1 ምናሰይ ካዎትያ ዎደ እያዉ ላይꬅ ታማነ ናምአ፤ እ የሩሳላመን እሻታማነ እቻሹ ላይꬅ ካዎትስ። 2 ጎዳይ እስራኤለ አሳ ስንꬃፈ ጎድድ ከስዳ አሳ፥ እፀትዳ ኦግያ ካልድ ጎዳ ስንꬃን ኢታባ ኦꬅስ። 3 ምናሰይ ባ አዋይ ህዝቅያስ ላልዳ፥ ꬎቃ ጎይኖ በሳታ ዛሪድ ኬፅስ። ባኣለ ያርሾ በሳታነ አሼራ ጌተትያ ኤቃ ምስለታ መꬍስ፤ ሳሎ ፆልንቶታ ጎይንስ፤ ኤንታዉ ጉፋንስ። 4 ጎዳይ፥ “ታ ሱንꬃይ መርናዉ የሩሳላመን ዳና” ያግድ ዎꬅዳ ፆሳ ኬꬃን ምናሰይ ሀራ ፆሳታስ ያርሾ በሲ ጊግስስ። 5 ፆሳ ኬꬃን ደእያ ናምኡ ዳባባታን ሳሎ ፆልንቶት ጎይነትያ ያርሾ በሲ ጊግስስ። 6 ህኖማ ዛንጋራን ባ አደ ናይታ ታማን ፁግድ ያርሽስ። እ ብታነ ሙሩኖ ኦꬅስ፤ ማሮꬅስ፤ ሞይትለነ ቱና አያና ዞረ ኦይችስ። ጎዳ ስንꬃን ዳሮ ኢታባ ኦꬅድ ፆሳ ይሎይስ።

7 ባ ኦꬅዳ ኤቃ ምስልያ ኤፍድ ፆሳ ኬꬃን ኤስስ። ሄ ፆሳ ኬꬃይ፥ ፆሳይ ዳዊታስነ እያ ናኣ ሶሎሞነስ፥ “እስራኤለ ዛረ ኡባ ግዶፈ ታኒ ዶርዳ ፆሳ ኬꬃንነ የሩሳላመን ታ ሱንꬃ መርናዉ ፄግሳና። 8 ሙሰ ባጋራ ታ እስራኤለ አሳ ኪትዳ ኪታ፥ ህግያነ ዎጋ ኡባ ኤንቲ ናግኮ፥ ታኒ ኤንታ ማይዛታስ እምዳ ቢታፈ ኤንታ ሾድከ” ያግስ። 9 ሽን ምናሰይ ይሁዳ አሳነ የሩሳላመ አሳ ባለꬅድ፥ ጎዳይ እስራኤለ አሳ ስንꬃፈ ꬋይስዳ ሀራ ካዎተꬃታፐ አꬍያ ኢታ ኦꬃና መላ ኦꬅስ።

10 ጎዳይ ምናሰስነ እያ አሳስ ኦድስ፤ ሽን ኤንቲ እያ ስኦና እፅዶሶና። 11 ሄሳ ግሾ፥ ጎዳይ አሶረ ኦላንቾታ ኤንታ ቦላ ደንꬅስ። ኤንቲ ምናሰ ስን ዳፎ አꬅድ ኦይክዶሶና፤ ናሰ ብራታ ሳንꬃላታን ቃችድ፥ ባብሎነ ኤፍዶሶና። 12 ምናሰይ ኡንኤትዳ ዎደ ጎዳ ባ ፆሳ ማዶ ዎስስ፤ ባ አዋታ ፆሳ ስንꬃን ባናተꬃ ዳሮ ካዉሽስ። 13 ፆሳይ ምናሰ ዎሳ ስእስ፤ የሩሳላመ ስሚድ ዛሪድ ካዎታና መላ ኦꬅስ። ጎዳይ ቱማ ፆሲ ግደይሳ ምናሰይ ሄሳን ኤርስ።

14 ሄሳፈ ጉየ፥ ምናሰይ ግዮነ ፑልቱዋ ማታን ደእያ በሳፈ ዶምድ ኦፌላ ደርያራ ካንꬅድ ሞሎ ፐንገ ጋካናዉ ካረ ባጋራ ሀራ ድርሳ ግምበ ግምብስ። ሄ ግምበይ ዳዊታ ካታማፐ ዶሎሀ ባጋራ ደእያ ዛንጋራን ደኤስ። ይሁዳ ካታማታ ኡባን ቶራ ሞጮናታ ዎꬅስ።

15 አላጋ ፆሳታነ ኤቃ ምስለታ ፆሳ ኬꬃፈ ድግስ፤ ፆሳ ኬꬃይ ደእያ ዙማ ቦላነ የሩሳላመን ደእያ ያርሾ በሳታ ላልድ ሄ ካታማፐ ካረ ከስድ የግስ። 16 ምናሰይ ጎዳ ያርሾ በሲ ኦራꬅድ እስፈተꬃ ያርሾነ ጋላታ ያርሾ ያን ያርሽስ። ይሁዳ አሳይ ጎዳ እስራኤለ ፆሳ ጎይናና መላ ኪትስ። 17 አሳይ ꬎቃ ጎይኖ በሳታን ያርሾ ያርሸይሳ አጎና እፅኮካ፥ ኤንቲ ያርሸይ ጎዳ ባንታ ፆሳ ፃላላሳ።

18 ምናሰ ኦꬅዳ ሀራባይ፥ ባ ፆሳ ዎስዳ ዎሳይነ ጎዳ እስራኤለ ፆሳ ሱንꬃን ናበት እያዉ ኦድዳ ቃላይ እስራኤለ ካዎታ ታርከ ማፃፋን ፃፈትስ። 19 ሄኮ፥ ምናሰ ዎሳይነ ፆሳይ እያዉ ዛርዳ ዛሮይ፥ እ ኦꬅዳ ናጋራይነ ምናሰይ ባና ካዉሻናፐ ስን ኦꬅዳ ꬎቃ ጎይኖ በሳታባይ፥ አሼር ኤቃ ምስለታባይነ ኤቃታባ ኡባይ ናበታ ታርከ ማፃፋን ፃፈትስ። 20 ምናሰይ ሀይቅድ ባ ማይዛታ ጋክስ፤ እያ ካዎ ጋꬎን ሞግዶሶና። እያ በሳን እያ ናአይ አሞፀይ ካዎትስ።

21 አሞፀይ ካዎትያ ዎደ እያዉ ላይꬅ ላታማነ ናምአ፤ እ የሩሳላመን ናምኡ ላይꬅ ካዎትስ። 22 እያ አዋይ ምናሰይ ኦꬅዳይሳዳ እካ ጎዳ ስንꬃን ኢታባ ኦꬅስ። እያ አዋይ ምናሰይ ጎይንዳ ኤቃታ ጎይንስ፤ ኤንታዉ ያርሽስ። 23 ሽን እያ አዋይ ምናሰይ ባናተꬃ ካዉሽዳይሳዳ እ ባናተꬃ ጎዳ ስንꬃን ካዉሽቤና፤ አሞፀይ ጉጅ ጉጅ ናጋራ ኦꬅስ።

24 አሞፀ ሹማት እያ ቦላ ማቀትድ፥ ካዎ ጋꬎን እያ ዎꬍዶሶና። 25 ይሁዳ አሳይ ካዋ አሞፀ ቦላ ማቀትዳ ኡባ ዎꬍድ፥ አሞፀ በሳን እያ ናኣ እዮስያሳ ካዎꬅዶሶና።