1 ኑ እሻቶ፥ ፆሳይ ማቀዶንያን ደእያ ዎሳ ኬꬃታስ እምዳ አꬎ ኬሀተꬃባ ህንተ ኤራና መላ ኑ ኮዮስ። ሮመ 15:26. 2 ኤንቲ ግታ መቶን ፓጨትዶሶና፥ ሽን ኤንታ ኡፋይሳይ ዎልቃማ። ኤንታ ማንቆተꬃስ ዛው ባዋ፥ ሽን ባንታ እሙዋን ዳሮ ኬህዶሶና። 3 ኤንቲ ባንታ ዎልቃ መላነ ባንታ ዎልቃፈ አይሳ ዶስድ እምዳይሳስ ታ ማርካ። 4 ኤንቲ ፆሳ አሰ ማድያ ሎኦ ኦሶ ኑራ ኦꬃናዉ ኮይድ ኑና ዳሮ ዎስዶሶና። 5 ኤንቲ ኑኒ ቆፕዳይሳፈ አꬅድ ኦꬅዶሶና። ፆሳ ሸንያዳ፥ ኮይሮትድ ባንታና ጎዳስ እምዶሶና፤ ካልድ፥ ባንታና ኑስ አꬅድ እምዶሶና።

6 ሀ ሎኦ ኦሱዋ ዶምዳ ትቶይ፥ ጉጅድ ኦꬃናዳነ ህንተና ማድድ፥ ሄ ኦሱዋ ፖልሳናዳ እያ ዎስዳ። 7 ሽን ህንተ ኡባባን፥ አማኖን፥ ኦዳን፥ ኤራተꬃን፥ ግታ አሞን፥ ኑና ዶሶንነ ኡባባን ዱረትዳይሳዳ ሀ ሎኦ ኦሱዋንካ ህንተ ኬሀ ግዳና መላ ኑ ኮዮስ።

8 ታኒ ሄሳ ኪታናዉ ጊከ። ሽን ሀራታ ግታ አሙዋ ህንተ ሲቁዋራ ጋꬃ በአዳ፥ ህንተ አይ ኬና ቱሜኮ ኤራናዉ ጋይስ። 9 ህንተ፥ ኑ ጎዳ የሱስ ክርስቶሳ አꬎ ኬሀተꬃ ኤሬታ። ክርስቶስ ዱረ ግድ ኡትድ፥ ህንተ እያ ማንቆተꬃን ዱረታናዳ ህንተ ግሾ ማንቅስ።

10 ታኒ ሀ ኦዳን ህንተና ማድያ ዞረ ዞራናዉ ኮያይስ። ህንተ ዝላይꬅ እማናዉ ፃላላ ግዶናሽን፥ ሄሳ ኦꬃናዉ አሞትሸካ ህንተ ኮይሮ። 11 ህንተ ኦꬃናዉ ዶምዳ ኦሱዋ ሀእ ፖልተ። ህንተ ህንተዉ ደኤይሳ ኬና እምኮ፥ ሄስ ህንተ እማናዉ ዳሮ አሞተይሳ ቆንጭሴስ። 12 እስ አስ እማናዉ አሞትኮ፥ እያ እሞይ ፆሳ ስንꬃን ኤከተይ፥ እ ባዉ ደእዳይሳ ኬና እምናፐ አትሽን፥ ባይናባፐ እማናዉ ኡንኤትን ግደና።

13 ታኒ ሄሳ ገይ፥ ህንተ ኡባይ እስ ግና ግዳና መላሳፈ አትሽን፥ ሀራት ዋያፐ ሸምፕን፥ ህንተ ዋየታና መላሳ ግደና። 14 ዎደ ኤንታ ፓላሀይ ህንተ ፓጫ ኩንꬃና መላ፥ ሀእ ህንተ ፓላሀይ ኤንታ ፓጫ ኩንꬆ። ሄሳን ህንተ ግና ግዳና። 15 ጌሻ ማፃፋን፥ “ዳሮ ሺሽዳይሳስ ፓላህቤና፤ ጉꬃ ሺሽዳይሳስ ፓጭቤና” ጌተትድ ፃፈትዳይሳ መላ። ከሳ 16:18.

16 ኑኒ ህንተዉ ቆፐይሳዳ ትቶይካ ህንተዉ ቆፓና መላ ኦꬅዳ ፆሳይ ጋላተቶ። 17 ትቶይ ህንተኮ ብዳይ፥ ኑኒ እያ ደንꬅዳ ግሾ ፃላላ ግዶናሽን፥ እ ባ ሸነን ባናዉ አሞትዳ ግሾሳ። 18 ዎንገላ ማርካተꬃን ዎሳ ኬꬃ ኡባን ዳሮ ኤረትዳ እሻ፥ ኑኒ ትቶራ እስፈ ኪቶስ። 19 ሄሳ ቦላ ኑኒ ሀ ኬሀ እሞታ ኤፍያ ዎደ ኑራ ባና መላ፥ ሀ ሎኦ ኦሱዋን ጎዳ ቦንቻናዉነ ሀራታ ማዳናዉ ደእያ አሙዋ በሳናዉ እ ዎሳ ኬꬃታን ዶረትስ።

20 ሀ እመትዳ ኬሀ እሙዋ፥ ኑኒ ኦሶ ቦላ ፔሽያ ዎደ ቦረቶና መላ ናገቶስ። 21 ኑኒ ጎዳ ስንꬃን ፃላላ ግዶናሽን፥ አሳ ስንꬃንካ ሎኦ ግድዳባ ኦꬆስ።ሌም 3:4.

22 ቃስ ዳሮ ዎደ ፓጨን ምንድ አꬍዳ ኑ እሻ፥ ኤንታራ ህንተኮ ኪትዳ። እ ህንተናን ዳሮ አማነትያ ግሾ፥ ሀእ ህንተና ማዳናዉ ዳሮ አሞቴስ። 23 ትቶባ ኤራናዉ ኮይኮ፥ ህንተና ማዳናዉ ታራ ኦꬅያ ታ ኦሶ ላገ። ሀንኮ እሻታባ ግድኮ ዎሳ ኬꬃት ኪትዳይሳታ፤ ቃስ አሳይ ኤንታ ዱሳ በእድ ክርስቶሳ ቦንቾሶና። 24 ሄሳ ግሾ፥ ዎሳ ኬꬃት ህንተ ሲቁዋነ ኑ ህንተና ናሽያ ናሾይ ቱማ ግደይሳ ቆንጭሳናዉ ህንተ ሲቁዋ ሀ አሳታ በስተ።