1 እዮስያስ ካዎትያ ዎደ እያዉ ላይꬅ ሆስፑና፤ እ የሩሳላመን ሀስታማነ እስ ላይꬅ ካዎትስ። 2 እዮስያስ ጎዳ ስንꬃን ሱረባ ኦꬅስ፤ ኡሻች ሀድርስ ጎና ባ ማይዛ ዳዊታ ኦገን ሄመትስ።

3 እ ካዎትዳ ሆስፑንꬆ ላይꬃን ቡሮ ዮጋ ደእሸ ባ ማይዛ ዳዊታ ፆሳ ኮይስ። እ ካዎትዳ ታማነ ናምአንꬆ ላይꬃን ይሁዳንነ የሩሳላመን ደእያ ꬎቃ ጎይኖ በሳታ፥ አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦꬅዳ ምስለታ ꬋይስስ። 4 እያ ኪታን፥ ባኣለ ያርሾ በሳታ ላልዶሶና፤ ኤንታፈ ቦላራ ደእያ እፃነ ጩይስያ ሚሸታ ትንችዶሶና። አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦꬅዳ ምስለታ ጋጭድ ꬊለ ከስዶሶና፤ ሄ ꬊልያ ኤንታ ጎይንያ አሳታ ዱፎን ላልዶሶና። 5 እዮስያስ ኤንታ ካህነታ መቀꬃ ሄ ያርሾ በሳታ ቦላ ፁግስ፤ ያትድ፥ ይሁዳነ የሩሳላመ ጌሽስ።

6 ምናሰ፥ ኤፍሬማነ ስሞና ቢታፈ ብድ ንፍታለመ ቢታ ጋካናዉ ደእያ ካታማታነ ላለትዳ በሳታ ኡባ ሄሳዳ ኦꬅድ ጌሽስ። 7 እዮስያስ ያርሾ በሳታ ላልስ፤ አሼራ ኤቃ ምስለታነ ሀራ ኤቃ ምስለታ ትንቸረꬅስ፤ እስራኤለን ደእያ እፃነ ጩይስያ በሳታ ቃንፀረꬅስ። ሄሳፈ ጉየ፥ እዮስያስ የሩሳላመ ስምስ።

8 እዮስያስ ካዎትዳ ታማነ ሆስፑንꬆ ላይꬃን ቢታነ ፆሳ ኬꬃ ጌሽዳፐ ጉየ፥ ፆሳ ኬꬃ ኦራꬃና መላ አፃላ ናኣ ሳፋና፥ የሩሳላመ ካታማ ሃርያ ማእሰያነ እዮአካዛ ናኣ ዋና ፃፍያ እዮአክና ኪትስ።

9 ኤንቲ ካህነ ሀላቃ ካልቅያሳኮ ብዶሶና። ፐንገ ናግያ ሌወት ምናሰፐ፥ ኤፍሬማፐ፥ አትዳ እስራኤለ አሳ ኡባፈ ይሁዳፐ፥ ብንያመፐነ የሩሳላመን ደእያ አሳፐ ካሰ ሺሽድ ፆሳ ኬꬅ ኤህዳ ሚሽያ ካልቀስ እምዶሶና። 10 ኤንቲ ፆሳ ኬꬃ ኦራꬅያ ሀላቃታስ እምን ኤንቲ ፆሳ ኬꬃ ኦራꬃናዳነ ዛሪድ ኬፃና መላ ኦሳንቾታስ እምዶሶና። 11 ይሁዳ ካዎት ላልዳ ፆሳ ኬꬃ ሎይꬃናዉ ምꬅነ ማሰትዳ ሹቹ ሻማና መላ አናፀታስነ ግምበይሳታስ ሚሸ እምዶሶና።

12 አሳይ አማነትድ ኦሱዋ ፖልዶሶና። ኤንታ ቦላ ሹመትዳ ኦይዱ ሌወት፥ ማራራ ያራፐ ያሃታነ አብድዩ፥ ቃሃታ ያራፐ ማሱላማነ ዛካርያሳ። የꬃ ሚሸ ካእ ኤርያ ሌወት ኡባይ፥ 13 ዎልቃ ኦሶ ኦꬅያ አሳታ ቦላነ ዱማ ዱማ ኦሶ ኦይሳታ ቦላ ሹመትዶሶና። ቃስ ሀራ ሌወት ፃፈ፥ ሀላቃነ ፐንገ ናገይሳታ ግድዶሶና።

14 ኤንቲ ፆሳ ኬꬃ ይዳ ሚሽያ ከስያ ዎደ ካህነይ ካልቀይ ጎዳይ ሙሰ ባጋራ እምዳ ህገ ማፃፋ ደምስ። 15 ካልቀይ ዋና ፃፍያ ሳፋናኮ፥ “ታኒ ፆሳ ኬꬃፈ ህገ ማፃፋ ደማስ” ያግስ። ሄ ማፃፋ ሳፋናስ እሚስ።

