1 ህዛ፥ ታ ሲቆቶ፥ ሀ ኡፋይሳይ ኑስ ደእያ ግሾ፥ ኑ አሹዋነ ኑ ሸምፑዋ ቱንስያባ ኡባፈ ኑና ጌሾስ። ፆሳስ ያይድ ኑ ጌሻተꬃ ፖሎ ኦꬆስ።

2 ህንተ ኡሉዋ ኑና በስተ። ኑኒ ኦናካ ናቅቦኮ፤ ኦናካ ቆህቦኮ፤ ኦናካ ጭምቦኮ። 3 ታኒ ሄሳ ህንተ ቦላ ፕርዳናዉ ጊከ። ሀይሳፈ ካሰ ታ ህንተዉ ኦድዳይሳዳ፥ ህንተ ኑ ዎዛናን ደኤታ፤ ኑ ፓፃ ደእንካ ሀይቅንካ ህንተፈ ሻከቶኮ። 4 ታ ኦድያባ ህንተፈ ቆትከ፤ ታ ህንተናን ጬቀታይስ፤ ኑ ዋየ ኡባን ምነታይስ፤ ቃስ ግታ ኡፋይስ ኡፋይታይስ።

5 ኑኒ ማቀዶነ ብዳ ዎደ፥ ኡባ ባጋራ ዋየትዳፐ አትሽን ሸምፕቦኮ። ካረራ ሞርከታን፥ ኑ ጋꬃን ያሻን ኡንኤትዳ። 2 ታር 2:13. 6 ሽን አዛንዳይሳታ ምንꬅያ ፆሳይ፥ ትቶ ዩሳን ኑና ምንꬅስ። 7 ኑና ምንꬅዳይ ትቶ ዩሳ ፃላላ ግዶናሽን፥ ህንተካ እያ ምንꬅዳይሳ። ህንተ ታና ላሞተይሳ፥ ታዉ አዛነይሳነ ታዉ ቆፐይሳ ታ ስእዳ ዎደ ታና ዳሮ ኡፋይስስ።

8 ታ ዳብዳበይ ህንተና አዛንꬅኮካ አይስ ፃፋድናሻ ጋዳ ቂሮትከ። ታ ቂሮትዳይ ታ ፃፍዳ ዳብዳበይ ህንተና ጉꬃ ዎደስ አዛንꬅዳ ግሾሳ። 9 ሀእ ታኒ ኡፋይትዳይ፥ ታ ህንተና አዛንꬅዳ ግሾ ግዶናሽን፥ ህንተ አዛኖይ ህንተና ህንተ ናጋራፐ ዛርዳ ግሾሳ። ፆሳይ ባ ሸንያዳ ህንተና አዛንꬅስፐ አትሽን ኑ ህንተና አይብንካ ቆህቦኮ። 10 ፆሳይ ኮያ አዛኖይ፥ አቶተꬃኮ ጋꬅያ ናጋራፐ ስሞ ኤሄስ፤ እያን ቂሮያባይ ባዋ። ሽን ሀ ሳአ አዛኖይ ሀይቆ ኤሄስ። 11 ህንተ አዛኖይ ህንተናን አይፍስዳ አይፍያ በእተ። ሄ አዛኖይ ህንተና አይ መላ ደንꬅዳኮ፥ አይ መላ ዛሮ እማናዳ ጊግስዳኮ፥ ሄ ኡራ ቦላ አይ መላ ሀንቀꬅዳኮ፥ አይ መላ ታዉ ያያና መላ ኦꬅዳኮ፥ አይ መላ አሞይዳኮ፥ ሄ ኡራ ሴራናዉ አይ መላ ጊግዳኮ በእተ። ሀ ኡባባን ህንተ ጌሽ ግደይሳ ማርካይደታ።

12 ሄሳ ግሾ፥ ታኒ ሀ ዳብዳብያ ህንተዉ ፃፍዳይ፥ ናቅዳ ኡራ ዎይኮ ናቀትዳ ኡራ ግሾ ግደና። ሽን ህንተ ኑስ አይ መላ ቆፕያኮ ፆሳ ስንꬃን ህንተ፥ ህንተና በአና መላ ፃፋስ። 13 ኑኒ ኡፋይትዳይ ሄሳ ግሾሳ። ኑ ኡፋይሳፈ አꬍድ ኑና ዳሮ ኡፋይስዳይ፥ ህንተ ትቶ ኡፋይስዳይሳነ እያ ዎዛና ሸምፕስዳይሳ። 14 ታኒ ህንተና ናሻዳ እያዉ ኦድን፥ ህንተ ታና ዬላይበከታ። ሽን ኑኒ ኡባ ዎደ ህንተዉ ቱማ ኦድዳ፤ ሄሳዳካ ኑኒ ትቶ ስንꬃን ህንተና ናሽዳይስ ቱማ ግድስ። 15 ህንተ እያዉ ያሻን ኮኮርድ፥ እያ ሞክዳይሳ ቃስ እያዉ አይ መላ ኪተትዳኮ፥ እ ቆፕያ ዎደ ህንተዉ ደእያ ሲቆይ ምንሸ ብስ። 16 ታኒ ኡባባን ህንተናን አማነትያ ግሾ ኡፋይታይስ።