞርያ አግድ እያራ ድጭድ፥ እያራ ኦꬅያ ያላጋታ ዞረ ኦይችስ። 9 እ ኤንታኮ፥ “ህንተ ታና ዞርያባይ አይቤ? ‘ነ አዋይ ኑና ቶስዳ ዴፆ ቃምባራ ኑስ ካዉሽሳ’ ግያ ሀ አሳስ ዎይጋዳ ዛሮ?” ያግድ ኦይችስ።

10 እያ ላገት ዛሪድ፥ “ ‘ነ አዋይ ኑና ዴፆ ቃምባራ ቶስስ፤ ሽን ነ ኑስ ካዉሻርክ’ ግያ አሳስ፥ ‘ታ ግልአ ብራይ ታ አዋ ፄሳፈ ኦርደ። 11 ታ አዋይ ህንተና ዴፆ ቃምባራ ቶስስ፤ ሽን ታ እያፐ አꬃዳ ዴፀꬃና። ታ አዋይ ህንተና ልሶን ዋꬍስ፤ ሽን ታ ህንተና ኮርነዳ ዱክያ ልሶን ዋꬋና’ ያጋዳ ዛራ” ያግዶሶና።

12 ካዎይ፥ “ሄꬑ ጋላሳፐ ጉየ ስሚድ ታኮ ዪተ” ግዳይሳዳ እዮርባምነ አሳይ ስሚድ ይዶሶና። 13 ካዎይ ሮብኣም ጭማት ዞርዳ ዞርያ አግድ ኤንታዉ ኢታ ዛሮ ዛርስ። 14 እያ ላገት ዞርዳ ዞርያ ካልድ፥ “ታ አዋይ ህንተና ቃምባራ ቶስስ፤ ሽን ታኒ እያፐ አꬃዳ ዴፀꬃና። ታ አዋይ ህንተና ልሶን ዋꬍስ፤ ሽን ታኒ ህንተና ኮርነዳ ዱክያ ልሶን ዋꬋና” ያግድ ዛርስ። 15 ጎዳይ ሴሎ አድያ ናብያ አክያ ባጋራ ናባፃ ናኣ እዮርባማስ ኦድዳ ቃላይ ፖለታና መላ ፆሳፈ ሀንዳ ግሾ ካዎይ አሳይ ገይሳ ስኦና እፅስ።

16 እስራኤለ አሳ ኡባይ ካዎይ ኤንቲ ገይሳ ስኦና እፅዳይሳ በእድ ካዋኮ፥ “ዳዊታፐ ኑና ጋክያባይ አይቤ? እሰየ ናኣፐ ኑኒ ላታናባይ ባዋ! እስራኤለ አሳዉ፥ ህንተ ሶ ሶ ቢተ! ዳዊታ፥ ኔኒ ነ ኬꬃ ናጋ!” ያግዶሶና። ሄሳ ግሾ፥ እስራኤለ አሳይ ባንታ ሶ ሶ ብዶሶና። 17 ሽን ሮብኣም ይሁዳ ቢታን ደእያ እስራኤለ አሳ ቦላ ካዎትስ።

18 ካዎይ ሮብኣም ባ ኦሳንቾታ ሀላቃ አዶራማ እስራኤለ አሳኮ ኪትስ፤ ኤንቲ እያ ሹቻን ጫድድ ዎꬍዶሶና። ሄ ዎደ ካዎይ ሮብኣም ባ ፓራ ጋረን ኡትድ የሩሳላመ ባቃትስ። 19 ሄ ዎደፐ ዶምድ ሀች ጋካናዉ ታሙ እስራኤለ ዛረት ዳዊታ ኮቻፈ ካዎትዳ ካዎታ ቦላ ማካልዶሶና።