16 ሳፋን ማፃፋ ካዋኮ ኤፍድ፥ “ነ ሹማት ነ ኪታ ኡባ ኦꬅዶሶና። 17 ፆሳ ኬꬃን ደእያ ሚሽያ ኤክድ፥ ኦሱዋ ካልያ ሀላቃታስነ ኦꬅያ አሳስ እምዶሶና” ያግስ። 18 ዋና ፃፈይ ሳፋን ካዋኮ፥ “ካህነይ ካልቀይ ታዉ ማፃፋ እሚስ” ያግድ ማፃፋ ካዋ ስንꬃን ናባብስ።

19 ካዎይ ህገ ቃላ ስእዳ ዎደ አዛንድ ባ ማኡዋ ፔꬍስ። 20 ካዎይ፥ ካልቀ፥ ሳፋና ናኣ አክቃማ፥ ምክያሳ ናኣ አብዶና፥ ዋና ፃፍያ ሳፋናነ ካዎ ሹማ አሳያ ሀይሳዳ ያግድ ኪትስ፤ 21 “ብድ ታ ግሾነ እስራኤለንነ ይሁዳን አትዳ አሳታ ግሾ ሀ በንትዳ ማፃፋን ፃፈትዳባ ጎዳ ኦይችተ። ሀ ማፃፋን ፃፈትዳ ኡባ ኦꬃናዉ ኑ ማይዛት ጎዳ ቃላ ናግቦና ግሾ ጎዳይ ኑ ቦላ ባ ሀንቁዋ ጉስስ” ያግስ።

22 ካልቀይነ ካዎይ ኪትዳ አሳት ፆሳ ኬꬃን ማኦ ናግያ ሀስራ ናአ፥ ትቁዋ ናአ፥ ሰለማ ማቾ ግድዳ ሁልዳ ጌተትያ ናበኮ ብድ እዮ ኦይችዶሶና። እያ የሩሳላመን ናምአንꬆ ካታማን ደአዉሱ።

23 ሁልዳ ኤንታኮ፥ “ጎዳይ እስራኤለ ፆሳይ፥ ‘ህንተና ታኮ ኪትዳ ኡራስ ሀይሳዳ ያግድ ኦድተ’ ያጋሱ። 24 ጎዳይ ሀይሳዳ ያጌስ፤ ‘ይሁዳ ካዋ ስንꬃን ናባበትዳ ማፃፋን ፃፈትዳ ኢታ ባደꬃ ኡባ ሀ በሳን ደእያ አሳ ቦላ ኤሀና ሀናይስ። 25 ኤንቲ ታና አግድ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦꬅዳባን ታና ሀንቀꬅዶሶና። ሄሳ ግሾ፥ ታ ሀንቆይ ሀ በሳን ትገታና፤ ተቀተና።’ 26 ጎዳ ኦይቻናዉ ህንተና ኪትዳ ይሁዳ ካዋኮ፥ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ፤ 27 ሀ በሳንነ ሀ በሳን ደእያ አሳ ቦላ ፆሳይ ኦደትዳባ ኔኒ ስእዳ ዎደ ነ ዎዛናይ ቦሸትን፥ ታ ስንꬃን ነናተꬃ ካዉሽዳ ግሾነ ነ ማኡዋ ፔꬋዳ ታ ስንꬃን ዬክዳ ግሾ ታኒ ነ ዎሳ ስአስ። 28 ሄኮ፥ ታ ነና ነ ማይዛታ ጋꬃና፤ ነ ሳሮ ሞገታና። ታ ሀ በሳንነ ሀ በሳን ደእያ አሳ ቦላ ኤሀና ኢታባ ነ አይፈይ በኤና’ ያግተ” ያጋሱ።

ኤንቲ ብድ ሀ ቃላ ካዋስ ኦድዶሶና።

29 ሄሳፈ ጉየ፥ ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ። 30 ካዎይ ፆሳ ኬꬅ ከይስ፤ ይሁዳ አሳይ፥ የሩሳላመ አሳይ፥ ካህነትነ ሌወት፥ ጉꬃፈ ግታ ጋካናዉ ኡባይ እያራ እስፈ ከይዶሶና። ፆሳ ኬꬃን በንትዳ ጫቆ ማፃፋ ቃላ ኡባ ካዎይ ኤንታዉ ናባብስ። 31 ካዎይ ባ በሳን ኤቅድ፥ ጎዳ ኦገን ሄመታናዉነ እያ ህግያ፥ እያ ዎጋነ እያ ኪታ ባ ኩመꬃ ዎዛናንነ ባ ኩመꬃ ሸምፑዋን ናጋናዉ፥ ቃስ ሀ ማፃፋን ፃፈትዳ ጫቁዋ ኦꬃናዉ ጎዳ ስንꬃን ጫቅስ። 32 የሩሳላመንነ ብንያመን ደእያ አሳ ኡባይ ኤቅድ ጫቃና መላ ኦꬅስ፤ የሩሳላመን ደእያ አሳይ ፆሳ፥ ባንታ ማይዛታ ፆሳ ጫቆይ ገይሳዳ ኦꬅዶሶና።

33 እዮስያስ እስራኤለ ዛዋን ደእያ እፀትዳባ ኡባ ድግስ። እስራኤለን ደእያ ኡባይ ጎዳ፥ ባንታ ፆሳ ጎይናና መላ ኦꬅስ። እዮስያስ ደእዳ ላይꬃ ኡባን ኤንቲ ጎዳ፥ ባንታ ማይዛታ ፆሳ ካሎ አግቦኮና።