32
ሳናክሬም የሩሳላመ ቦላ ደንድስ
(2 ካዎ 18:13-17፤ 19:14-19፥ 35-37፤ እሳ 36:1-22፤ 37:8-38)
1 ካዎይ ህዝቅያስ አማነተꬃን ጎዳስ ኦꬅዳፐ ጉየ አሶረ ካዎይ ሳናክሬም ይሁዳ ቢታ ቦላ ደንድስ፤ ፆንድ ባዉ ኤካናዉ ቆፕድ ግምበትዳ ካታማታ ተቅስ።
2 ሳናክሬም የሩሳላመ ኦላናዉ ይዳይሳ ህዝቅያስ በእዳ ዎደ፥ 3 ካታማፐ ካረራ ጎግያ ፑልቶ ሃꬃታ ተቃናዉ ባ ሹማታነ ቶራ ሞጮናታ ዞረ ኦይችስ፤ ኤንቲ እያ ማድዶሶና። 4 ዳሮ አሳይ ሺቅድ፥ “አሶረ ካዎት ይድ አይስ ሃ ደማኔ?” ያግድ ፑልቶታነ ጎግያ ሃꬃታ ተቅዶሶና።
5 ሄሳፈ ጉየ፥ ህዝቅያስ ምን ኦꬅድ፥ ላለትዳ ድርሳ ግምበ ኡባ ዛሪድ ግምብስ፤ እያ ቦላ አዱሳ ሻኮ ሻክስ። ሄ ድርሳ ግምብያፈ ካረ ባጋራ ሀራ ድርሳ ግምበ ግምብስ። ዳዊታ ካታማን ደእያ ሚሎ ጌተትያ በሳ ምንꬅስ፤ ዳሮ ኦላ ሚሸነ ጎንዳለ ጊግስስ።
6 ኦላ ሀላቃታ አሳ ቦላ ሹምስ፤ ኤንታ ኡባ ካታማ ፐንግያ ማታን ደእያ ዳባባን ሺሽድ፥ 7 “ምንተ፤ ገንጭተ፤ ኑራ ደኤይስ ኤንታራ ደኤይሳፈ አꬍያ ግሾ አሶረ ካዋነ እያ ኦላንቾታ በእድ ያዮፍተ፥ ዳጋሞፕተ። 8 እያራ አሳ ዎልቅ ደኤስ፤ ሽን ኑራ ጎዳይ ኑ ፆሳይ ኑና ማዳናዉነ ኑስ ኦለታናዉ ደኤስ” ያግድ ኤንታ ምንꬅስ። ይሁዳ ካዎይ ህዝቅያስ ኦዳን አሳይ ምነትስ።
9 ሄሳፈ ጉየ፥ አሶረ ካዎይ ሳናክሬም ባ ኦላንቾታራ ላክሶ ካታማ ተቅድ ደእሽን፥ ይሁዳ ካዋ ህዝቅያሳኮነ የሩሳላመን ደእያ ይሁዳ አሳ ኡባኮ ባ ሹማታ ኪትስ። 10 አሶረ ካዎይ ሳናክሬም፥ “ተቀትዳ የሩሳላመ ካታማን ህንተ ኦናን አማነትድ ኡትደቲ? 11 ህዝቅያስ፥ ‘ጎዳይ፥ ኑ ፆሳይ ኑና፥ አሶረ ካዋ ኩሸፐ አሻና’ ያግድ ጭምድ ህንተና ኮሻንነ ሳሞን ዎꬋናዉ ሀኔስ። 12 ꬎቃ ጎይኖ በሳታነ ያርሾ በሳታ ድግድ፥ ይሁዳነ የሩሳላመ አሳ፥ ‘እስ ያርሾ በሳ ስንꬃን ጎይንተ፤ ያርሹዋ እያ ቦላ ፁግተ’ ያገይ ህዝቅያሳ ግደኔ?
13 “ታነ ታ አዋት ሀራ ካዎተꬃታ ቦላ ኦꬅዳባ ህንተ ኤረከቲ? ኤንታ ፆሳት ባንታ ቢታ ታ ኩሸፐ አሻናዉ ዳንዳእዶና? 14 ታ አዋት ꬋይስዳ ሀ ካዎተꬃታ ፆሳታ ኡባ ግዶን ባ አሳ ታ ኩሸፐ አሻናዉ ዳንዳእዳይ ኦኔ? ያትን፥ ህንተ ፆሳይ ህንተና ታ ኩሸፐ ዋት አሻናዉ ዳንዳኢ? 15 ህዛ ህዝቅያስ ህንተና ባለꬆፎ ዎይኮ ሄሳዳ ጭሞፎ። ህንተ ህዝቅያሳ አማኖፕተ። እያ አሳ ታ ኩሸፐ ዎይኮ ታ አዋታ ኩሸፐ አሻናዉ ዳንዳእዳ ሀራ ቢታ ፆሳት ዎይኮ ካዎተꬃታ ፆሳት ባዋ። ያትን፥ ሄስ ህንተ ፆሳይ ህንተና ታ ኩሸፐ አሻናዉ ዋንድ ዳንዳኢ?” ያግዶሶና።
