1 ታ ጉꬃ ኤያተꬃ ህንተ ሀእካ ዳንዳአና ጋዳ ቆፓይስ፤ ሀያና ዳንዳእተ። 2 ፆሳይ ህንተዉ ቆፕዳይሳዳ፥ ታካ ህንተዉ ቆፓይስ። ታኒ ህንተና ጌሻ ጌላእዳ እስ አድያ፥ ክርስቶሳስ እማናዉ ኦይቻ ዎꬃስ።

3 ሽን ሾሻይ ባ ገንያን ሄዋኖ ባለꬅዳይሳዳ ኦን ኤር ህንተ ዎዛናይ ኢትድ ክርስቶሳስ ደእያ ህንተ ሱረተꬃነ ጌሻተꬃ አጋንደት ጋዳ ህርጋይስ። መ 3:1-5. 4 እስ አስ ይድ፥ ኑኒ ህንተዉ ማርካትዳ የሱሳፐ ሀራ የሱሳ ህንተዉ ማርካትኮ፥ ዎይኮ ህንተ ኤክዳ አያናፐነ ዎንገላፐ ሀራ አያናነ ዎንገላ ህንተዉ ኦድኮ፥ ስእ ግድ ኤኬታ።

5 ሽን ታኒ የሱሲ ኪትዳ “ግታ ሀዋረታ” ገተትድ ፀገተይሳታፐ ጉፃይስ ጋዳ ቆፕከ። 6 ታኒ ኦዳ ኤሮና አስ ግድኮካ፥ ኤራተꬅ ታዉ ደኤስ። ሄሳ ታ ህንተዉ ዳሮ ኦገን ቆንጭሳስ።

7 ታኒ ሚሸ ኦይቾና ፆሳ ዎንገላ ህንተዉ ጮ ኦድዳይስነ ህንተና ꬎቁ ኦꬃዳ ታና ቶችዳይስ ታዉ ናጋራ ግዲ? 8 ታኒ ህንተዉ ኦꬃናዉ ሀራ ዎሳ ኬꬃታፐ ሚሸ ቦንቃ ኤካስ። 9 ታ ህንተራ ደእያ ዎደ ታና መትንካ ህንተፈ እስ አስካ ዋይሳብከ። ማቀዶነፐ ይዳ አማነይሳት ታና ኮሽያባ ኡባን ማድዶሶና። ሀች ጋካናዉ ታ ህንተዉ ቶሆ ግዳብከ ስንꬃስካ ቶሆ ግድከ። ፍልጵ 4:15-18. 10 ክርስቶሳ ቱማተꬃይ ታናን ደእሽን፥ ታ ጬቁዋ አካያ ቢታን ታና ኦንካ ድገና። 11 ታ ሀይሳ አይስ ጋይና? ህንተና ዶሶና ግሾዬ? ታኒ ህንተና ዶሰይሳ ፆሳይ ኤሬስ።

12 “ኑካ ህንተ መላ ኦꬆስ” ያግድ ጬቅያ ሀንኮ ሀዋረታ ጬቁዋ ጋሱዋ ꬋይሳናዉ ሀእ ታ ኦይሳ ስንꬃስካ ኦꬃና። 13 ሀይሳ መላ አሳት ክርስቶሳ ሀዋረ ዳናናዉ ባንታና ላምያ ዎርዳንቾ ሀዋረታነ ጭምያ ኦሳንቾታ። 14 ሄስ ማላልስያባ ግደና፤ አይስ ጊኮ፥ ፃላሄይ ፖኦ ኪታንቾ ዳናናዉ ባና ላሜስ። 15 ሄሳ ግሾ፥ ፃላሄ ኦሳንቾት ፅሎተꬃ ኦሳንቾታ ዳናናዉ ባንታና ላምኮ ሄስ ግታባ ግደና። ኤንቲ ዉርሰꬃን ባንታ ኦሱዋዳ ኤካና።

