1 ሀእ ኑ ደእያ ዱንካነ ዳንያ ሀ ሳአ አሳተꬃይ ላለትኮካ፥ አስ ኬፅቦና፥ ፆሳይ ኬፅዳ መርና ኬꬃይ ኑስ ሳሎን ደኤይሳ ኤሮስ። 2 ሳሎ አሳተꬃ ማአናዉ አሞትሸ ሀእ ሀ ሳአን ደእሸ ኦሎስ። 3 ኑኒ ሄሳ ማእያ ዎደ ካሎቶኮ። 4 ዱንካነ ዳንያ ሀ ሳአ አሳተꬃን ኑ ደእሸ ዴፀትድ ኦሎስ። ሀይቅያ ኑ አሳተꬃይ ደኦን ላመታና መላ ሳሎ አሳተꬃ ማአናዉ ኮዮስፐ አትሽን፥ አሹዋፐ ሻከታናዉ ኮይድ ግደና። 5 ኑና ሀይሳስ ጊግስዳይ ፆሳ። ቃስ ስንꬃፈ ያናባስ ኦይꬅ ኦꬅድ ባ አያና ኑስ እሚስ።

6 ሄሳ ግሾ፥ ኑኒ ሀ ሳአ አሳተꬃን ደእያ ዎደ ኡባን ጎዳፐ ሃክድ ደኤይሳ ኤርኮካ ኡባ ዎደ አማነትድ ደኦስ። 7 ኑኒ ደኤይ አማኖናፐ አትሽን፥ በእያባን ግደና። 8 ኑ ሀ ሳአ አሳተꬃፈ ሻከትድ፥ ኑ ሶ ብድ ጎዳራ እስፈ ዳናዉ አሞትያ ግሾ፥ አማነትድ ደኦስ። 9 ሄሳ ግሾ፥ ኑ ሀ አሳተꬃን ደእን ዎይኮ ሀ አሳተꬃፈ ሻከትን፥ ኑ አሞይ እያ ኡፋይሳናይሳ። 10 ኑኒ እሶይ እሶይ ሀ ሳአን ደእሸ ሎኦ ግድን ዎይኮ ኢታ ግድን፥ ኦꬅዳ ኦሱዋስ በሲያ ፕርዳ ኤካናዉ ክርስቶሳ ፕርዳ አራታ ስንꬃን ሺቃና። ሮመ 14:10.

11 ህዛ፥ ጎዳስ ያሺ አይ ጉሰኮ ኑኒ ኤርያ ግሾ፥ አሳይ ኑ ኦደይሳ ኤካና መላ ዞሮስ። ፆሳይ፥ ኑኒ ኦነኮ ኑና ኤሬስ፤ ቃስ ህንተካ ህንተ ካሀን ኑ ኦነኮ ኤሬታ ያጋዳ ቆፓይስ። 12 ዎዛናን ግዶናሽን፥ ማላን ጬቀትያ አሳ ዶና ኦይꬃናዉ ህንተ ኑናን ጬቀታና መላ ህንተዉ ጋሶ ግዳናዉ ኮዮስፐ አትሽን፥ ኑ ኑና ዛሪድ ናሻናዉ ኮዮኮ። 13 ኑ ጎሽ ግድኮ ፆሳ ቦንቾሳ፤ ዎዛናማ ግድኮ ህንተሳ። 14 እሶይ ኡባስ ሀይቅዳይሳነ ኡባይ ቃስ እያራ ሀይቅዳይሳ ኑ ኤርያ ግሾ፥ ክርስቶሳ ሲቆይ ኑና ሃሬስ። 15 ደኦን ደኤይሳት ህዛፐ ጉየ ባንታዉ ግዶናሽን፥ ኤንታዉ ሀይቅዳይሳስነ ሀይቆፐ ደንድዳይሳስ ዳና መላ ክርስቶስ አሳ ኡባ ግሾ ሀይቅስ።

16 ህዛፐ ጉየ፥ ኑኒ ኦናካ አሳ ቆፋን ፕርዶኮ። ሀይሳፈ ካሰ ኑኒ ክርስቶሳካ አሳ ቆፋን በእዳባ ግድኮካ፥ ህዛፐ ሄሳዳ ቤኦኮ። 17 ሄሳ ግሾ፥ ኦንካ ክርስቶሳን ደእኮ ኦራꬃ መተꬅ፤ ጋልአ መተꬃይ አꬍስ፤ ኡባይካ ኦራꬅ ግድስ። 18 ሄሳ ኡባ ፆሳይ ኦꬅስ። እ ክርስቶሳ ባጋራ ኑና ባራ ስገꬅስ። ቃስ ሀራታ ባራ ስገꬃና መላ ኑስ ስገꬆ ኦሶ እሚስ። 19 ፆሳይ ክርስቶሳ ባጋራ አሳ ኡባ ባራ ስገꬄስ። ኤንታ ናጋራ ታይብቤና፤ ቃስ አሳ ባራ ስገꬅያ ቃላ ኑስ እሚስ።

20 ፆሳይ አሳ ኑ ባጋራ ፄግያ ግሾ፥ ኑ ክርስቶሳን ኪተትድ አሳ ፆሳራ ስገትተ ግድ ክርስቶሳ ግሾ፥ ዎሶስ። 21 ኑኒ ፆሳ ፅሎተꬃ ክርስቶሳ ባጋራ ኤካና መላ፥ ናጋራ ኤሮና ክርስቶሳ ኑ ግሾ፥ ናጋራንቾ አሳዳ ኦꬅስ።*ናጋራንቾ አሳዳ፦ ናጋራ ያርሾ ኦꬅስ።