1 ሮብኣም የሩሳላመ ካታማ ጋክዳ ዎደ እስራኤለ ቢታ አሳራ ኦለትድ ካዎተꬃ ባዉ ዛራና መላ ይሁዳፐነ ብንያመ ኮቻፈ ዶረትዳ 180,000 ኦላንቾታ ሺሽስ። 2 ሽን ጎዳ ቃላይ ፆሳ አስ ግድዳ ሻማያኮ ይስ። 3 “ሶሎሞነ ናኣ፥ ይሁዳ ካዋ ሮብኣማ፥ ይሁዳንነ ብንያመን ደእያ እስራኤለ አሳ ኡባ ሀይሳዳ ያጋ፤ 4 ‘ህንተ እሻ ግድዳ እስራኤለታራ ኦለታናዉ ቦፕተ። ሄሳ ታኒ ኦꬅዳ ግሾ ህንተ ኡባይ ህንተ ሶ ሶ ስምተ’ ያጌስ” ያጋ። ኤንቲ ጎዳ ቃላ ስእድ እዮርባማ ኦላናዉ በይሳ አግድ ስምዶሶና።

5 ሮብኣም የሩሳላመን ኡትድ ሀይሳፈ ካልድ ፃፈትዳ ይሁዳነ ብንያመ ካታማታን ሚፃታ ኬፅስ። 6 ሄ ካታማት ቤተለመ፥ ኤፃማ፥ ተቁሄ፥ 7 ቤት-ፁራ፥ ሶኮ፥ አዱላማ፥ 8 ጌተ፥ ማሬሳ፥ ዚፋ፥ 9 አዶራይማ፥ ላክሶ፥ አዜቃ፥ 10 ፆርአ፥ ኤሎናነ ከብሮና። 11 ሮብኣም ካታማታ ምንꬅድ ኤንታዉ ሀላቃታ ሹምስ፤ ካꬅ፥ ዛይተነ ዎይነ ኡሻ ያን ዎꬅስ። 12 ሄ ኬፀትዳ ካታማታ ኡባን ጎንዳለነ ቶራ ዎꬅስ፤ ያትድ ኤንታ ዳሮ ምንꬅስ። ሄሳዳ ኦꬅድ ይሁዳነ ብንያመ ሃርስ።

13 እስራኤለ ኡባን ደእያ ካህነትነ ሌወት ኡባይ ባንታ ደእያ በሳፈ ሮብኣማኮ ይዶሶና። 14 ሌወት ባንታ ሄንꬃ ቢታነ ባንታ ሻሉዋ አግድ ይሁዳነ የሩሳላመ ይዶሶና። ኤንቲ ካህነ ግድድ ጎዳስ ኦꬆና መላ እዮርባምነ እያ ናይት ድግዶሶና። 15 እዮርባም ꬎቃ ጎይኖ በሳንነ እ ኤስዳ ዴሸነ ማራ ምስለታስ ኦꬅያ ሀራ ካህነታ ሹምስ። 16 እስራኤለ ፆሳ ባንታ ዎዛናፐ ጎይናናዉ ኮይዳይሳት ጎዳስ ባንታ አዋታ ፆሳስ ያርሾ ያርሻናዉ ኩመꬃ እስራኤለፐ ሌወታ ካልድ የሩሳላመ ይዶሶና። 17 ኤንታ ዩሳይ ይሁዳ ካዎተꬃ ምንꬅስ፤ ኤንቲ ሄꬑ ላይꬅ ኩመꬅ ሶሎሞነ ናኣ ሮብኣማ ማድዶሶና። ኤንቲ ካዋ ዳዊታ ኦግያነ ካዋ ሶሎሞነ ኦግያ ካልድ፥ ሄꬑ ላይꬅ ሳሮ ደእዶሶና።

18 ሮብኣም ማህላቶ ጌተትያ ማቾ ኤክስ። ማህላት አዋይ ዳዊታ ናኣ ያርሞታ፤ እ አይያ እሰየ ናኣ ኤልያባ ናእዉ አብካሎ። 19 ማህላታ ኦሮብኣመስ የኡሳ፥ ሳማረነ ዛሃማ ጌተትያ አደ ናይታ የላሱ። 20 ሄሳፈ ጉየ፥ አበሰሎመ ናእዉ ማእኮ ኤክስ፤ ማእካ አብያ፥ አታያ፥ ዚዛነ ሳሎምታ ጌተትያ አደ ናይታ የላሱ። 21 ሮብኣም ባ ማቸታፐ ባ ላገꬆታፐ አꬅድ አበሰሎመ ናእዉ ማእኮ ዶስስ። እያዉ ታማነ ሆስፑን ማቸትነ ኡሱፑን ታሙ ላገꬆት ደኦሶና። እ ላታማነ ሆስፑን አደ ናይታነ ኡሱፑን ታሙ ማጫ ናይታ የልስ። 22 ሮብኣም ማእክ ናኣ አብያ ባ በሳን ካዎያናዉ ቆፕዳ ግሾ እያ እሻታ ቦላ እያ ሀላቃ ኦꬅድ ሹምስ። 23 ሮብኣም ጭንጭድ ባ አደ ናይታ ይሁዳን፥ ብንያመ ቢታንነ ግምበትዳ ካታማታን ሻክ ሻክ ሹምስ፤ ኤንታዉ ዳሮ ካꬅነ ዳሮ ማቾ ደምስ።