9
አማንያ አሳስ ሺቅዳ ሚሸ
1 አማንያ አሳስ ከስያ ሚሽያባ ታ ህንተዉ ፃፋናዉ ኮሸና። 2 ህንተ ማዳናዉ ኬህ አሞተይሳ ታ ኤራይስ። ህንተ አካያ አሳይ፥ ዝላይꬃፈ ዶምድ ማዳናዉ ጊገትዳይሳ ታኒ ማቀዶነ አሳስ ዶና ኩንꬃዳ ኦዳስ። ህንተ ግታ አሞይካ ኤንታፈ ዳሮታ ደንꬅስ። 3 ሀ ኦሱዋን ህንተናን ኑ ጬቀትያ ጬቆይ ሀዳ ግዶና መላ ኮይሮ ህንተባ ታ ኦድዳይሳዳ ህንተ ጊገትድ ናጋና መላ ሀ እሻታ ህንተኮ ኪታስ። 4 ማቀዶነ አሳይ ታራ ብድ፥ ህንተ ጊገቶና ደእሽን፥ ደምኮ፥ ኑ ህንተናን ዬላታና፤ ቃስ ህንተ ኑፐ አꬎ ዬላታና። 5 ሄሳ ግሾ፥ ሀ እሻት ታፐ ስንꬃትድ ህንተኮ ብድ፥ ህንተ እማና ግዳ እሙዋ ካሰትድ ጊግሳና መላ ታ ኤንታና ኪታስ። ታኒ ጋክያ ዎደ ሄ እሞይ ጊግድ ኡቴስ። ሄ ዎደ ሄ ኬሀተꬃ እሞይ ዎልቃን ግዶናሽን፥ ዶሳን ግደይሳ ኤርሴስ።
6 ሀይሳ አኬክተ፤ ጉꬁ ዘርዳይ ጉꬁ ጫካና፤ ዳሮ ዘርዳይ ዳሮ ጫካና። 7 ፆሳይ ኡፋይሳን እምያ ኡራ ዶስያ ግሾ፥ ዎልቃን ዎይኮ ዶስ ባይና ግዶናሽን፥ እስ እስ አስ ባ ዎዛናን ቆፕዳይሳዳ ዶሳን እማናዉ በሴስ። 8 ኡባ ዎደ ኡባባን ኮሽያባ ኡባ ደምድ ሎኦ ኦሶ ኡባ ኦꬃናዉ ዳንዳአና መላ ፆሳይ ህንተዉ ባ አንጁዋ ዳርሳና። 9 ጌሻ ማፃፋን፥
“እ ባ ሻሉዋ ማንቆታስ ላልስ፤
እያ ፅሎተꬃይ መርናዉ ደአና”
ያጌስ።ማዝ 112:9.
10 ዘረይሳስ ዘረꬅ፥ ማናዉ ካꬅ እምያ ጎዳይ፥ ህንተ ዘርያ ዘረꬅ ዳርስድ እማና። ህንተ ፅሎተꬃ አይፍያካ ዳርሳና። እሳ 55:10.
11 ዳሮ አሳይ ህንተ እምያ እሙዋ ኑፐ ኤክድ፥ ፆሳ ጋላታናዳ፥ ህንተ ኡባ ዎደ ዳርስድ እመይሳታ ግዳና መላ ፆሳይ ህንተና ኡባ ባጋራ ዱረያና። 12 ሀ ህንተ እምያ እሞይ አማንያ አሳ ፓጫ ኩንꬆ ፃላላ ግዶናሽን፥ አሳይ ፆሳ ጋላታናዉ ጋሶ ግዴስ። 13 ሀ ህንተ ኦሶይ ህንተ አማኑዋ ኤርስድ ክርስቶሳ ዎንገላ ህንተ አማንድነ እያዉ ኪተትድ ህንተዉ ደእያባ ኤንታራነ ሀራታራ ሻከትዳ ግሾ ኡባይ ፆሳ ቦንቻና። 14 ፆሳይ ህንተዉ እምዳ አꬎ ኬሀተꬃ ግሾ ኤንቲ ህንተዉ ፆሳ ዎስሸ ህንተና በአናዉ ላሞቶሶና። 15 ዛው ባይና ፆሳ እሙዋስ ፆሳይ ጋላተቶ።