16 ሳናክሬማ ሹማት ጎዳ ፆሳ ቦላነ እያ አይልያ ህዝቅያሳ ቦላ ሀራ ዳሮባ ሃሳይዶሶና። 17 ሳናክሬም ጎዳ እስራኤለ ፆሳ ጫይድ፥ “ሳአ ቦላ ደእያ ካዎተꬃታ ፆሳት ባንታ አሳ ታ ኩሸፐ አሾናይሳዳ ህዝቅያሳ ፆሳይካ ባ አሳ ታ ኩሸፐ አሻናዉ ዳንዳኤና” ያግድ ዳብዳበ ፃፍስ። 18 ሳናክሬማ ሹማት ካታማ ኦይካናዉ ኮይድ፥ ድርሳ ግምበ ቦላ ኡትዳ የሩሳላመ አሳ ያሽሳናዉነ ዳጋንꬃናዉ ባንታ ቃላ ꬎቁ ኦꬅድ፥ እብራወꬆ ዶናን ኤንታ ቦላ ዋስዶሶና። 19 አሳ ኩሸን ኦሰትዳ፥ ሀ ሳአን ደእያ ሀራ ካዎተꬃታ ፆሳታ ቦላ ኦደትዳይሳዳ የሩሳላመ ፆሳ ቦላካ ኦደትዶሶና።
20 ካዎይ ህዝቅያስነ አሞፀ ናአይ፥ ናበይ እሳያስ ሄሳ ግሾ ዎሳን ሳሎ ፆሳኮ ፑደ ዋስዶሶና። 21 ፆሳይ ባ ኪታንቹዋ ኪትድ አሶረ ኦላንቾታነ ቶራ ሞጮናታ ꬋይስስ። ሄሳ ግሾ፥ አሶረ ካዎይ ካዉይድ፥ ባ ቢታ ስምስ፤ እ ባ ፆሳ ኬꬃ ገልዳ ዎደ እያ ናይት እያ ሄ በሳን ማሻን ዎꬍዶሶና።
22 ሄሳዳ ኦꬅድ፥ ጎዳይ ህዝቅያሳነ የሩሳላመ አሳ አሶረ ካዋ ሳናክሬማ ኩሸፐነ ሀራ ሞርከታ ኩሸፐ አሽስ፤ ኤንታ ሾሮ ቢታታ ኡባፈ ኤንታ ሸምፕስስ። 23 ዳሮ አሳይ ጎዳስ እሞታ፥ ይሁዳ ካዋ ህዝቅያሳስ አልኦ ሚሸ ኤህዶሶና። ሄ ዎደፐ ዶምድ ካዎተꬃ ኡባይ ህዝቅያሳ ዳሮ ቦንችዶሶና።
ህዝቅያሳ ኦቶሩዋነ እያ ሀይቁዋ
(2 ካዎ 20:1-3፥ 12-19፤ እሳ 38:1-3፤ 39:1-8)
24 ሄ ዎደ ህዝቅያስ ሀርግድ፥ ሀይቃናዉ ማትድ ጎዳ ዎስስ። ጎዳይ ዎሰትድ እያ ፓꬃናዉ ማላ እሚስ። 25 ሽን ህዝቅያስ ኦቶርትዳ ግሾ ጎዳይ እያዉ ኬህዳ ኬሀስ በሲያ ዛሮ እምቤና። ሄሳ ጋሶን፥ እያ ቦላ፥ ይሁዳ ቦላነ የሩሳላመ ቦላ ጎዳ ሀንቆይ ይስ። 26 ግዶሽን፥ ዉርሰꬃን ህዝቅያስ ባ ኦቶሩዋ አግድ የሩሳላመ አሳታራ ባናተꬃ ካዉሽስ። ህዝቅያስ ካዎ ግድድ ደእያ ዎደ ጎዳ ሀንቆይ ኤንታ ቦላ ይቤና።
27 ህዝቅያሳስ ዳሮ ዱረተꬅነ ቦንቾይ ደኤስ። ህዝቅያስ ባ ብራ፥ ዎርቃ፥ አልኦ ሹቻ፥ ሳዎ፥ ጎንዳለነ ሀራ አልኦ ሚሸ ኡባ ምንጅያ ኬꬅ ኬፅስ። 28 ካꬃ፥ ዎይነ ኡሻነ ዛይተ ዎꬅያ ኬ ኬፅስ። መሄ ዳራነ ዶርስነ ዴሽ ኤቅያ ግርበ ኦꬅስ። 29 ፆሳይ እያዉ ዳሮ አቆ እምዳ ግሾ ባዉ ካታማታ ኬፅስ፤ ዳሮ ዶርሰነ መሄ ሺሽስ። 30 ቆሞ ባጋን ደእያ ግዮነ ፑልቶ ሃꬃ ዜርድ፥ ሃꬃይ ዉሎሀ ባጋን ደእያ ዳዊታ ካታማኮ ዱገ ጎጋና መላ ኦꬅዳይ ህዝቅያሳ። ህዝቅያስ ኦꬅዳባ ኡባን እንጀትዳ አስ። 31 ሽን ይሁዳ ቢታን ሀንዳ ማላልስያ ኦሶታባ ኦይቻናዉ ባብሎነፐ ኪተትዳ አሳት ህዝቅያሳኮ ይዳ ዎደ ጎዳይ እያ ፓጫናዉነ እያ ዎዛናን ደእያባ ኤራናዉ እያ የድ በስስ።
32 ህዝቅያስ ኦꬅዳ ሀራባይነ እያ ኬሀተꬃይ አሞፀ ናኣ፥ ናብያ እሳያሳ ቆንጨꬃ ማፃፋንነ ይሁዳነ እስራኤለ ካዎታ ታርከ ማፃፋን ፃፈትስ። 33 ህዝቅያስ ሀይቅድ፥ ባ ማይዛታን ጋሄትን ቆሞ ባጋራ ደእያ ዳዊታ ኮቻታ ዱፎን እያ ሞግዶሶና። እ ሀይቅን፥ ይሁዳ አሳይነ የሩሳላመ አሳይ እያ ቦንችዶሶና። እያ በሳን እያ ናአይ ምናሰይ ካዎትስ።