16 ኦንካ ታና ኤያ ግድ ቆፖና መላ ዛራዳካ ኦዳይስ። ታ ህንተዉ ኤያ ዳንኮካ ታ ጉꬃራ ጬቀታና መላ ታና ኤያ ኦꬅድ ኤክተ። 17 ታኒ ሀይሳዳ ጬቀታዳ ኦደተይ፥ ጎዳይ ኮየይሳዳ ግዶናሽን፥ ኤያተꬃን ኦዳይስ። 18 ዳሮ አሳይ ሀ ሳአባን ጬቀትያ ግሾ፥ ታካ ጬቀታና። 19 ህንተ ዎዛናማ ግድያ ግሾ፥ ኤያ አሳባ ኡፋይሳን ዳንዳኤታ። 20 ኦንካ ህንተና አይለይኮ ዎይኮ ህንተና ቦንቅኮ ዎይኮ ባዉ ማደታናዉ ህንተኮ ሺቅኮ ዎይኮ ህንተ ቦላ ኦቶርትኮ ዎይኮ ህንተና ባቅኮ ህንተ ዳንዳኤታ። 21 ኑኒ ሄሳ ኦꬃናዉ ዳሮ ዳቡራንቾ ግደይሳ ዬላታሸ ታ ኦዳይስ።

ሽን ኦንካ ምንድ ጬቀትኮ፥ ታካ ጬቀታናዉ ምናይስ። ታኒ ሄሳ ኤያ አሳዳ ኦደታይስ። 22 ኤንቲ እብራዌ? ታካ እብራወ። ኤንቲ እስራኤሌ? ታካ እስራኤለ። ኤንቲ አብራሃመ ሼሼ? ታካ አብራሃመ ሼሽ። 23 ኤንቲ ክርስቶሳ ኦሳንቾ? ታኒ ጎሻ አሳዳ ኦዳይስ፥ ኤንታፈ አꬍያ ክርስቶሳ ኦሳንቾ። ታኒ ኦሶን ዳሮ ዳቡራስ፤ ዳሮ ዎደ ቃሸታስ፤ ጋራፈታስ፤ ዳሮ ዎደ ሀይቆፐ አታስ። ሀዋ 16:23. 24 አይሁደት ታና ሀስታማነ ኡዱፉና እቻሹ ቶሆ ጋራፍዶሶና። ዛረ 25:3. 25 ሄꬑ ቶሆ ፃምአን ሾጨታስ፤ እስ ቶሆ ሹቻን ጫደታስ፤ ማርካበይ ሄꬑ ቶሆ መእስ፤ አባ ግዶን እስ ቃማ ኩመꬅ አቃዳ ፔአስ። ሀዋ 16:22፤ 14:19. 26 ታኒ ዳሮ ኦግያ ዳቡራን ሄመታስ። ክፃ ሃꬃፈነ ፓንጋፈ አታስ። አይሁደትነ አይሁደ ግዶና አሳይ ታ ቦላ መቶ ጋꬅዶሶና። ካታማይ፥ ባዞይ፥ አባይ፥ ታና ያሽስ፤ አማንያ ዳንያ አሳት ታና ዋይስዶሶና። ሀዋ 9:23፤ 14:15. 27 ታኒ ኦሶን ዳቡራስነ ጫዋታስ፥ ዳሮ ቶሆ ꬍስኮ ꬋያስ፥ ኮሻታስ፥ ሳሞታስ፥ ዳሮ ቶሆ ፆማስ፥ ሜገታስ፥ ካሎታስ።

28 ሀራባ ኡባ ታይቦና ኡባ ዎደ ታና ቆፍሰይ ዎሳ ኬꬃታባ። 29 እስ አስ ዳቡርያ ዎደ እያራ ታ ዳቡራብክና? እስ አስ ናጋራን ꬉበትያ ዎደ ታ አዉደ ቂሮቶና አጋድና?

30 ታ ጬቀታናዉ ኮሽያባ ግድኮ ታኒ ዳቡራንቾ ግደይሳ ኤርስያባን ጬቀታና። 31 መርናዉ ቦንቸትዳ ፆሳይ፥ ኑ ጎዳ የሱስ ክርስቶሳ አዋይ፥ ታ ዎርዶቶናይሳ ኤሬስ። 32 ዳማስቆ ካታማን ካዋ አርስፆሳፐ ጋርሳራ ሃረይስ ታና ኦይꬃናዉ ኮይድ ዳማስቆ ካታማ ፐንግያ ናግስስ። ሀዋ 9:23-25. 33 ሽን አሳይ ታና ዳቾን የግድ፥ ካታማ ድርሳ ማስኮትያራ ዎꬍስን ታኒ እያ ኩሽያፐ አታስ።